Der Titze ihr Geens – Reschpekt is halt alles

Der Titze ihr Geens – Reschpekt is halt alles

Die Titze höm zwä Hoiser weiter nein Durf gewoant. Die Titze hom nit blos e Oma gehot, sondern a e ganze Kavallerie vo Geens. Ich wor noch net so alt, drüm höm die riesich ausgsahn und wenn die sich gstreckt höm, hömse üwer mein Koupf nausgekuckt. Normalerweise sen ja Geens friedlich und mache nix, wenn de grood sou am Houf vorbeiläffst. Der Titze ihr Geens worn ower aneschter, des worn richtiche Kampfgeens. Die höm ümmer e moards Gschrei gemocht, wennse dich gsahn höm und sen ganz schnell auf dich zugelaffe. Manchmal höm se dich gepackt mit ihr Schnöwel und höm dich gscheit nein Oarsch gezwickt. Wenn de die Laaderhoase ohattst, des höm die gewüsst und dich dofür dann nein Oarm gezwickt, dass de monchmol bloawe Platte griecht hoast. Mit dara Geens bin ich nie woarm wuern, ich hat sougor äher e bissle Angst ghot. Die höm uf dann Houf aufgeposst, schörfer wie e Hund, obwohl duet a nou a Hund, dar Rolf, gewohnt hot.

Unner Weche höm sich owar a ümmer gekroizt. Mir hatte derhäm zwä Soi im Stool, ich muesst se ümmer ausmist und äns oder zwämol die Wocha muesst ich no es Milichhoisla nawet en Säa und muesst en Ämer voul Molke houl. Sou guet isses unner Soi gange. Blos dar Wech is ümmer o die Titze ihrn Houf vorbeigange. Hiezus woarsch üwerhaupt kä Problem. Doa höm die Geens gor nix gemocht, weil se ja gewüsst höm, ich kum uf en Rückwach wiedr vorbei. Die Muetter hot mir ümmer en groaße Ämer mitgawe, do sen genau zäha Liter neigange. Dos war für mich Büewle schua e ziemlichs Gewicht zum Trocha. Also die Molke nein Ämer, en Säa entlang, in die Kochagasse nei, durch en Adu Sichfried sei Schoier, des woar die Abküezung. Doa worsch a bissle dunkl und du bist dauernd irchendwu oagstossa, des hot dir schue mol en Liter Verlust im Ämer eigebrocht. Nocher die Ödelsgasse füer, die Schweiferter Stroass no und genau wie sust, höm die Geens am Houf gewoard. Die höm sich jetz nit äfoch hiegstellt, doa woarn die zu gscheit, es hot ower ümmer emol äne aus dan Houf rausgeguckt und du hoast richtich gemirkt, wie die sich auf dich frähn. Mei Schriet is ümmer langsamer wuern, ich bin uf die annere Stroaßeseit gewechselt, mei Hatz hoat gekloapft, ich hat vielleicht die Housa voul. Wenn du grod gedacht hoast, jetz bist de vorbei, na höm die Onlauf genumme, höm die Flüchl gschleudert als wenn se davofliech wöllte, höm e Gezeter gemocht und schua hatt mich die örschta wieder nein Oarsch gezwickt ghot. Ich woar zwoar flink, ower nou klää und die Molke im Ämer wollt ich a nit aufgah. Drüm bin ich ab wie e Pfeil. Weil ich öwer ümmer mit dan rachte Fueß on Ämer gstoaße bin, ist dar Inhalt ümmer wenicher woan; ich ower, weil wenicher Gewicht im Ämer, ümmer schneller. Doa höm die dumme Genns nocher schnell aufgawa, höm ower weiter rümgschnattert, dass es sich oughört hoat, wie wenn se mich feist auslache. Dahäm akumma, woar dar Ämer halwer lähr und wie später dar Voater gfrächt hot, wou denn die Molke is, hat die Muetter gsocht, sie hoat gleich die Helft die Soi gawa, weil die so en Duescht hatte. Des woar jetzt scho a poor mo sou passiert und daswache hob ich mit der Muetter en Ploan gemocht. Es nächste mol hoat se mir es Sunntichsbläittla nei die Hoase und unter es Höm gstopft, sou dass ich wie a Panzer obgsichert woar. Des Bläittla hat gscheit o die Haut geriewe, ower ich hob mich viel sicherer gfühlt und wie ich mit meim Ämer kumme bin und die Geens a wieder kumme sen, hat ich wenicher Angst und bin a gor nit sou schnell davoa gelaffe. Ich mähn grod, dass die Geens dadurch plötzlich e bissle Reschpekt hatte, weil des Geschrei woar goar nit sou groaß wie sust und vor allem, ich hob viel mehr Milich häm gebroacht. Des woar scho a ganz guets Gfühl, ower jetz wollt ich gaanz a goor uf die Gewinnerstroaß sei.

Beim nächste Gang woar des Houftor zu und bloos die Pfuete auf. Ich bin ganz normal vorbeigange und hob genau gewüsst, dass die mich aus die Achawinkl beobochte. Na hob ich mein Ämer hiegstellt und bin wieder zurück uf des Goartemoierla nawe die Pfuete. Es hoat nit lang gedauert da hoat die gröaste Gaans scho wieder ihrn Koupf rausgstreckt, üm zu gucke, ob ich schue wieder zurückkumm. In dann Moment hob ich schnell die Pfuete vo ouwe zugedrückt und die blöde Gaans woar in der Mitte vom Hals eigeklömmt. Sie ist mit ihrm Oarsch ganz wild wuern und hoat dan ganze Kürwer hi und har gschloidert. Und weil ich doch e bissle Angst hat, weil se jetz grod sou wild woar, hob ich nou fäister zugedrückt. Allmählich hoat se die Aache rausgedrähet und statt gschnattert blos nou geröchelt. Doa hob ich se noch amol tief ogeguckt und hob se dann ausgelosse, wobei se sich soufurt klaglos nei die Schoier zurückgezouche hoat.

Bis uf dann Liter durch die Abkürzung durch die Schoier hob ich in dara weitere Zukunft kä Molke mehr verlorn. Die Geens höm sich sougor ümmer gfräht, wenn ich jetz vorbei kumme bin und hob era nix gemocht.

Reschpekt is halt alles.

fa201227