Wie ofd hob ich dan Sadz scho in mein Lawe gehöard. Des is sou e Sadz der boassd zum DÜV wie die Döschelambe oder dar Schrauwezieher. Und ümmer wenn ich dan Sadz gehöard hob, höm sich mei Hoar gegräusld und ümmer hoads wieder mehr Geld gekousd. Früher bin ich sou e Audo vo Cidroen, sou e Ende gfoahrn und mässdens woar dar DÜV e Broblem. Wenn dar Brüfer scho sein Schrauwezieher raus hoad und vo unde neis Boudeblaach gschdoche hoad und dar Schrauwezieher is inne bei dan Fußraum wieder rausekumme, dann hoasd de dan Sadz gehöard. „Doa guggese amoal doa“, hoad er sichessicher gsochd und ich hob gewüssd, ich griech kä noie Blagedde drauf sondern muess wieder zum Ödls Willi und dar hoad mir wieder e nois Blaach vuerne unde neigschwässd. Geeld had ich nid viel, und des bissle is dobei ümmer kombled draufgange. Blos weil dar mit sein Schrauwezieher dorümgiegd und sich a nou dodal frähd, dass er wieder wos gfunne hoad und sein Sadz gsoch kannd. Gued, die Ende als Audo woar a e Schroddkisde, hald e ganz äfochs Audo und es woar ächendlich ümmer wos nid in Ordnung beim DÜV-Dermin. Hoidzudooch foahr ich modernere Audos, gloar, woarscheinlich damid ich dan Sadz nix mer höar muess. Und drodzdem, es schdeggd in än dinn. Und wenn de amoal a bsychisches Drauma hoasd, dann hoasd de des.

Mir wollde om Mondich mit em Wohnmobil in Urlaub foahr und ich woar om Samsdich Oweds scho ferdich mid em Belode und hob mich gfrähd. Schnell nou mid e boar Loid gedroffe und nou en Umdrunk gemoachd. Moanche vo dare Loid sen sou e Oard Bolizisde und die müesse blos ämoal higugg und scho wüssese Bescheid. „Doa gugg amoal doa“, hoad ar gsochd. “Dei DÜV is scho fasd drei Monad obgelaffe”. Und wirglich, des had ich nix mer uf en Schirm gehod. Und jedz is Somsdich Oweds, doa gähed nix mer und äfoch drodzdem om Mondich früh foahr, mäichd a kä gueds Gfühl. Also hob ich überläichd und dann om Sundich Oweds nou im Inderned beim DÜV geguggd und wirglich, ich hob diregd für Mondich füh um Dreivierdl Oachd en öerschde Dermin griechd. Doa däde mir sougoar nou büngdlich fuerd kumm, wenn des glabbd, hob ich gedoachd.

Also ich foahr doa früh hi und mid e nou reladiv nois Audo wüerd des scho fungdioniern hob ich gedoachd. Und ich woar ja a dar Örschde o dann Dooch, doa sen die Brüfer nou früüsch im Koubf. Büngdlich is es Lichd in die Halle ogange und die Dür zum Büro aufgschloasse wuern. Die Brüfinschinöre höm scho nou schdreng geguggd, wie se des ja beruflich moach müesse und höm ihr Schdirn brofessionell in horizondale Falde geläichd. „Au weia, fasd drei Monad drü“, hoad dar äne gemurmld und dann mid dare Brüfung ogfangd. Drodz dem fuerdgschriddene Alder und der ganze Erfoahrung is mer is ümmer nou e bissle aufgeräichd und nervös bei sou e Undersuchung. Und wenn du selwer zum Dogder muessd und dar mäichd meinedwache en Uldraschall, dann bisde a unsicher, weil de nid wässd wos rauskümmd.

Dar Oblauf beim DÜV is ümmer nou darselwe wie früher. Öerschd sen die Brömse droa auf dare Rolle wu sich drähen, doanoach des Lichd und die Obgase und dann gäheds  die Gruewe no und dar Bouda würd vo unde ogeguggd. „Doa gugge se amoal doa”, hoad ar blödzlich vo unne geruefe und ich solld a no nei die Gruewe schdeich. Mei Buls woar oarch beschleunichd und ich hob schwär gschnaufd, weil bei mein innere Aach hob ich grod mein Urlaub gschdriche. Dar Brüfer woar unde gschdanne, hoad mid sein Schrauwezieher auf wos gedoid und die Schdirn had ganz schdrenge diefe Furche. Ich konnd kaum geräid, es Maul woar drugge und ich hob blos gsochd: „Ja“? „Des is die Öülwanne“, hoad ar gemähnd, „doa moache se blos amoal e bissle Woachs hi, weil die schbrüzd ümmer voul im Räwadder und dann ruesd se nid“. „Jedz is se nou in Ordnung“, hob ich zaghafd gfräechd? „Ja freilich“, woar die Andwoard. Buuuhhh. Es is weider bei die Brömse gange. Ar hoad mid sei Döschelambe die Brömsbeläich kondrollierd. Ar hoad noch amoal und noch amoal vuerne lings neigeguggd und wos hoad ar gsochd mid sei hoache Schdirnfalde und die Aachebraue bis hoch o die Hoar gezouche?  “Doa gugge se amoal doa. Sou müesse die Brömsbeläich nou aussah. In Ordnung“. Jedzd hoad dar annere Brüfer die Modorhauwe aufgemoachd. „Au weia, doa gugge se amoal doa!“. Und wie ich higug, is doa wirklich a Schlauch und dar schdähed äfoch nei die Lufd. In meim Koubf woar des scho e halwer Modorschode. Ar hoad dann Schlauch genumme und wieder auf sou en Schduze draufgschdeggd. “Is blos rogange, vielleichd muess mer nou e Schelle draufmoach“. No is er neigange, hoad sei Schbadele gehould, die alde Blagedde rogegrazd und e noie draufgebabbd. Gschaffd. Ower wos woar des wieder für e Achderboahnfoahrd für die Gfühle. Doa könnd ich a diregd drauf verzichd. Die Sache woar nou nid ferdich. Ar hoad jedz alles eigedroache in sei Formular und dann die Rechnung und dan Brüfberichd ausgedruggd. „Doa gugge se amoal doa: Alles kombled in Ordnung. Des höm mer nid ofd bei dare Wohnmobile“. Und ich hob mich wieder ümsussd verüggd gemoachd.

Dahäm hob ich zur Frau gsocht: „Doa gugg amoal doa, alles in Ordnung. Mir könne los“.

FriedrichAlbinOT, 231015

Ich mouch scho Viecher, egal welche, a die Insegde, weil ich hob selwer Bii gehod und Viecher, die rümfliehn, sen mir goar nid frömm, die beruhiche mich sougoar.

Mir woarn neulich mit em Wohnmobil underwaags. Es woar früh und nou dungl, ower mer hoad scho die Morchendämmerung in Slowenien om Horizond gsann. Ich foahr garn zu dare Zeid los, weil mir hadde nou e muerds Schdregge vor uns. Früh bisd de mässdens allä im Coggbid, die Beifoahrerin schlöafd und dar Dooch wachd grod auf. Du koannsd bis zum Frühschdügg nou e guede Schdregge zurückläich und doabei deiner Gedange nochheng.

Wie ich des Audo ferdich gemoachd hob zum Losfoahrn und nou amoal daus woar, hoad se die Gelaachhäd ergriffe und is mid neis Führerhaus gschlübfd. Sie hoad nid gfräechd, sondern is äfoch mit nei und woar uf ämoal doa. E slowenische Mugge. Die sahn aus wie bei uns, sen blos viel fraacher. Sie hoad soufurd Kondagd mid mir aufgenumme, hoad sich genau in meim Bliggfeld auf die Frondscheiwe gsedzd und is gemächlich vo unde noach owue gegroabbld, sou als wenn se genau gewüssd hoad, dass ich nid äfoch onnere no kumm. Des gegroabbl hädd mich grod nid gschdörd, ower uff ämoal mäichd se en Sadz und sedzd sich diregd rachds o mei Noselouch, sou dass ich se fasd eigschnaufd hädd. Inschdingdiv hob ich dan Schaldgnübbl mid die rachde Hand losegeloasse und auf mei Nose gschloche. E bissle zu fäisd, sou dass ich nid die Mugge, sondern mei Brille erwüschd hob. Die is mid die Mugge fuerdgflouche und vuerne nein Fuessraum gfalle. Wenn de grod mit Hunnerd Sache föahrschd und ohne Brille ziemlich blind bisd, noa hoasde jedz e Broblem. Die Mugge woar wieder vuerne o die Frondscheiwe gehoggd und hoad beschdimmd mid mir überläichd, wie ich wieder o mei Brille kumm. Ich hob jedzd dan Gschwindichkeidsrechler neigemoachd, bin mid em Fuess vom Gaspedal, hob die Brille vo vuerne noach hinne seidlich gschouwe und konnd se, wenn ich mich im Sidz ganz klä gemoachd hob, wieder boagg und aufsedz.

Die Mugge woar inzwische o die Seidenscheiwe und hoad doa ihrn Lauf nauf und ro gemoachd und mich mid ihr groasse Aache ganz brovozierend ogeguggd. Dich griech ich, du Draagsmugge, hob ich gedoachd und bin langsom mid die linge Hand zum Kibbschalder für die Seidescheiwe und hob die Scheiwe schnell a Schdügg rogeloasse. Schdadd dass die Mugge jedz nauf in die Freiheid groabbld und floichd, is se mid die Scheiwe rogfoahrn, ganz ruhich sidze gebliewe, hoad mich wieder genau ogeguggd und ich hadd des Gfühl, a ausgelachd. Ich wolld se mid die Handkande erwüsch, ower die Obsichd hoad se durchschaud und woar scho wieder o die rachde Seidescheiwe. Jedz hoad se mid ihrer Fluchübunge ogfangd und is ümmer vor mir hi und hargflouche. Ich hob e boar moal Lufdlöcher gschloche und des hoad dare scheinboar gfalle. Jedz woar se o meim Oahr, o die Schdirn und hoad sichs ledzdendlich uff meim linge Oarm gemüdlich gemoachd. Sie hoad sich sicher gfühld. Sie hoad sich sehr sicher gfühld.

Beim Foahrn söll mer ja örschdens ümmer auf en Verkehr gugg und nid auf Mugge und mer söll ümmer zwä Hend om Lengrod hob. Ower wos solld ich moach. Ich oder die Mugge, des woar scho e Zweikambf. Ich hob alle Vorsichd über en Haufe gewurfe und hob mit die rachde Hand noach die Mugge gschloche, weil die grod auf meim linke Äillebouch gsesse is. Gladsch! Durch dan Schlooch auf en linge Äillebouche hoad des Audo en Rugger noach lings gemoachd und fasd hädd ich dann Lasder derwüschd, dar wu mich grod überhoul wolld. Des hädd a schief gieh könn, hob ich zu mir und vor allem vorwurfsvoll zur Mugge gsochd. Scheinboar hoad se sich des a zu Herze genumme und hoad a bissle Abschdand gehalde und is o die Seidescheiwe gebliewe. Ich wolld mich jedz nix mehr brovozier loass und hob se äfoch nix mer beachd, a wenn se mich noch e boar moal ogflouche hoad. Vielleichd hadd se a äfoach blos Hunger ich hob gued gschmeggd wie a Leggerbisse. Ower wache sou e slowenische Mugge wolld ich känn Unfall bau. Mir höm die Foahrd nou gued rümgebroachd und beim Frühschdügg noach zwä Schdunn,hadd ich se scho vergesse.

Noach 14 Dooch sen mer wieder häm gfoahrn und ich bin wieder früh um fünef losgfoahrn. Und wos söll ich soch, wie nocher langsom die Sunn aufgähed, is die Mugge wieder vuerne o die Scheiwe schwerfällich schräch noach ouwe gegroabbld. Es woar diesselwe, ich hob se o die Aache gekennd. Sie hadd blos a weng zugenumme, weil in zwä Woache Urlaub nimmd jede Mugge zu und doa koannsd de moach wos de willsd. Sie hoad mich noach e kuerze Addagge in Ruh geloasse und wie mer doahöm wuern, woar se uf ämoal doad uff en Düüsch gelaache. Mausedoad. Vielleichd doch nou verhungerd?

Jedz hoad se mer wieder lääd geduen und häd ich gwüssd, dass des ihr ledzder Urlaub und ihr ledzde  Schdunn woarn, häd ich vielleichd annerschd reagierd und sie o mir gnabber loass. Draagsmugge.

FriedrichAlbinOT, 231010

Bei uns in Öwerdoll wird im Mä nauf en Groizberch gelaffe. Beim öerschde Morchenlichd gäheds gewöhnlich los und sou lang bis mer hald ouwe okumme is. Moanche Wallfoahrde gien än Dooch oder anere a mehrere Dooch. Und wenn du von uns aus noach Rom läffsd oder en Jacobuswaach noach Sandiago de Kombosdella, doa bruachsd de schoa amoal e poar Woache. Bei uns würd Somsdich nauf und am Sunndich wieder ro gelaffe, in Kolonne, ouff die Schdroass, ouff die Feldwache oder im Waald. Für die Schdroass bruachsd du noadürlich e Absicherung vuerne und hinne droa, damid nix passierd. Es is ümmer e Musig dabei, und die schbiele ümmer durch die Dürfer, damid die Loid doa a wos davo höm. Wenn sou e Zuuch durchläffd, doa kümmd Lawe nei sou e Durf, die Gloagge loide, moanchmoal gaids wos zu Dringe und viele däde a garn midlaff. In sou e relichiöse Kolonne würd ondächdich gebad und wenn e poar Hunnerd Loid desselwe bade, no is des, zom mid die Geräusche vo die viele Füess, wie so e leichdes Gewiddergrummeln, wu durch die Schdroass rolld. Und alle laffe in dieselwe Richtung. Des is äfoach. Du koannst obschald und dei Füess laffe dare Füess vor dir noach. Vo uns aus gäheds Richdung Nordn und vo e höchere Kubbe aus, konn mer ab und zu scho des Ziel vo dan Marsch, dan heiliche Berch, sah. Des is des Ziel für hoid und jedz, wenns nou früh is, doa is die Lufd nou früüsch, du hoasd nou die gsammelde Groafd vo die Noachd und wenn du sou schüe im Gebad bisd, mirgsd du kä Anschdrengung. Bamm Bamm, äh Schridd noach en annere, wie sou a aufgezouches Mennla, hunnerd moal, daused moal.

Di mäsde Deilnehmer giehn uff zwä Waache die ganze Stregge endlang: ämoal dann innere Waach, weil du hoasd Zeid üwer dich noachzudenge und deim innere Friede näher zu kumme, weil de vielleichd doch gsündichd hoasd, oder a, wenn´s sei muess, deim Herrgodd näher zu kumme. Du hoarchsd in dich nei und im Schdaggado vo die Schridde, laffe die Gedange wie e Brünnle und es lösd sich woas. Nid seldn, dass du in dir selwer auf wos schdöassd und dann amoal grein muessd. Des gehöard doazu bei sou e Medidadion. Und sou löaffsd du die Brobleme im Lawe äfoach fuerd. Dos siehd mer änn a o. Die Loid senn in sich gekehrd, höm ofd die Aache zu, blos die Libbe bewäiche sich nou a weng im Gebad mid. Ab und zu küünd amoal e diefer Seufzer und dann gäheds a wieder besser mid die Gedange. Des is wie der Waach, es gähed berchauf und berchab ower am Ende bisd du ouwe uff en Berch und om Ziel. Es is ächendlich e äfoaches Rezebd. Wenn du Brobleme hoasd, muessd de dich auf en Waach moach, muessd laff und scho würds besser und dei Koubf wüerd wieder gloar. Sou ähnlich soche des viele vo die Wallleud, die scho midgelaffe sen.

Und es gaid dann äußere Waach. Du bisd mit die annere Loid zoamm und du mirgsd, wie schuüe des is, sou woas zoamm zu moache und es gaid Gelaachehäde, sich mit viele zu unnerhalde und näher zu kumme. Des is e Gemeinschoafdserfahrung, wu du schnell sou a emodionale Verbindung griechsd zu dare, die midlaffe. Und wenn du des dan Berch nauf gschaffd hoasd, die ganze körberliche Onschdrengung en Gniebrecherhang nauf, dann ist des e wohlichs Gfühl vo schüener Erfoahrung und Dangboarkeid. A des is e schüener Grund sich omoal mid uff en Waach zu moache. Ich selwer hadd nie dann Mud doazu und koanns a nid sou erklär. Schbäder, wie die Gelenge noach meim Unfall kabudd woarn, doa häd ichs gewölld, ower es is nix mer gange. Sou bin ich hald die ledzde Joahre ümmer naufgfoahrn, had mei Musig dabei und hob e bissle Ondeil o die Wallfoahrd gehod. Wie schüe is des, am Owed mit die ganze Gsellschoafd nou e boar Lieder zu singe. Des Esse, des Dringe, die drauriche Momende und a des ausgeloassene Feiern gehöard zur Wallfahrd unbedingd doazu. Und a wenn ich blos e Foahrwallfoahrer bin: Es ganze Sysdem hoad sich, wie unner ganze Zeid, gewandld, is nix mer sou ugezwunge wie früher und die Glabbe vom Bierausschank im Andoniusssaal gähed nou früher ro, ob du doavor schdäehsd und nou Duerschd hoasd, oder blos dei Glos obgab willsd. Des is sou „Doischd“ und zeichd a, wie des Wallfoahrdslawe in sou en Roahme neigebressd wüerd voa sou Verwaldungsloid doa ouwe. Es gibd wenich Fanzsiganer, des seh ich ei, ower e weldliche Verwalderin, die woahrscheinlich nou ni e Wallfoahrd mitgemoachd hoad, konn des alde Flair, mit des wos se o Einschrängunge broduzierd, a nid wieder raushoul. Die Wallfoahrd geids scho Hunnerd Joahr und wenn die Fransiganer des Kloasder doch amoal verkäffe, wäs mer nid wie des weidergiah söll oder ob alles nei die Büsch gähed. In dann Joahr hob ich sougoar dann Brueder Maddhias vermissd und mir diregd gewünschd, ar däd wieder energisch o die Dür vo dann Zimmer gloabbf, wu sich die ganz fromme Wallleud, noach em Zabfenschdreich noch amoal zum Noachdgebad gedroffe höm, in äns vo dare Üwernoachdungszimmer, wus zum Glügg a nou e weng en Schnabs und en Wein für die andächdiche Schdimmung gawe hoad.

Normalerweise höar ich früh die Wallleud, wie se in Öwerdull nei die Kirch giehn, wie die Gloagge loide wenn se auswalle und die Bloaskabelle spield. In dan Joahr hob nou gehörd wie se nei die Kierch sen und hob gewoard, dass se losslaffe. Ich woar ower wieder eigschloaffe und zwä Schdunn späder bin ich aufgewoachd und ich hob gewüssd, die sen scho o Bobberodh vorbei und jedz in Burgadrodh. Ower ich had en schüene Draum. Ich bin zum Groizberch gelaffe und kurz vor em Gniebrecher sen mir Flüchl gewoasse und ich bin dan ganze Hang naufgschwebd. Wie e Engl. Des woar e himmlisches Gfühl. Scheinboar bin ich änner.

FAOT20230706

Gued, es senn elles blos Muudmasunge, ower es könnd sich a genausou zugedroche hob. Die ganze Gschichde würd vo zwä Dadsache beschdimmd. Ämoal hoad sich unner Bfoarrer vor e boar Joahr gewünschd, dar liebe Godd söll ihm sou e groaße Rudsche bau, dass er vom Bfoarrhaus aus diregd nein Säa gerüdsch koann. Weil ar wäss ja a, dass unner Glima ümmer wöarmer wüerd und doa wär sou e äfoche Abkühlung doch brima. Jedz hoad er sein Wunsch o en Herrgod woarscheinlich zu laud vürgedroche, sou höm des die alde Herrn vo die Fussballer gehöard und höm sich gedoachd: wenn unner Herrgod woahrscheinlich grod annerschd beschäfdichd is bei die viele Brobleme in dare Weld, no müesse mir selwer noachhölf und unnerm Bfoarrer zur Seide stieh. Die annere Sache is, dass sich unner Kirch grod füsisch auflöasd. Des häsd, sie hoad ja a scho e boar Joahr auf en Buggl und in dan fuerdgschriddene Alder kümmds zu Auflösunge, weil sich jedz grod a Stügg vo die Degge gelöasd hoad und rogfalle is. Woahrscheinlich hängd des doamid zoam, dass mer o die alde Kirch äfoch e Schdügg noie Kirch higebaud hoad. Jedz gibd des mid der Zeid sou degdonische Verschiebunge und no isses kä Wunner, dass sou moanches Deil, wie dar bäbsdliche Sechn a, vo ouwe rokümmd. Daswache hoad mer jedz en Deil vo die Kirch schbär müess. Mei Vermudung is, dass bei dann Deileinschduerz dar Daufschdä beschädichd wuern is und nix mer benudzd wär koann. Sou is äns zum annere kumme. Früher sen die Loid ja a im Säa Genezared gedäfd wuern, worüm sölle die Kinner vo jedz o nid a im Wasserlöaser Säa gedäffd war. Des wär e Alleinschdellungsmerkmaol und ich bin mir sicher, die Mönsche däde vo überoll har noach Wasserloase kumm, um ihr Kinner im Säa däff zu loasse. Dass mer die doa däff döff is vürschdellboar. Jedz muessd bloas nou des Säawasser ümgewandeld war in Weihwasser und ich bin sicher es reichd doafür aus, wenn e kirchenamdliche Berson – und des is e gweihder Bfoarrer sicherlich – selwer nei dann Wasser gähed, underdauchd und sou dann heiliche Brozess vo die Umwandlung vo Wasser in Weihwasser einleided. Sicher, es hädd sich moancher gewünschd, mer däd bei dann Brozess liewer doch en Frankewein schdad Weihwasser herschdell, ower es is grod Weihwasser gebrauchd wuern.

Jedz höm die Fussballer oagfangd und höm e muerds Bauwerg gebaud: vom Bfoarrschgoarde üwer es Gengla bis nein Säa. Es hoad ausgsann wie sou e aldbabylonische Konsschdrugdion wu die Eroberer früher gebaud höm, um über die Staddmauer nei die Stadd zu kumme. Zum Glück is des Bauwerg nid diregd bis zum Bfoarrhaus gange, weil sonsd hädd dar liebe God vielleichd, wie doamals beim Durmbau vo Babel a doafür gsurchd, dass des nid fungdionierd. Sou is e schüene riesiche Rudsche endsdanne, ugfhar 10 Meder lang und hoad 2 Meder über dare Wasseroberfläche aufgehöard, dass mer nou schüe nein Säe geblumbsd is. Es woar so e Oard Rinne, in die hoad mer des Säawasser mit e Bumbe naufgebummd und jedz worsch a glidschich genuch zum Roruedsche. Unner Bfoarrer is, Grafd seines Amdes, als Öerschder üwer die Lädder naufgegladderd, hoad sich ouwe higsedzd und noch amoal sein Blig nauf en Himmel gschiggd. Vielleicht woar a e bissle Angsd dabei, obwohl ar e Schwimmwesde ogehod hoad, oder ar hoad noch amoal bei sein öuwerschde Chef um Noachsichd und a um Erlaubnis gebad. Ar hoad losgeloasse und is noach unne geruedschd, örschd langsam und dann ümmer schneller. Wie er dann frei in dare Lufd woar, is ar en Momend gschwebd. Ich hob mir vürgstelld, ar däd jedz goar nid underdauch, sondern drogenen Fusses, wie damals Jesus selwer, üwer en Säe schweb und wieder rauslaff. Es woar blos sou a Blidzgedange, ower nid blos in mein Koubf, sondern ich hadd des Empfinde, wie dar Bfoarrer nein Wasser dauchd und undergähed, dass dar ganze Säe vo Lichdblidze durchzuggd würd und die ganze Admosfähre sou e heiliche Aufloadung griechd. Ar is en Momend undergedauchd und dan wieder hoachkumme. Ich hob gemirgd, ar hoad selwer noch amoal en gräfdiche Schlug vo dann Wasser genumme, wos ja in dan Momend scho umgewandld woar in Weihwasser und sich quasi selwer noch amoal gedäffd. Ar is ons Ufer gschwumme und jedz hob ich a gsann wos die grelle Blidze in dann Säa wuern. Weil a Bpfoarrer ja nid sou ofd nei die Sunn kümmd, hoad dar ganz kassede weiße Bä gehod und des hoad woahrscheinlich sou e Oart Lichdblidze ausgelöasd.

Es woar e schüene Agdion vo die Fussballer und mer koann sich überläich wie des weidergähed. Mer koann die Ruedsche geloass für die Minisdrande und a für die zukünfdige Däuflinge. Allerdings muess mer des gued vermoargd, nid dass es zuviel würd, wenn vo die ganze Weld die Mönsche zum Däffe nei dann heiliche Säa vo Wasserloase kumm wölle.

FAO, 230821

Die EU Normen sen wichdich für dan Eurobäischen Binnenmoargd  und für dan globale Weddbewerb. Sie hölfe äfoach, dass des Zoich zomboassd und dass mer sich do drauf verloass konn, dass Sache fungdioniern, egal ob se bei uns oder im Ausland hergsdelld sen. Des mäichd Euroba stoarg und weddbewerbsfähich. Ich find des gued, a wenns inzwische über 30.000 verschieden Normen gaid. Es wern ober ned alle Bereiche obgedeggd und moanchmoal grod bei Sache ned, die äm wichdich sen.

Wir woarn mit em Wohnmobil in Frangreich wu de dengsd, no, die Franzose sen scho so richdiche Eurobäer. Es woar nou kaald im Zendralmassiv und in der Noachd is die Demberadur a scho moal o die Null Groad gange. Rugzug woar änne vo unner Gasfloasche läer und mir hadde nou 10 Nächde vor uns. Mir sen also in sou en Verbrauchermoargd nei und wollde die Floasche auffüll loass. Ower die höm uns erkläerd, dass in ganz Frankreich kä Floasche aufgfülld war döffe, wache bestümmde eurobäische Gsedzesrechln. Gued, des konnde mer aggzebdier. Dann namme mer hald a ganze Floasche vo Gas aus Frankreich mid, dann wüerds doch a wieder woarm. Ober nää, höm die uns erkläerd, die französische Gasfloasche däde nid auf des doidsche Gassysdem boass, doa bräuchd mer en Adabder. Gued, doa namme mer hald nou sou en Adabder mid. Ja, also die Adabder für des doidsche Gassysdem gaids nierchendswo in Frangreich, doa müessd mer scho än vo derhäm midnamm oder zurückfoahr und in Doidschland käff. Ja, ower mir sen doch scho 500 km vo die doidsche Grenz wag. Gued, hömse gsochd, mir sölle hald überläich, weil jedz im April däds in Frangreich ganz seldn frier und mir sölle hald auf Cambingblädz übernoachd, wus Schdrom gaid. Wenn se uns sou a gläns elegdrisch Heizöüffele verkäffe – auf jeden Fall, erfrier däde mir nid. Ja und wenn mer koach wölle? Des gäed ja a mid Schdrom – und diregd wolld er uns sou e glänne Elegdrobladde für en Schdrom aufdrähe. Ja, gueder Moa, doa könne mer doch gleich nein Hodel gia, hob ich gsochd, weil des is dann nix mer des Cambing wos mir moach wollde. Ower, er hoad nou gsochd, mir könne des a dahäm beschdell und schigg loass. Des däd gewöhnlich a schnell gia.

Zum Glügg is wenichsdens des Inderned des Gleiche wie bei uns und sou höm mir uns om Compuder gsedzd. Mit woarn auf em Waach noach Toulon und wollde om näxde Dooch duerd en Freund besüch. Also bin ich, es woar um 16 Uhr, neis Inderned zu dem Jeff Beg sei Amazon und doa hoads die Adabder gawe; im Sed für alle Eurobäische Länder. Ich hob än bestelld und die Adresse vo unnern Freund in Toulon ogawe. Die Seide bei Amzon hoad kä Brobleme gemoachd, blos für dann lange Waach höm se ugfahr 2 Euro mehr o Dransbordkosde verlangd. Und weil ich Bremiumkunde bin, hämse gemännd, des Sed wär om nächsde Dooch doa. Ich hob zu mei Fraa gsochd: „Des koann goar ned sei, bei dann lange Waach, dass des sou schnell bis noach Frangreich kümmd. Die verspreche wieder wos, wos se nid eihald könne“. Ower ich woar gschbannd und hob nix vo die Angelechenheid gehöard. Um Middernoachd is a Benochrichdigung kumme, des Deil wär in Lyon okumme und uff en Waach noach Südn. Früh um 7 Uhr woar die näxde Noachrichd doa: jedz wär des Boggedle scho in Toulon wus hisöll und wird bald ausgelieferd. Um 12 Uhr hoads gehässe, dar Bosdbode hädd des Bäggle bei unnerm Freund nein Briefkoasde gschdeggd – und mir selwer hadde ümmer nou 200 km bis doahie. Ich hobs ümmer nou nid rachd geglääd, ower wie mer bei unnerm Freund ogekumme sen, hoad der nein Koasde geguggd –  und es woar doa. Geredded. Jetz konnde mer a Gasfloasche mit Gas käff, dar Adabder hoad geboassd und mir konnde unner Urlaub äfoach wieder moach wie mer gebland hadde.

Jetzt sidz ich o die Code D`Azür, gugg nein bloawe Wasser, loass mich vo die Sunn aufbrönn und deng über die Sache noach. Doa fehld doch a wieder so e Norm für Gasfloascheanschlüss. Ower grod bei Glänichkäde sölle mir Eurobäer ja zomgewoass. Mer siehd jednfalls, des brenge mir nou nid sou hie, des kombledd zommwoasses. Doa geids nou viel zu rechln. Ich konn mich a nid o die Löcher im Boude gewöhn, die es Gloo sei sölle, oder o die Gloschüssel ohne Brille, wies ofd bei die Fanzose üblich is. Ess ärcherd mich, dass die Noarme haubdsächlich füer die Indusdrie sen und dass wieder die Ami doafür zuschdändich sen, dass se Brobleme löse, die wu mir in Euroba höm. Und die moache des sou äfoch und sou schnell, dass a Adabder, om Nochmiddoch in Doidschland bestelld, om näxde Middoch in Südfrangreich is, schneller als ich selwer foahr koann. Doa bin ich ­­scho froah, dass es sou Organisadione wie Amazon gaid, weil die soche: „Yes wie can“. Und nid: „Erschd müesse mir a Rechl moach und dann Joahre doadrü digudier“.

Fao26.4.23

Die HellsÖwer – Männerballedddurnier

Nää, des is nit blos Schweiss, wos mer riecht, wenn mer dorthie kümmd. Es is viel mehr. Es is sou a Aroma aus Arbeidsbladzgeruch, Schischabar und Spordhalle und dann kumme – als Idübfele -nou die Hormone dozu, des Desdosderon vo di Menner und die Ösdrogene vo die viele Frauen, wos in Kombinadion mit Schweiss den dybische süssliche Geruchsmischung geit. Des is nit unangenehm, ower mit e kollosalen Wirkung auf des hormonelle Gleichgewichd, vor allem vo die Frauen in dann Raum. Wenn mer dan Dufd jetz, so wie er is, als Barfüm eifang könnd, doa hätt mer en Haubddreffer geland. E Männerballedddurnier is a hoit nou woas besondersch und ich bin grod auf en Waach dorthie. Ich bin e bissle zu späd droa, daswache is des Durnier scho in vollem Gang und dar Männerballedddurniergeruch fülld inne scho die ganze Halle. Und a auße hoat sich scho a Hülle gebild, zwoar durchsichdich, ower underbewussd doidlich merkboar. Und sou is des Vehalten vo die Anwesende annerschd als zum Beispiel bei e Fußballdurnier, wu viel mehr Aggression und Spannungsbodendial doa is. Hier kümmd doazu, dass die Zuschauer hier in der Rechel weiblich sen, ich däd amoal soch in dare Halle siebzich Brozend und doavo sen die Mäsde nou im fruchdboare Alder. Und woas bassierd, wenn die Frauenweld jetz die desdosderongeschwängerde Lufd eiadmed? Die Frauen reagiern unbewussd doa drauf, ohne dass se des mirke. Wenn du jetz nei die Halle läffsd, no miergsd du des soufurd. Es is wie früher, wu ich nou als Besamungsdechniger gschaffd hob und nein Stool gelaffe bin. Die brünsdiche Küh höm dich durch ihr Hormonwallung ganz annerschd ogeguggd, richdich verliebd und die Wimbern höm sich sou noach ouwe gerolld. Ich will jetz die Frauen nit mit Küh vergleich, ower des hormonelle Reagdionsmusder is bei alle Lebewesen ugfahr gleich.

Dar überall sichdboare Wimbernaufschloch hoat jetz ower nit mir gegolde, sondern dare Bühne ganz vuerne in dare Halle. Und doa sen se aufgedrade, die verschiedene Männerballedde beim Durnier und hoit woar die Bayrische Meisderschoafd. Unner Buewe vo Öwerdoll, die sich „HellsÖwer“ nenne, woarn a dabei und grood kuerz vor ihrem Aufdridd. Mer konnd schoa amol des Bühnebild betroachd und es woar ausgfeild wie jedes Joahr. Es muess schnell zum Aufbaue sei und veränderboar während sou em Danz. Dar ganze Danz muess eigwiggeld sei in a Gschichde und die muess sich dann durch den ganze Danz durchzieh. Weiter würd e gewisser Groad o Akgrobatig verlangd. Die Schridde müesse stimm und zum Dagd poass, die Kosdüme, die Hebefigure und die Choreoagrafie sölde gued durchdoachd sei. Es is nix mer sou wie in meiner Juchend, dass de mit a Düdü uf die Bühne gange bist und Blödsinn gemoachd hoast. Des hoat sich weiterendwiggeld und is a richdich anspruchsvoller Spoard wuern, der a vo Brofis bewerded wird. Doazu brauchst du Drainer*innen und a Grew auserüm, die sich üm vieles kümmerd. Wenn de dann nou Buewe hoast, vielleichd wie bei uns, im Kern aus em Fußballverein, die sich a nou a bissle gued und erodisch bewäich könne, no sen die Voraussedzunge gschaffd und die müesse blos nou es ganze Joahr üb.

Seid 10 Joahr gibds jetz die „HellsÖwer„ und sie höm en steile Waach hinner sich. Jetz höm se quasi ihrn vorledzde Auftridd und elle gugge vüer auf die Bühne. Die Hormone beim weibliche Geschlechd sen om Höhebungd und a die Aufrechung und die Schdimmung. Wenn de dich rümdrähesd, gugggsd du blos nei aufgerissene Aache und jetz gähed vuerne die Bosd ab. Unnere kumme auf die Bühne und en Orkan von Gegreische brichd los. Du mirksd gleich bei die örschde Dagde, die Buewe sen hoid gued in Fuerm. Die sen konzendrierd, locker und dar Aufdridd löaffd vo ganz allää. Die Gschichde vo dann Danz handeld vo Freundschafd, die in der Kindheid beginnd und niemals aufhöerd. Kä gröaßerer Fehler is dobei und wie se ferdich sen, brichts aus die Zuschauer raus. Die Ansbannung lösd sich und der Abblaus is gewaldich. Und du hoast diregd des Gfühl dass es in der Durnierranglisde hoit weid noch vuerne langd. Om Ende sen se Bayrischer Vizemeisder und blos e poar Büngdli hinner em 1. Bladz. Des woar a richdich gueder  Oabschluss vo die Karriere vo die Hellsöwer. Sie höms lang gemoachd und höms verdiend, jetz aufzuhöarn und in e annnere Lebensphase üwerzugiehn. Jetz müesse se Höiser bau, Familie gründ und für ihr Kinner doa sei. Des is ganz normal. Ower sie höm uns viel Spoass gemoachd üwer die lezde Joahre und es woar a Fräd, dass mer zugugg höm döff, jedes Joahr o die Fosenoachd. Ich hätt selwer a sou garn midgedanzd, ower mei Karriere is ja scho seit Joahrzende ferdich. Doamols hatte mir blos des Düdü-Niveau und es woar mehr au Gaudi. Ich bin mir sicher, es find sich wieder e noie Gruppe vo Buewe, die vo Vuerne ofange und auf die Erfahrung vo die HellsÖwer aufbaue. Noach a poar Joahr Draining könne se woarscheinlich a ganz vuerne auf e Durnier middanz.

Des woar also nit blos hormonell a fruchdboarer Owed, sondern a im Ergebnis. Und ich bin sicher, dass e Kind, wu in dare hormongeschwängerde Noachd gezoichd woarn is, mit Sicherheid amoal im Männerballedd danzd. Moachds gued ihr HellsÖwer und noch amoal vielen Dang an Euch und die ganz Gru und Schaboo.

Fao 230408 A. Friedrich

Retzboacher Bledzli

Des wolld ich ihm nou mit uf en Waach gab – e orichinal frisch gebaggds Retsboacher Bledzla. Und die folchende Agdion is a blos mit genau sou e Bledzla gange. Mit kä annersch Gebäg hätt mer des Lawe vo mein Doud sou gued beschreib könn.

Grod is er beerdichd wuern und die Loit sen doanoach a gleich zum Dröasdln nein Pfoarrsool, weils daus nou ziemlich kaald woar. Und genau jetz kumme die Bledzli nein Spiel und des woar a goar nit sou geploand. Mei Doud, dar wu gschdurwe woar, is en groaße Tääl vo sein Lawe Wallfoahrtsführer bei dare Wallfoahrt noach Redzboach gewaasd. Ich koann mich nou erinner, dass ich als Kind ümmer drauf gewoard hob, dass die Wallfoahrer zurück kumme und ich e poar vo dare Bledzli griech. Des woar wie e Dauschgschäfd, weil wenn du dare Walleud Empfangsblümlich gawe hoast, dann höm die sich gfrähd und du hoast a Bledzla griechd. Die Muetter hoat vo frische Blume sou ganz klänne Stroislich gebunne und mit dare höm mir uns o die Stroaß higestelld. Wenn jetz dar Zuuch kumme is, und du hoast jemand vo die Verwandtschoafd gekennd, biste schnell higelaffe und hoast dei Stroisla gäiche Bledzli eigetauschd. Ich hobs ümmer kaum erwoard könn, nei sou a Bledzla zu beisse und daswache hob ich scho dare örschde Loit ganz vurne in dare Brozession mei Blume gawe, ob ich se gekennd hob oder nit. Damit ich mehr Bledzli zomgriech, hob ich die Stroisli vo die Muetter noch amoal getäld, quasi verdobbeld und hat sou om End a mehr Bledzli ogsammld. Dare Walleud woar des egal ob in dann Stroisla drei oder fünef Blume woarn. Es is a scho vürkumme, dass die Loit, dare wu ich die Blume gawe hatt, goar kä Bledzli hatte. Zu dare hob ich dann gsocht: „Ach ich sollt ja die Blümli en Ongl gab“ und hob dare dann des zomgeruepfde Stroisla a wieder waggenumme. Dar Gschmoog vo die Bledzli woar ümmer gleich, vo Joahr zu Joahr darselwe und a blos die orichinale Wallfoahrts-Bledzli höm noach Retzboach gschmeggd, weil des Rezebd doafür woar und is geheim – und sou konnd des a kä Mönsch noachgebag.

Sou und jetz woar die Beerdichung vom Doud und doa woarn guede Bekannde vo ihm vo Retzboach doa und die höm wieder die Bledzli dabei gehoot und höm die ach o unnerm Düüsch ausgetäld. Die höm nit ner geroache wie früher, die höm a gschmeggd wie früher. Nei des änne hob ich gleich gebisse und des annere hob ich in e Serviedde eigewiggeld und aufgehouwe und hob mich innerlich gefräechd, ob dar Doud, wenn ar a jetz im Groob liechd, nit vielleichd Hunger hoat und sich üwer a Wechzehrung für sei letzte Reise fräh täd. Känner wäss ja genau wie des doa zugähet beim Üwergang ins Himmelreich und daswache höm die Loit a früher scho ihrer Versturwene wos zu Esse mit auf die Reise gawe, falls die doch nou Hunger grieche.

Die Gsellschoafd im Pfoarrsoal woar rüm und ella höm sich, wie ich a, auf en Waach häm gemoachd. Es Bledzla woar nawe mir uff en Siedz gelache und hoat geroache und geroache und ich hob dabei o mein Doud gedoachd. Doa hob ich äfoch om Friedhof noch amoal oagehalde. Es woar scho ziemlich dungl, ower des Groob hob ich gleich wieder gfunne. Es woar jetz scho wieder aufgfülld und obgedeggd und die Schole und Grenz woarn, schüe arrangschierd, ouwe drauf gelaache. Doa hob ich des Bledzla ausgwiggeld und hobs unter sou en Granz gschouwe, ower ganz nunt, nit dass om nächsde Dooch nou jemand vorbeikümmd und – wenns nou doa wär – wieder rauszerrd. Auf die Schläfe vo dann Graanz woar gstanne: “Ruhe in Frieden“. Und ich hob gedoachd: „Und loass es dir a in Friedn schmegg, Doud“. Ich bin mir sicher ar hoad sich soufurd o dann Geruch erinnerd, weil, wie ich grod fuerdlaff wolld, doa män ich hob ich ganz leis gehöard: „Ich dank dir schüe dafüer“. Ich hob mich nit derschroagge, weil ich mir scho gedoachd hob, dass dar des säichd, wie ersch hald ümmer gemoachd hoat.

Om nächste Dooch hat ich kä Zeid mehr, zu kondrolliern, ob des Bledza jetz gesse woar oder nit. Des wüerd quasi als Geheimnis mit nein Groob genumme, genauso wie des Rezebd vo die Bledzli aus Retzboach, wos ja bis hoid a Geheimnis is.

Sou sen hald moanche Erinnerunge unauslöschlich in uns dinn, quasi bis in alle Ewichkeid.

fao230305 Albin Friedrich

Vom Krawellessbaam zu di Lämmerlöcher

Schüe woar die Sichd vo unnerm Haus aus noach Wesdn wu die Sunn unnergange is, om Krawellesbaam vorbei bis zu die Lämmerlöcher om Waldrand. Jetz stiehn e Haufe noie Hoiser midde in unnerm Ausgugg und dar Blig gähet när no bis zur Hoiserwand und höchstns e bissle dro vorbei. Es hat scho en Vordeil gehot, wenn mir doamols es örschte Haus woarn, wenn de vo Graßeld kumme bist, oder vo die annere Seite es letzte Haus. Dar Krawellesbaam woar a richtiche Markierung in dara Landschoft, sou wie o die Küste vielleicht e Loichtdurm und is än soufurd nei die Aache gstoche. Dar Baam woar nit grood gewoasse, richtich graxelich und hoat ower, im Gäichetääl zu annere Bömm, bis hoit üwerlaad. Wuhar dar Noame „Krawellesbaam“ künnt, wäs känner. Ower mei Doud määnd es künnt doahaar, weil die Öbfl vo dan Bamm oarch klää woarn, also klänne Krawelich. Dar Baam woar ugfahr in dara Midde vom Waach, wenn du vo dahäm zu die Lämmerlöcher gelaffe oder mit em Foahrrood gfoarn bist. Er woar quasi des Ordsschild Richtung Fuschd.

Für uns Kinner woarn die Lämmerlöcher e Baradies, weil duard hoast du moanchmol Zoich gfunne aus dar frühere Zeid und du konnst dir schüene Gschichte doazu ausgedenk. Die Lämmerlöcher sen woarscheinlich entstanne, weil früher doa dar Lämme obgebaud woarn is, und dar is gebrauchd woarn, um Ziechl zu moache oder Bagsdää für die Hoiser zum Baun. Doazu ist dar Lämme gfoarmd und dann nei die Sun geläicht woarn zum Drugln, bis er hoard woar. Sou, jetz hoat mer mit die Zeid e mueds Louch gehoot und doa höm die Loit ogfangd und höm doa ihrn Müll neigewuerfe, egal, alles wos nix mer gebrauchd woarn is. Des hoat sou lang gedauert, bis schoa e klänner Hüchl uff dann Loach woar, und dann hoat dar Bürchermäsdr woarscheinlich gsochd: „Jetzt langds mit dann Draag donei“. No hömse e bissle Erde draufgemoacht und Bömli ogepflanzt. Ich däd hoid garn amol duert rümrüess und amol saa, wos doa nou sou zum Vürschein kümmd. Ower der Doud säichd, moach des blos nit, weil du wässd nit.

Für uns Kinner woar des doamoals e wunderboarer Abendoiersbielbladz und mir höm bei unner Schatzsücherei ümmer wos gfunne, wos uns interessierd hoat. Alde Autoräff, verruesde Dose wu nou wos dinn woar, kapude Hoolzkisde mit sustwos, läre Floasche und sougoar Modörli, die irchendwos ogedriewe höm. Mir höm a noach Woaffe aus em Kriech geguggd, weil mer koan sich vürstell, dass sou moanches Gewehr in ähnliche Löcher neigschmisse woarn ist, wie dar Kriech ferdich woar; ower doa höm mir nie wos gfunne. Toade Viecher sen ja früher a irchendwu hikumme, ower nit nei di Lämmerlöcher. Doafür hoats die Molzegruewe gawe, die woar Richtung Mochlshause rachts dinn gelaache und doa sen die Kadawer neiverschoarrd wuern. Ob die Molzegruewe e natürlichs Louch woar, oder ob doa in früherer Zeid amol wos obgebaud wuern is, des wäs ich net.

Amoal hob ich en alte Bulldogräf mit häm genumme. Erscht hoat dar Voadder gschennd, ower dann höm mir dann Räf zom aufgebumbd, noach die Löcher geguggd und zwä Fligge draufgemoachd. Ich wollt doamit im Säa schwömm. Dahäm woar dar Räf nou voul mit Luft. Bis ich om Säe woar, hatt sich die Luft scho wieder in Luft aufgelöasd. No bin ich höm, mit höm wieder aufgebumbt und ich bin wie a Wiesl ganz schnell bis zum Säe gerennd. Ower die Luft woar wieder schneller und mir woar dann kloar, dass ja a känner en guede Räf fuerdgschmisse hätt. Sou hoats früher in jedem Duerf sou Löcher gawe, wu mer elles neischmeis konnt. Ower mer hoat a gewüsst, dass dar Müll ümmer mehr wüerd und irchendwann is es Louch voul. Des hoat mer mit die ächene Aache gsahn und mer hätt sich vielleicht eher überläch söll, wos mit dann Zoich passierd, wos mer wagschmeisd und nix mer brauchd.

Hoid is des annerschd. Doa brauche mir uns kä Gedanke mer zu moache, weil, egal wieviel mir wagschmeise, mit tuen des nei dare oder nei dare Donne. Und des wüerd rechlmässich obgehould, egal wieviel des is und mir moache uns üwerhaubd kä Gedange mer. Ja gloar, unner Koubf fungtionierd blos nou bis zu die ächene Mülldonne.

Ower ich deng ümmer nou o die Lämmerlöcher und wäs net, ob des Sysdem hoidzudooch besser is, wenn unner Blastig dann wieder irchendewuu in Afriga oder im Meer aufdauchd und geloacherd würd. Besser wärsch doch wirglich, mir täde nix mer sou viel Müll broduzier.

Und dar Krawellesbaam wäss des und hoat jede Fuhr Müll mitgriechd, die wu früher moal nei die Löcher gekibbd wuern is. Wenn dar erzäihl könnd.

FAO221229 Albin Friedrich

Dannenoadldabledde

Des is e schwers Wuerd zum Laase und die Wenichsde wern gleich draufkumme wos es is, ower es ergibd sich späder. Daswache höert nit gleich auf zum Noachdenke. Des Dema kümmt jetz auf, weils halt o Weihnoachde ähnlich riecht durch die Chrisböm, die entweder Dennlich oder Fichdlich sen. Es hoat scho wos mit dare Nöadelich zu tuen und es gähet um früher bei uns dahäm und zwoar üm die Somsdich.

O die Somdoche woar bei uns ümmer ugfahr der gleiche Ablauf. Früh is gschafft wuern und es hoat verschiedene Arbeitsbereiche gawe. Der Houf is sauwer gemoacht wuern, die Soi sen ausgemist und frisch gsträht wuern, dar Mist is mit die Rodboahn nauf en Agger uff en Haufe kumme, es Holz fürs Foier is neigetroche und nei die Kiste unter em Oufe geläicht wuern und die Schuh sen gebutzd wuern.

Die Mädli höm im Haus gschafft, saubergemoacht und gebüchld. Noach em Mittochesse hömer die Schuh budz müess. Änner hoat dan Draag ro gegradzd, die annere hoat die Creme mit e Bürschdla draufgschmierd und dar oder die Nächsde hoat mit e wäche Bürschde nou bolierd und die Schuh nein Schrengla gstabld. Zum Glück hoats früher nou nit sou viel Schuh gawe wie hoitzudoch. Ower mir höm die Arwed guet gschafft, weil mir woarn scho e Herd vo Kinner. Nou 6 Gschwisder zu höm hoat bei dare Arwed en Vorteil gehot. Beim Esse und beim Bode am Somsdich woar des dann ower e Noachteil.

Gebod wuern is ümmer om Somsdich Oweds. Ofangs hatte mir nou die verzingde Blachwanne die vo die Seite aussieht wie e Soarch dafür genumme. Im Summer woarsch äfocher. Doa is die naus en Houf gstellt wuern und du bist mit em Schlauch sauwer gemoacht wuern. Im Winter hoat sich die ganze Sache in der Küche obgspielt. Jetzt hömer des Holz gebraucht, üm des Wasser im Sterilisierhofe hääs zu moache und dar Rest is aus em Schiffle gehoult wuern. Des is sou e Wasserbehälder nawe en Roahr in dare alte Öüfe din, wu des Wasser ümmer woarm woar. Des woarme Wasser is nei die Blaachwanne gekippt wuern, die jetz mitte in dare Küche gstanne is. Daswache in der Küche, weil des woar der änziche woarme Raum und es woarme Wasser woar halt doa. Mit jedem Schöbfer wu nei die Wanne kumme is hoats mehr gedampft, sou dass des Wasser o die Schoiwe nogelaffe is. Dar oder die Örschte, die im Wasser woar, hat die Aufgabe gehot, die grüene Dannenoadldabledde im Wasser aufzulöase. Die Dabledde woar verpoaggt in sou e Blasdighülle und hoat gsprudeld wie Friggo wenn se neis Wasser kumme is. Und soufurt woar e Dufd wie im Dannewald in dare Küche und des Wasser hoat e grüenliche Foarb ogenumme. Ich gläb die Dabeldde hoats in jedem Haushalt gawe, weil jeder des genausou gemoacht hoat.

Beim Bode hoats e bestimmte Reihenfolge gawe und mästens is es noach die Gröaß gange, also noach em Alter. Lang koont mer ower a nit im Wasser geblei, weil die Klännere scho gewoart höm und a nei wollte. Doa woar ümmer a muerds Lautstärke, weil alle zom in dare Küche woarn. Die Gröaßere höm scho die Klänere gleich mit neigriecht und dann woarn die wenichstens scho amoal fertich gewöscht. Es is kloar, wenn Kinner in der Wanne sen, mäicht des Spoass und mer konn a nit ümmer ruhich geblei. Es wird geplanschd und gsprüdzd und dar Boude in dare Küche woar richtich noos, dass die Muetter doanoach gleich die ganze Küche aufgewösch konnt. Sou höm nit ner mir, sondern a dar Boude en gleiche Gschmoog gehoot und mer hoat des a nou om nächste Dooch geroache. Noach em Bode is es gleich neis Bed gange und die groaße Kinner muesste düwe in der Schloafstuwe die Schloafonzüch houl. Des woar nit äfoch, quasi a Mudprobe, weil mir muesste durch en dunkle Gang gieh wu kä Licht woar. Also schnell nü, die Tür auf, die Kläder gepoackt und schnell wieder zurück. Mir hatte e bissle Angst vor dann schwoarze Moo der ongeblich bei uns im Haus ümmer amoal woar und die Kinner, die nit broav woarn, mitgenumme hoat. Sou hoat mer uns früher richtich Angst gemoacht und a poar moal bin ich a die Kallerschtröbbe nogsperrt wuern. Doa woarsch a dodal dungl un mer woar uf dare Dröbbe gsasse und hoat gewoart, dass die kalte Haand vo dan schwoarze Mo dich jetz poackt und er nawe dir plötzlich ausschnauft. Also biste ganz ruhich do gsasse, hoast geluerd, es Herzle hoat gebumbd wie verrüggd und du hoast gewoard bis die Stroaf vorbei woar. Beim örschte Moal hattste nou viel Angst, beim näxte Moal ower nix mer sou viel, weil ja nie wos passiert woar. Woarscheinlich hatt dar schowarze Mo a zu viel zu tuen, weil er a in annere Höiser im Kaaleer gewoahnt hoat. Später hob ich mich freiwillich nein Kaaler gsetzt, wenn ich wos ogstellt hat, doa hat ich mei Ruh.

Ja, sou hatte die Somsdich ihrn Ablauf, und noach dann woarme Bod höm mir ella gued gschlaffe und vo die Dannennoadlwälder geträmd. Jetzt gibds die Dabledde gläb ich nix mer sou, ower wenn e Duschgel noch Dannennoadl riechd, denk ich o früher, weil soate Gschmägger und Düfd senn unauslöschlich.

Guet, ich möücht ower a nix mer ubedingd in sou e Blaachwanne gebod. Die Zeide sen vorbei.

FAO230112

Es is e Stück vo die Kindheit. Die Erinnerung o Weihnoachte und o die Gfühle, die mer dobei hoat. Und jetz grod kümmts wieder mit dare Gfühle, weils ja do drauf zugähet. Vor allem für uns Kinner woar ja die Gribbe mit ihre Figure wos, wos die Fandasie enorm beflüchlt hoat. Jeder kennt die Figure noachenanner: Maria mit ihrm Josef und dem Jesuskindla, die häliche Drei Könich aus dem Morchenland, dann Ox und dann Äisl im Schdool dinn und dann hoats a nou Hirde om Foier gawe mit ihrer Schoafherde und irchendwu üwer des Ganze is dar Stern vo Bedlehem gschwebd. Die Gribbe bei uns dahäm und die Figure sen blos o Weihnochte rauskumme, aus ihrer mit Baumwolle ausgeläichder Schoachdl, mästens sougoar erscht om Häliche Owed früh und doa hattste nit viel Zeid mit dare Figure zu spiele. Sie hatte scho wos ehrfürchtiches und du hoast se a blos vorsichtich ogelangd. Unnerm Voader woarsch wichtich, dass mir e Gribbe aus Holz hatte, die mir dann selwer aufgebaud höm und die Figure woarn aus echtem Holz gschnidzd. Gribbefigure zu käfffe woar früher nit billich und obwohl mir wirglich wenich Geld hatte, is jedes Joahr e noie Figur gekäfft und dozugstellt wuern. Des hässt, die Gribbe woar a nie vollständich, ower mir Kinner höm alle Viecher, die mir zum Spiele hatte, äfoch dozu gstellt und es woar gued sou. Hoat ja eh känner genau gewüsst, obs in Bedhlehem nit a Schildkröude, Löawe, Dinosauriere und Zebras gawe hoat.

Sou hoat die Gribbe ümmer die Fandasie stoark beflüchld und uns in die weide Weld mit naus genumme. A in der Kirch vo Wasserloase hoats a ümmer e schüene Gribbe gawe. Es woar e groaßer Stool aus Äst mit e Dooch aus Rinde und viel Moos. Vor der Gribbe woar e Waach mit Saand, wu die Drei Könich mit ihr Kameele gelaffe sen und weider vuerne woarn Hirde mit e ganze Schoafherd. Die Maria hoat orch müdderlich geguggt und woar ümmer e weng vur em Josef gstanne und ella zwä hömse auf des Jesuskindle nogebliggt, damits dann a gued gähet. Ich hob mir a gewünschd, dass ich ämoal doa dinn liech döff, im woarme Sdool wuus schüe kuschelich is und Loit mit Gschenge vorbeikumme. Die ganze Fläche vo die Gribbe woarn ugfahr 2 Quadroadmeder groaß und des woar scho e schüene groaße Fläche.

Ä Figur ower woar doa in dare Kirchegribbe, die hatte mir nit dahäm. Des woar es Gnaugerle. Wenn de nit wässt wos des is, dann erklär ich des amoal. Es Gnaugerle is a Mönschefigur, die doa sitzt, en Kuerb aufhält und wenn du in dann Schlitz, dar wu im Kuerb is, e Geldstück neischmeist, dann fengt die Figur o zu Gnauge oder auf Hochdeutsch zu Nicken. Ich hob mir doamols überhaupt kä Gedange gemoacht, worum des Gnaugerle e schwoarze Haudfoarb hoat und ächendlich in dare Position wie e Beddler woar. Und ella Gnaugerli in annere Gribbe, die wu ich je gsahn hob, woarn ümmer in dare Position und hatte e schwoarze Haudfoarb. Hoit kenn ich mehr vo dare Zusammehänge in der Weld und wäss, dass es üweroll Gnaugerli geit, mit helle und mit dungle Haudfoarb. Ower als Kind siehest du des Bild sou wies doa is, die schüene Landschofd, die Musig, die „Ihr Kinderlein kommet“ spielt und des Wasserrood wu Wasser drü lääfd und Elles schüe beloichd is mit bunde Lichderkedde. Jedesmoal wenn du dann Gnaugerle Geld neigschmisse hoast, is es Licht ogange und die Musig hoat gspielt und des Wasser is gelaffe. Es woar die schönste Gribbe vo die Welt und sie woar sou lebendich, dass de sougor dann Weihrauch vo die Drei Könich geroache hoast, obwohl die Roicherkuchl goar nit gebrönnt hoat.

Ich woar lang nix mer o Weihnoachte in Wasserloase in die Kirch und wäss grod nit, obs überhaupt nou e Gribbe oder obs genau die Gribbe nou gait. Vielleicht is es jetz e moderne Gribbe, wu aus China kümmt und dir nix mer des gait, wos es dir in die Kindheit gawe hoat. Hoitzudooch wüerd ja alles hinterfräecht und die Einstellung zu die Kirch is bei viele Loit annerscht wuern. Doa is, möücht ich sooch, die Kirch a selwer schuld und des ganze moderne Lawe, des uns ümmer weiter nausführt nei die Welt. Es wäss ja känner mehr richtich, wie e selwergemoachte Gribbe dahäm im Duerf is und wie die o Weihnoachte zu änn räid konn.

Mich hoats als Kind ümmer gfräht, dass dar Josef und die Maria und des Christkind en Unterschlupf für die Noacht gfunne hömm und des Gnaugerle es Licht ogemoacht hoat, egal ob du 1 Pfennich oder 1 Moarg neigschmisse hoast. Sou unbeschwert konn mer hoit nix mer denk und egal wieviel änns gnaugt, die Welt is voul mit Probleme und wie viele Mönsche gaits grod jetzt o Weihnoachte, die sich fräh däde, wenn se en Sdool hätte zum Schloafe und e Kuh die wu Milich gait. Wenn du über des Elles zu oarch noachdengst, vergähet dir des weihnoachtliche Denge und du mäichst dir eher Surche wie des weitergähet und vor allem, wie des amoal end söll. Mir is a nou kä Lösung eigfalle außer: Du koannst dich auf nix mehr verloass und mästens künns annerscht, wie mer sich des dengt.

Doa wünsch ich mir des Gnaugerle zurück. Nit weil des e dunkle Hautfoarb hat und oarm woar, ower weil des es Licht in dare Gribbe ogemoacht und schüene Gfühle gemoacht hoat. Des woarn e poar Minute zum Obschalte und zum Eidauche in des Weihnoachtsgfühl. Vielleicht gaits a sou e allgemeines Gnaugerle, wu bei die Mönsche des Licht im Koupf und des guete Gfühl ostell koann, dass es wenchstens o Weihnoachte e bissle menschlich zugähet.

Ja, eidauch in des Weihnoachte und des a genies und dann irchendwie en Neuofang im nächste Joahr schaff. Es is viel verlangd, ower jetz wässte Bescheid, du Gnaugerle. Tue dei Besdes.

Fao221204