Mir Kinner vom Duerf

Mir Kinner vom Duerf

Wos hatte mir für en Spoass früher. Unner Lawe woar im Vergleich zu hoit kärglicher, ower dafür oarch aufrechend. Bei uns woar nit ümmer die Muetter dabei oder hoat uns überoll higfoahrn. Nä, mir sen im Duerf gebliewe und höm unner Programm selwer gemoacht. Und des Wuert „Langeweile“ höm mir a goar nit gekennt, weil unner Lawe sou aufrechend woar. Haustüer auf und naus und dann höm mir uns mit viele annere Kinner do die Zeit vertriewe. Im Gäichetäl, die Muetter woar froah, wenn mir fuert woarn vo dahäm, do hoat se amol a bissla Ruuh gehoot. Blos, wenn dar Voater vo die Arwed hämkumme is, vo die Frühschicht um halwer vier, doa muesste mer ümmer dahäm sei. Doa wollt er sei Kinner zäil, woarscheinlich hoat er bei siewe Kinner scho kän Überblick mehr gehoot. Mir höm öftersch mol die Ranze voul griecht, weil mer vor lauter Spieles die Zeit vergesse hatte.

Mir sen oft nei zum Onkl Paul, wos mei Dout woar und höm doa in dara Schoier gspiielt. Sou a Bauernhouf mit Küh, Katze, Hünd und Hüenner woar e änzicher Abentoierspielplatz, souwos gaits in dara Fuerm hoit nix mer. Ich wäs nit ob dar Dout des elles überhaupt wäs, wenn er des liest, ower es mäicht nix, is ja scho lang har. Üm nei die Schoier zu kumme, muesste mer erscht amol a poar Hüerde überwind. Des alte Houftor woar mästens abgschloasse. Des woar für mich überhaut kä Problem, weil klatter konnt ich wie e Äffle und für die annere hob ich die Pfuerte vo inne aufgemocht. Die näxte und gröaßte Prüfung woar dar Huundsköter. Ich wäss sein Nome nix mer, könnt ower Hasso gewaast sei. Ar woar klä, stämmich, struwelich und mueds wild und ar woar links im Houf o sou a Laufkäite ogebunde. Sou hoat dar dan ganze Houf beherrscht vo owe bis unne. Wenn mer ower rachts ganz seitlich gelaffe is, do wu dar Miist woar, is mer grod sou vorbeikumme und oft genuch is mer a nei die Sudde getraate, wenn er än grod amol wieder ospring wollt und mer vor lauter Angst nou a kläns Schrittle, zu die Seite nein Mist, gemoacht hoat. Dan Hasso sei Gsicht woar sou noah, dass mer direkt sein Atem obgriecht hoat und sei bluetunerlaffene Aache gsahn hoat. Wenn er jetzt gegauzt hoat, es woar ower mehr sou a ganz wilds Gekläff, do hoat er än richtich voulgspäzt. Ich hob ne öftersch amoal die Zunge rausgeleckt, weil ich gewüsst hob, ar griecht mich nit. Nit ümmer höm mir uns vorbeigetraut, weil du hoast nie gewüsst, ob dar nit doch amol e noie Käite griecht hoat. Wenn du om Mist vorbei woarscht, konnste dich rachts halt bis zum Stool und hattst dan Hundsköter gschafft. Jetz biste soufurt belohnt woarn. Unte im Houf woar sou e alts Foos mit e Ausloaßventil gstanne und des woar voul vo Zuckerrüewesirup. Dar woar nit für uns Kinner gedoacht, sondern dan Sirup höm die Kölwli griecht, damit se besser woasse. Ich hob mir jedesmol a Haand voul rausgeloasse, weil ich wollt ja a nou gröasser war. Obwohl ich viel dovo gschluckt hob, sen die Kölwli ümmer schneller gewoase wie ich. Trotzdem woar des e Genuss und es hoat e Zeit gedauert, bis du die Haand wieder sauwergeleckt hattst. Wenns schneller gia sollt, bist de direkt nei zu di Kölwli und die höm des einwandfrei und in kurzer Zeit mit ihrer pelziche Zunge sauwergschlabbert.

Jetz isses nein Freizeitpark gange, nei die groaße Schoier mit dare Maschine, dan ganze Stroah und dan Hoi wos doa rümgelaache is. Unte konnste Versteckeles im Stroah spiel. Da hom mir Höuhle und unterirdische Geng gebaut. Rachts is e Tröppe nauf en Zwischeboude gange, do woar die Ruewemühl und wenn de ouwe Ruewe neigschmisse hoast, sen unte in der Koammer die Schnitzeli nei die Wanne gfalle. Die Küh hattes guet, Rueweschnitzel und Sirup, des höart sich noch a Festesse o. Do woar a känner do dar gsocht hoat: „Poasst uf die Finger auf!“ Weil mäst woarn mer alää, wenn mer die Mühl und dan Keilriema ogschmisse höm, weil do der Onkel und die Tante daus en Acker woarn.

Vo dann Boude is die Lätter weiter noch ouwe gange bis unner es Dooch und do ouwe woarn die mäste Stroahbüschel gsatze, genausou wie unta uff en Boude. Wos sen mir vo do ouwe rogsprunge, unte nein Stroah oder nein Hoi, mit und ohne Salto. Des woarn scho a poar Meter. Mir höm Wettbewerbe gemoacht – hoit säicht mer Tschällensch – und jeder wollt ümmer vo weiter ouwe rospring. Wenn de des mit die Aache vo hoit oguckst, woar des scho teilweise gfährlich. Doamols hattste ower kä Angst und grod daswache is a nie wos passiert, nit amoal wenn mer freihendich ouwe üwer die Querbalke gelaffe sen. Des woar sou a Oart Mutprobe. Wos hom mir ausgsahn donoach, üweroll Stroha in die Kläder und des hoat die ganze Nocht gekratzt, weil früher hoat mer sich nit unbedingt gewöscht wache sou a bissle Stroah oder Staab. Mästens hoats am Somstich gelangt.

Ja, mir hatte unner Fräd und Freizeitbeschäftigung, die Kölwli hatte ihr Rueweschnitzel und Sirup, blos dar Hasso hoat sich geärchert, weil ar konnt nie än nein Oarsch gebeiß. Des hätt dar zu garn gemoacht. Und dar Doit wüed sich frähn, weil damals nix passiert is bei unner Abentoier in dara Spielschoier.

Fao211128