Daus die Grumbiern

Daus die Grumbiern

Jetz is es bald wieder souweit, es gäeht naus die Grumbiern. Die sen jetz en ganze Summer gewosse, die Grumbiernkaafer höm des halwe Kroitich rogfresse und hoit wölle mer die aus ihrem Versteck im Bouda raushoul. Mei Onkl Paul, mei Dout, hoat scho in der Früh dann Lätterwooche nauf es Kroizloach gfoahrn, do wu unner Agger is. Es is a schmools Stück Land und weils sou e weng über di Kuppe gäet, siehet mer am Ofang vom Agger nit wie weit des Ende nou wag is, vor allem wenn mer sou klä is wie mir Kinner. Des is a Problem, weil wenn du des Ende nit siehst, host du a kä Vorstellung, wie weit des is und wie lang die Arwet dauert. Wenn ich uff en Woocha geklattert bin, hob ichs gsahn. Weit hinne, direkt om Waldrand, da woar des Ende und dar Wald woar ewich weit wag und die Bömm oarch klä. Ower ich hob a rogemüesst zum hölfa. Mir senn zum Agger mit en Holder und e Wöchele nausgfoahrn, die ganze Familie, Voater, Muetter und 4 Kinner in verschiedene Urchelpfeifegröaß. Mit hatte zu Essa und zu Trinke dabei, Pföffermünztee, Wasser und Bröater mit Wuerscht. Jetz is a gleich mei Dout mit em Bulldog kumme und hat mit dara Grumbiernmaschine die Grumbiern rausgschleudert, ä Zaile noch die annere.  Die Grumbiernmaschine woar wie a groaß Rood mit Greiförmli droa und voarne dro woar a Schor. Des ganze is vom Bulldog gezoucha wuern und die Greiförmli sen nei dan vom Schoar gelockerte Bouda, höm dobei die Grumbiern rausgschloidert und die sen när sou gfloucha. Noch a poar Zeile woarn ganz schö viele dogelache und du hoast als Kind gedocht: „Au weia, des dauert, do brauchst du hoit nix mer mit die annere naus en Fußball zu giehn“. Mir hatte Kürbli dabei für die klänne und Kürbli für die groaße Grumbiern. Die groaße Grumbiern woarn zum Glück in der Überzoahl. Ümmer, wenn a Kürble voul woar, is des nein Soock geläert wuern und allmählich hoat mer gsahn, dass wenicher Grumbiern uf en Agger woarn und dafür die Seck ümmer mehr woarn sen. Es ist dann a viel langsamer gange, weil die blöde Kürbli mit der Zeit ümmer schwärer woarn sen und dar Buckel und die Bä und Oarm gscheit wäa getuen höm.  Jetz höm mir ower öarscht amol Brotzeit gemocht und des woar des Schüenste am ganze Grumbiernzomlaase.

Uff en Agger hoats kän Schobbi gawe, die Sun hoat a rogebrönnt; daswache höm mir uns ella nein Schobbi unner en Woocha gsetzt, soweit wies gange is. Die Flosche mit dann süeße Pföffermünztee hat die Runde gemocht, die Muetter hoat a Gloos selwereigemoachte Kümmeli aufgemocht und hoat jedem a Broat nei die Hand gedrückt. „Sou esst Kinner, gleich gähets weiter und doa müesst ihr scho nou a bissla hölf“! Hoit hoats Broat gawe mit Bluetwurscht und ich soch oich, es gait nix Besseres wie a Bluetwuerschtbroat wu a poor Stunn in die Sunn gelache hoat. Da kümmt dar Gschmock örscht sou richtich raus, weil des Fät in dara Wierm sou langsom ofengt auszugiehn. Jetz gaits sou a Geruchswolke und die Wuerscht würd sou zoart, dass de fast nix mer kää muesst.  Des is äfoch a Gedicht. Ich tue hoit nou die Bluetwuerscht a Stunn vor em Essa aus en Kühlschrank raus und nawe die Heizung läich, weil se do äfoch besser schmeckt. Die Händ sen natürlich a nit gewöscht wuern. Die woarn sou richtich drackerd; vielleicht hoat des a wos vo dan Gschmoog ausgemocht.

Sou direkt noch em Essa bist de a ziemlich müed woarn und die zwä jüngste höm scho, kaum dass se gesse hatte, die Aache zu gehoot, ower mir annere sen wieder uf en Agger gange. Ä Kürble noch en annere, die groaße in dan Kuerb, die Kläne und die durchgschnietene, kaputte Grumbiern in dann Kuerb. Die Kläne woarn für die Soi dahäm zum Füettern gedocht und muesste a zuerscht wieder aus en Kahler raus, weil se eher kaputt gange sen.

Ich hatt domols schon genuch Kroaft, um die Grumbiern nei die Seck zu fülle. Jetzt hob ich a dann Wald langsom gsahn und gedocht, es muess doch gleich gschafft sei. Ower sou woar des nit. Mei Kroiz hoat scho saumässich wäa getuen und ich kannt mich scho nix mer sou richtich bück. Noch weitere 3 Stunn, und da denk ich, dogeicha kümmt Weihnachte richtich ogerast, hatte mersch ower trotzdem gschafft und en ganze Haufe voule Seck do stiehn. Die Seck mit die kläne Grumbiern sen wie die annere a, zugebunde woarn und höm a Kroitich mit neigebunde griecht, damit mer se dahäm besser gekennt hoat. Jetz is mei Dout wieder kumme und gleichzeitich is mei Sternstunn ogange. Ich hob dann Bulldog im öarschta Gang durch die Kolonne vo Seck lenk döff. Bei Brueder hoat ümmer gsocht: „Wenn dar des döff no döff ich doch a, oder“? Ar haat nit gedöfft, weil er nou nit auf die Pedale kumme is.

Dar Voater und dar Dout höm jetz die Seck uff en Woche naufgschoaggt. Wie se fertich woarn, sen die Kinner ella auf en Wocha gehouwa woarn und ouwe uff die Grumbiern mit häm gfoahrn. Du hoast dich ouwa uff die Seck geläicht – es hoat sou schüe nach früsche Grumbiern geroache, des woar sou a richtiche Dunstwolke üm uns rüm – und hoast nauf en Himmel geguckt. Des woar die Freihät vo domols. Schüe woarsch a, wenn des Kroitich dann nou ogebrönnt wurn is. Des is a e Geruch, dan du des ganze Lawe nix mer vegisst. Wie mer dahäm woarn, is dar Woocha vur die Kahlerschtröppe gfoahrn woarn und dann hämse die Seck nogetrocha und im Grumbiernkahler ausgelährt. Ich hobs a probiert, ower dar Sock is die Tröppa no und ich hinna noch, na woarn mir zwä zom unte naweenanner gelache. Dara Grumbiern hoats nix gemocht, ower my Bä hoat wäa getuen und dar Dout hoat gsocht: „Pass halt auf du Simpl“. Ich muess soch, mir woarn racht mued und ich hatt kä Lust mehr auf Fußball. In di Nocht hob ich gschloffa wie a Murmeltier, ganz tief und ich hob a nix annersch geträmt wie vo Grumbiernkaafer.

Wenn ihr amol nit schlof könnt, gieht äfoch amol mit naus die Grumbiern. Des is besser wie jede Schloaftabletta und wie jedes Fitnessstudio.  Und ich fräh mich scho auf die Grumbiernsuppe mit Gerächerts dinn und die Grumbiernskröpfli mit Öpflsbrai als Belohnung für die ganze Schufterei.

Fa0210822