Es is hald die drüewe Joahreszeid und grod jedz, wus daus kaald und nawlich is. hob ichs beim Vorbeifoahrn gsahn. Es brönne dinn Kierze und soufuerd hoad mer a Gfühl vo Behaglichkeid in sich dinn und es wüerd än wöärmer. Ob des dar Sinn vo die Grodde is, sou e boar gschüdzde Quadroadmeder? Und vielleichd is wirglich amoal änns auf sou e woarmes Räumle  ogewiese, wenn ar selwer e schwäare Zeid hoad

Die Grodde schdähed außerhalb vom Duerf Richdung Sulzl, hinne blos aweng gschüdzd durch dan uralde Ächebaam und e boar Hegge. Ower die alde Äche hoad mid sich selwer zu duen und sou is des Gemoier dan Wadder, des määsd vom Wesde kümmd, scho ziemlich ausgelieferd. Jedz, wu se noi renovierd is, määnd mer fasd sie frähd sich auf alle Joahreszeide – und die Loid kumme vorbei zum Ausruhn oder zum Baade. Wenn dar Wind durch die Äche schdreichd, hoad mer des Gfühl sie flüsderd dir zu: „kumm har, sedz dich e weng inne nei oder auße auf die Baank, ruh dich e bissle aus und loas loos, egal mid wos du harkumme bisd“. Sie will ja ihrn Zwegg erfüll und sie is ja früher gebaud woarn als Daank für die Genesung und vielleichd a für souwos wie e Wunder.

Ich kenn se seid meiner Kindhääd, doabei is die nou viel elder und hoad a wirglich e ächene Gschichde hinnedroa. In dara Chronig is erwähnd, das doa amoal zwä Ächebaame gschdanne sen und dass duerd a en Schdääbruch woar. Vo die Bömm schdähed nou änner, mächdich und aald, ower a die eldere Loid, wu ich gfrähechd hob, wüsse nix mer vo en Schdääbruch. Allerdings woar dar Bladz gued gewähld und schdroahld a hoid nou sou e Oard vo Ruh und Vollkommenheid aus, dass mer sich, a wenn mer blos en Schbaziergang mäichd, garn amoal en Momend auf die Baank sedzd und sich besinnd. Sie hoad scho üwer hunnerdfufzich Joahr auf en Buggl und in dare kadholische Dradidion wüerd die Grodde a „Lourdeskabelle“ genannd, weil mer des mid Wunder und Genesung verbind. Doamoals hoad die Bäuerin Katharina Weithmann om Ende vom 19. Joahrhunnerd e Gelübde gemoachd, dass se e Grodde bau löassd, wenn ihr schwär granger Moo wieder gsund wüerd. Dar is woahrscheinlich im Deudsch-Französische Griech 1870/71 verledzd woarn und grank hämkumme. Wie er noacher wieder genese woar, is die Grodde im Joahr 1880 vom doamoaliche Pfoarrer Michael Ankenbrand eigeweid woarn.

Doafür sen a gusseiserne Schdadue vo die Mueddergoddes und vo die Häliche Bernadedde aus Würzburch ogschaffd wuern. Die sen ower seid em Ümbau 1959 verschwunde. Dar Kablan Ring hoad dan Ümbau organisierd und dar Würzburcher Dombaumäsder Hans Schädel hoad die Blän doazu gemoachd. Dar Grundriss is gleichgebliewe, blos jedz is e Vorbau gemoachd und des Dooch is als Schudz drügezouche wuern. Des Fresgo o di Hinnerwand is vo dan Schweiferder Künsdler Gusdl Kirchner gschdalded woarn und die Mueddergoddesfigur mid Kind hoad e Künsdler aus Bergtheim, dar Karl Hornung, aus grüene Sandschdää erschaffe. Sou is e idyllischer Uerd zum Ausruhn und für Gebede endschdanne und ofd genuedzd woarn in dara Dradidion vo e Lourdeskabelle, dass mer duerd higange is, wenn äns vo die Familie zum Beisbiel e schwäre Grankheid gehood hoad. A die Würzburcher Wallfoahrer, uff em Waach zum Kroizberch, moache duerd jedes Joahr en Hald und e glänne Bausenverbfleechung.

Es hoad ümmer Loid gawe die sich e bissle üm dan Uerd gekümmerd und ne erhalde höm: Beim Ümbau 1959, in die 90er Joahr und jedz woar e Renovierung wieder bidder noadwendich. Die gekalchde Wänd inne dinn hadde en Beloach, die Düer wor nixmer gued, des Fresgo o die hinnere Wand konnd mer nix mer endziffern – es muessd wos gemoachd war.

Die Lummels Brichide woar seid ihrer Kindhäd scho mid dare Grodde verwurzeld, weil se mid der Familie jedn Sunddich Owed zur Grodde gange is. Die hoad 2019 mit Ihrer Grubbe vo Noachber und Bekannde oagfange Geld zu sammeln und Blän zu moache, wos elles renovierd war muess. Mer hoad oagfange zu schdreiche, dann is Corona doazwische kumme und doanoach  hoad die Brichide und ihr Moa dar Maddin jedes Joahr in dare Sunneschdroass e Fesdle gemoachd und en Erlös für die Renovierung vo die Grodde verwend. Es is e schüene Summe zoammkumme und in dan Joahr 2025 is es richdich losgange. Wie ich im Summer duerd woar, hoad die Grodde nou jämmerlich ausgsahn. Außerüm woar aufgegrowe, des Fresgo woar oabgegradzd, ower die noie schwäre Einflücheldüuer woar scho dinn. Inne woar die Sidzbaank aus dungles Hoolz, vuerne die Mueddergoddes mit Kind uff en Schdääsoggl mit Aldoardüüsch und o die Seide oagebroachde Kirzeschdänder und lings dovoa, e wunderschüener, gschmiededer, eiserner Kirzeschdänder vom Karlheinz mit Blume und Kirzehalder. E harmonischer in sich schdimmicher Raum für e kuerze Oandoachd. Nid zu vergesse dar Weihwasserkessel rachds o die Wand, vo dan mir früher ümmer gedrunge höm. In die schwäre noie Düer is scho viel gsammlds Geld vo die Brichide und a e Spende vo die Würzburcher Wallfoahrer mit neigfloasse.

Inzwüsche is die Arwed weider gange und ziemlich ferdich. Auße rüm is jedz e Schbrüdzschudz aus Kiesl, die Wänd sen weiß gschdriche und die glänne Vorhalle siehed jedz äfoach freundlich aus. O die Wand, wo früher des Fresgo woar, hengd jedz middich e Holzgreuz mid e Kubferdächle und es schdähed doa a e weiße Baank, eigfassd vo e Küblbflanze und en Halder für Räwadderschirme. Doa möüchd mer sich wirglich garn amoal hisedz, vielleichd bis zu die nächsde Renovierung in 50 Joahr.

Die Grodde gehöard zu Wasserloase, is für Moanche a ganz wichdicher Uerd und jeder muess auf die aufboass und hölf, nid ner die, die wu jedz groad mid ihrer ganze Enerchie und Körberkroafd und mid Geld doafür gsuerchd höm, dass des Kleinod für uns erhalde wüerd. Daswache en groaße Daank o die Loid, die wu seid Oanbeginn, üwer die Joahrhunerde bis hoidzudooch, doadrauf aufboasse, schaffe und hölfe. Des is a wieder a gueds Beischbiel für des, wos e Duerf ausmäichd – es wüerd zoamgeholfe  und annerschd, wie ofd in der Bolidig, koann mer sooch: Mir schaffe des. Grod o Weihnoachde, wu die Herze e bissle wächer sen.

AFriedrich OT, 08.12.2025

Normalerweise will mer, dass es o Weinoachde schö is, dass kä Schdreid is, dass blos Familie und kä frömme Loid doa sen und elles friedlich oablöaffd. Mir sen doa in unner Familie e bissle anerschd, mäsdens höm mir Gäasde vo annere Kuldure und Länder und grod solche Mönsche, die susd vielleichd allää wärn o die häliche Dooch.

Kurz vor em häliche Oawed hadde mir en Sidzbloan für en Weihnoachsdüüsch scho ferdich, ower mei Fraa hoad gsochd: jedz gia doch amoal los, vielleichd findsde noa än wu nid underkumme is. Also bin ich los und hob geguggd, bin üm die Kurve gebouche und scho hob ich en gsahn. Jesus Maria, hoad dar e Gnolle om Fueß gehood,  wie e Gschwulsd. Ar woar a nid übbich, dass mer gsoch könnd ar siehd gsund aus, sondern ar woar äher e Schbirg und is vom Fueß noach ouwe ümmer dünner wuern. Mid dan hoads die Nadur nid sou geud gemähnd. A die Foarb woer äher blass und ar woar uf die Seide o die Waand gelahnd. Es hadd e weng Schnie gemoachd und sou woar die änne Seide mit en leichde Schniepuder überzouche. Genau sou en wolld ich in dan Joahr, dar däd boass zu unner Weihnoachdsgsellschoafd. Sou en übrichgebliewene, damid mer siehed, dass es nid blos guedaussehende formvollendede gaid. Mir wursch rachd und ich hob ne a nou billicher griechd. Doahäm hob ich oerschd amoal sein Fueß begroadichd, die Gnolle schirurgisch mid die Saache endfernd und dann is er nein Schdänder kumme. Und wos söll ich sooch? Wie er noacher sou in die Egge gschdanne is, wuer dar wie gemoachd doafür. Und kaum woar er aufrechd, hoad mer gemähnd ar schdreggd und endfalded sich, als wenn ar sich frääd, dass er nou e Schduwe gfunne hoad und jedz sei Äsdlich noch ouwe gschdregg koann. Die Kinner hadde e Frääd, dass se jedz die Kuchl hiheng gedöffd höm und dess Lamedda wos nou doa woar und zwä Reihe LED-Kierze für die Beleuchdung. Ganz unscheinboar hoad sich under die diefsde Äsd nou die Gribbe nundgschmiechd und hoad ower Bladz geloasse für die viele Gschenglesbäggli, die wu schbäder nou doazukumme sen. Es woarn über die Feierdooche moacher einiche Loid doa und elle hömse gsochd, es wär doch e schöns Bömle, sou wies doa schdähed. Blos weil mir dan a Schangse gawe und oberierd und hargerichd höm. Des sölld mer im richdiche Lawe a öfdersch risgier, nid blos mid Grisbömm.

Die Feierdooche es Noijoahr und Dreikönich sen vergange und des is gewöhnlich die Zeid, wu mer sich a widder drennd voenanner. Unner Dennle hoad sich gued gehalde und blos wenich genoadld, ower mer hoad gemirgd es gähed uf sei End zu. Nou nid om Schdamm selwer, ower auße o die Schbidze vo die Äsdlich hoad mer scho gsahn, dass die sich noach unde bieche und nix mer die Groafd höm für e enerchische Schdregung. Mei Fraa hoad mir aufgedrooche, dass ich des Bömle widder naus due sölld und sou hob ichs aus en Schdänder raus und äfoach aus em Fensder no nein Houf gschmisse. Ar is mi dem Fueß unde aufkumme und des hoad ne richdich durchgschüüdld. No isser langsoam zur Seide gekibbd und woar ugfahr sou doagelaache wie ich ne gfunne hadd. Blos jedz had ich scho wie e Beziehung zu dan Baam und ich hob gemähnd, dass dar mich fasd e weng draurich und vorwurfsvoll oaguggd. Daswache hob ich beschloasse, dass ich ne öerschd nou  sou loass. Und vielleichd, wenns dungl is und ar nid doa droa dengd, moach ich die Äsdlich roo und saach sei Schdömmle zoam. Wenn dar dann ausgedruggeld is, noa drooch ich ne wieder schdügglesweis nauf nei die Schduwe und due des Holz nein Hoolzkoasde. Irchendwann wüerd er dann verschüerd, ower ar hoad sein Greislauf gemoachd und sei Grisbbaamseele gähed durch en Kamin naus nei die Weld und find vielleichd wieder en junge Drieb wus se neigähed und dann als wunderschöne Weihnoachdsdanne aufwächsd und wieder zum Grisdbaam wüerd. Ich däd ne wieder nam sou wie er is – a wenn er widder a grumme Gnolle oam Fueß griechd.

AlbinFriedrichOT, 20.1.25

Die moderne Hoiser höm zum Heize hoid scho die Wärmebumbe, Öülheizung oder Belledsheizung und brauche vielleichd grod nou fürn Kachloufe des Hoolz vom Wald oder wenn se en alde Oufe in die Küche höm zum Koache. Früher hoads blos des gawe. Mer hadd en ganze Winder für die Wierm und zum Koache blos des Hoolz. Mir höm bei uns nou Wälder und es wöachsd genuch Hoolz noach, sou dass mer des houl und verschür koann. Ja nid äfoach houl, des muess a gemoachd war. Doa föahrschde Früh mid dein Bulldog naus, hoasd a Modorsaache, e Beil und e Brodzeid doabei und oaweds gäheds hämwärds mid e boar Schdär Hoolz uf en Ohänger. Endweder hoasd de a Loos genumme und muessd doa aufrämm und die Äsdli rausschneid. Oder es sidzd scho ferdich als Schdärhoolz nawe die Schdroass und du muessd des blos auflood. Doahäm wüerd des in lange Oarge auf dan zugewiesene Hoolzbladz außerhalb vom Duerf aufgsedzd und muess die näxde zwä Joahr ausdruggl. Wenn de dich auf so en Bladz ümguggsd: doa loachern hunnerde vo Schdär vor sich hi und woarde bis es weider gähed.

Mässdns mirgd mer im Hirwesd, dass des Scheidhoolz für en Winder nid ganz langd und die Hoolzhalle scho sou groasse Lügge hoad. Dann gäheds naus en Hoolzbladz und es Hoolz wüerd in 25 cm Scheidli gsaachd, damid des a gued nein Kücheoufe boassd. Dar Schwiechervoader hoad scho früher en Borschebulldog mid Baujoahr 1960 und doazu a Bandsaache gekäffd und doamid in der ganze Gäiched als Hoolzsaacher für die Loid elles zoamgsaachd. Die Saachbänder sen ofd gerisse, ower ar hadd ümmer Ersadz doabei und konnd schnell wieder a nois Band in die Saache neigschbann. Oeweds sen die kabuddene Bänder in der Wergschdadd zoamgschwässd, gschrängd und gschärfd wuern. In die 90er hoad er sich dann uf en Moargd e Wibbsaache gekäfd, weil des e bissle äfoacher woar. Bei uns in der Familie saachd jedzd dar Schwoacher es Hoolz und hoid woarsch wieder souweid. Mer säichd ja ümer es Hoolz wiermd dreimoal, noa woar hoid dar zwäde Dääl droa. Dar Oahänger is schon auf en Hoolzbladz gfoahrn woarn. Dann is in der Schoier die Saache ogehengd und o die Zabfwelle oagschloasse wuern. Om Hoolzbladz sen die Geräde sou aufgebaud wuern, dass de als Zulanger die Scheidhölzer gued genamm kannsd und dar Saacher die gschniedene Scheidli leichd uff en Wooche gschmeiss konnd. Doa kümmsde schnell ins Schwidze und wenn de eigschbield bisd üwer die Joahre, noa gähed ä Schdäär noch en annere rug zug fuerd. Ich woar scho ümmer der Zulanger und ich hob die Erfoahrung gemoachd, dass des die allerwichdichsde Aufgawe beim Hoolzmoache is und die Schnellichkääd doa nei brengd. Dar Hoolzsaacher muess ja blos die Wibbe noach fuerne drügg und die Saache mäichd en Resd. Vorraussedzung is, dass dar Zulanger, also ich, des Scheidhoolz scho wieder uf en Düüsch hoad, kaum dass die Scheidli fuerdgewuerfe sen. Und nid äfoach die Hölzer draufschmeis. Nä, die müesse sou liech, dass er en öarschde Schnidd noach 25 cm moach koann, ohne dass er no ruggs muess und des Hoolz muess sou gedrähed sei, dass es im Wingl vo die Saache fäisdsidzd und sich nid muggs koann. Jedz muess dar Hoolzsaacher blos nou drügg und des Scheid ümmer weider ruedsch, mehr hoad dar goar nid zu moache. Dar Zulanger, also ich, hoad doamid zusädzlich a e wichdiche Fungdion in der Nadur. Früher hoad mer ja ümmer alds Öül doabei gehood und doamid dann Düüsch vo die Saache eigschmierd, damid des Hoolz besser ruedschd. A broffesioneller Zulanger wie ich, mächd des ower sou exagd, dass de kä Öül brauchsd, weil noch em öarschde Schnidd des Scheid ja leichder zu bewäiche is.

Mei Schwoacher hoad des scheinboar a scho eigsahn, dass der Zulanger sou e wichdiche Fungdion doarstelld, weil ar hoad gsochd:“ Wenn du nid doabei wärschd, wärn mer nou lang nid ferdich“. Also sou hob ich ne verschdanne durch dan Gebobber vo unnern Borschebulldog. Mei Fraa hoad ower oaweds gemähnd ich hob nid richdich gehöard. Er häd nämlich richdich gsochd: „Wenn du nid doabei wärschd wärn mer genausou schnell ferdich gewaasd“. Ja sou e Ignorand! Ich mues noch amoal mid ne geräid, vielleichd koann er des näxde moal allää naus zum Hoolzmoache. No wüerd er scho sahn.

Jedz wärn die Scheidli gleich hämgfoahrn und nei die Hoolzhalle gsedzd. Und aufgsedzd siehd des goar nid noach sou viel aus und wenn elles verschdaud is, koannsd de a e Brodzeid gemoach. Jedz hoasd de scho e boarmoal gschwidzd: beim Hoolzmoache, beim Hämfoahrn, beim Schneide und beim Aufsedze. Ower sou richdich gemüdlich wüerds öerschd, wenn de des Hoolz aus em voule Hoolzkoasde rausniemmds und nein Kacheloufe läichsd, wenns daus kaald is und vielleichd schneierd. Noa griechsd a gemüedliche Wierm nei die Schduwe und en Geruch noch früsches Hoolz. Doamit is dar Hoolzgreislauf oabgeschloasse.

Blos mid meim Schwoacher muess ich, wie gsoochd noch amoal räid.

AlbinFriedrichOT, 28.11.24

Für mich woar des ächendlich scho ümmer gloar: Ich möüchd uff en Land gewoahn, in e Duerf und auf känn Fall lenger wie nöedich in der Schdadd. Wenn mer als e Landkind gebuern is, hoad mer des ja schue in die Gene dinn. Mir Ländler senn vielseidicher als die Schdädder. Mir könne a amoal in die Schdaad, könne des für e gewisse Zeid ausgehald, ower mir wüsse – bei mir woar des sou – heier und mei Kinner groaß war loass, des söll uff en Land bassier. Bei die Schdädder is des ümgedrähed genausou, ower viele vo dare höm Brobleme, wenns se amoal uff en Land senn und könne sich nid doa droa gewöhn. Mer höards ja ofd genuch, wenn se sich aufs Duerf verirre, dass se sich beschwern, wenn die Lufd noach Miisd riechd, wenn dar Göiger vom Noachbr früh schreid oder wenn mer noachds die Kircheglogge sou laud hörd. Doa konn ich blos sooch: ihr könnd ja wieder fuerdgezieh, könnd die Abgase geriech vo die Audos und könnd die ganze Nochd dan Lärm vom Verkehr und die Sirene gehöar. Leis is des nid, ich wäss des, ich hob a boar Joahr in die Haubdschdadd gewoahnd.

E Schdadd hoad a Vordeile, des is ganz gloar. Und moanche müesse ja weche em Schdudium und die Ausbildung doa hi gieh. Mer koann des für e Zeid genies, ower dann gäheds wieder häm. Wie schüe is es, wenn der Noachbr om Soamsdich früh um siewe sein Bulldog oschmeisd, weil er naus zum Holzmoache gieh will. No wässde a, dass es Zeid is zum aufschdiehn. A ächener Wegger is doa üwerflüssich. Doa bisd de nid böas, weil des is e Dääl vom Duerflawe. Es is nirchends aufgschriewe, wos e Duerfgemeinschoafd geleisd koann. Sie is im Hindergrund, ower wenn de se brauchsd, is se doa. Und wenns blos a lange Lädder vom Noachber is, dass de bis nauf die Doochrinn kümmsd, weil de selwer känne hoasd. Du finds ümmer jemand, der des hoad, wos de brauchsd und der dir hölf koann. Ümgedrähed hoasd du wos, wu der annere amoal dringend brauchd. Es is e Gawes und e Nahmes.

Du kennds die Loid vo die Vereine und bisd selwer Midglied. Mer drüffd sich im Vereinsheim, auf em Fussballbladz oder uff die Schdroass oder beim Eikäffe und ümmer wüerd a wos geredd. Mer hoad durch die Vereine, vor allem, wenn mer sich selwer a ongaschierd, a wos in der Freizeid zu duen und vor allem die Kinner sen wag vo die Schdroass und viel sozialisierder. Die könne gelern, dass mer in e Gemeinschoafd a moal noachgah muess. Dass doadurch die Griminalidäd viel niedricher is, des is völlich gloar. Mer boassd äfoach mehr aufenanner auf. Und wenn de amoal in Urlaub wag bisd, noacher giessd hald die Noachbrschoafd dei Zulodbflenzli. Loass amoal in Berlin die Wohnungsdüer unverschloasse oder dein Audoschlüssel im Audo schdegge. Noa wässde, dass über Noachd dann zwä Audos vor die Düer schdiehn. Also: Durfgemeinschoafd is dar groaße Begriff und mer wäss aus viele Schdudie, dass die Mönsche glüglicher sen, die wu in Gemeinschoafde lawe und wos midenanner zoamm moache. Und zoamm moach mänd a die viele Fesdli die mer in die Düerfer feierd. Fosenoachd, Oasderfoier, Sunnwendfoier, Foierwehrfesd, Kinnergoardefesd, Kirwe, Erndedankfeier, Koasdoaniebaamfeier, Säefesd, Blandanz, Musigfesd und die viele Fesdli vo die Vereine. Es gaid ümmer en Grund üm sich zu dröffe und zu Feiern.

Und wos ganz wichdiges, worüms uff en Duerf sou schüe is, des is die Nadur. Du hoasd Ägger und Wälder und Böchlich, du koannsd mit e boar Schridd doahie, due hoasd en Goarde wenn de willsd und koannsd dir Gemües, Zulod, Domade, Bärderles und annere Gewürze ogebaud und wenn de koachsd, diregd früüsch vom Goarde houl. In der Schdadd schdingd die Lufd noach Rues oder Oabgase. Bei uns im Wald is es ruhich. Du höarschd när die Vöüchl wie se fröhlich ihr Lieder singe und doazu des Rausche vo die Bläidder vo die Bömm. Und wenn de dief eischnaufsd, no mirgsd de, dass viel reiner Sauerschdoff doa is. Du finds Schdelle in der Nadur, die sen sou unberührd und einsam und ruhich, dass sich dei Seele in dare Oase wieder erhoul koann.

Ich bin froah, dass die Schdädder des nid sou wüsse, sussd däde se alle kumm und vorbei wärsch mid unnerm Baradies. Mir woar ümmer gloar, dass ich blos vorübergehend in die Schdadd woahn will, dass ich liewer in e Duerf woahn will und dass ich sougoar a Fraa vom Land will, weil die a annerschder sen wie sou feine Schdadddame. Für mich is elles eigedroafe wie ichs mir gewünschd hob. Unner Kinner sen jedz a fuerd, in der Schdadd, damid se wos lanne und wos aussere würd, wie mer säichd. Ower die kumme widder zurügg, änes Dooches, wie ich a. Des liechd hald in die Gene vo die Landkinner.

AFriedrichOT, 28.10.24

Es hoad ach en Vordeil gehood, wenn de im öerschde Haus vom Duerf gewoahnd hoasd. Weil doa konnsde om weidesde gugg. Wenn früh beim Aufschdiehn die Schoiwe oagelaffe wuern, doa hoasde gewüssd, dass es jedz langsoam Hirwesd wüerd. Du föahrschd mid die Handkande o die Schoiwe endlang und digge Wasserdroabfe falle ro uffs Fensderbriid. Ächendlich gehöard scho die Heizung oagemoachd, ower bei uns in die Schloafschduwe hoads früher känn Oufe gawe, höachsdens a Wirmfloasche die mer uns zu dridd gedääld höm.

Ich gugg naus: Jedz felld dei Bligg in die Nadur und du siehesd elles wos die Joahreszeid ausmäichd. Dar Nawl liechd früh nou schwär in digge Balle uff die Ägger vor em Wald und e bissle koann mer scho die Sunn eroahn, die dan dunsdiche Nawl fuerd ho will. Und dar mäichd sich a uf en Waach, verlöassd die rümgeaggerde Ägger, schdeichd langsoam üwer en Wald nauf und löasd sich irchenwu auf. Jedz siehsde a die Foarbe vom Wald, mit roade, gelwe und orangsche Dön in alle Schaddierunge, als wenn die Nadur wieder e Bild moald. Als wenn de en Üwergang zum nächsde Joahr brauchsd, siehst de a scho wieder uf moanche Felder die Windergarschde. Die guggd mit ihrm zoarde grüene Keimling scho wieder aus em Boude raus und bleid sou bis zum Frühjoahr, bervor se groaß würd.

Ich höar naus: Wenn de es Fensder aufmäichsd und hiehörschd, no is dar Hirwesd äher e ruhicher Genosse. Die Vöüchl sen ruhich und wenn nid grod a Schdurm is höard mer kaum wos, grod sou als wenn sich alles säichd, ich brauch jedz amoal e Ruh. Lediglich dar Wind is underwaags und beim genaue hihöern kümmd des leichde Säusln bis zu deiner Oahrn, wenn dar Wind sich durch die naggerde Ösdlich vo die Bömm bewäichd ohne dass die woaggln. Om Nüssbaam gralle sich nou e boar Bläidder fäissd bis se a erschöbfd sen, langsam uf en Boude roschauggln und doabei rümdanze bis se unde lieche. Und ja, des mäichd e gläns Geräusch, weil die Bläidder ausgedruggld und dürr sen. Dar Boude frähd sich, weil er a en Schudz brauchd vor em Frosd, dar wu unweigerlich bald kümmd.

Ich riech naus: Es dued gued, die kalde Lufd eizuschnaufe und durch die Nose zu ziehn. Dar Geruch is schwer und is sou e Mischung aus feuchder Adde, feuchde vermooderde Bläidder und Sauerschdoffbardigl zoamgemüscheld. Durch dan Nawl griechd des ganze e neudrale reine Node und du miergsd, die Lufd is jedz sauwer und nid sou belode wie im Summer.

Ich spür naus: Ja, es liechd a gewisse Schwermüdichkeid in der Lufd. Grod woar nou Summer und bald kümmd der Winder. Dar Nawl läichd sich bei moanche wie a Schleier auf des Gemüüd, mäichd än langsoamer und noachdenglicher. Mer frähd sich, wenn die Sunn om Noachmiddoch vielleichd amoal e Schdunn scheind und än aufmunderd. Es kümmd a sou e Gfühl vo Einsamkeid auf. Mer fühld sich isolierder, weil mer durch en Nawl a nid sou weid gugg koann. Die Agdividäde wern alle noach inne in die Wohnung verloacherd und mer siehd underwaags wenicher Loid. Viele spüern des als Belasdung und wölle liewer schnell nein eiskalde helle Winder, doabei is es wichdich zum rokumme und a sou langsoam wieder zur Vorbereidung für des kummende Joahr. Wenn de Glügg hoasd und siehsd en Vöuchlsschwarm oam Himmel, koannsde a bissle neidisch gsei, weil die alle zoamm als Grubbe in die Wärm vom Süden flieche. Mer könnd amoal wieder en Droache schdeich loass, ower ich hob scho lang känn mer gsahn.

Es is die Zeid wu die digge Jagge wieder aus em Schraank rausgehoud wern. Mer hoad äher Lusd auf en Wollbullower und selwergschdriggde Soagge. Die Hömmer wern karierder und grieche Fooarwe wie der Hirwesd selwer. Du siehesd ofd Kürbisse und Kasdonie als Schmugg uff die Dröbbe lieche. Die Kirwefesdli wern wenicher und üwerschneide sich dann mit em Oafang vo die Fosenoachd im November. Allerhäliche uf em Kirvich gehöard a doazu, wenn oweds die Lichder in roade Foarwe loichde und beim Roasegraanz die Käld die Bää naufgroabbeld. Mer hoad äher des Gfühl, dass mer nid allä sei will und süchd die Geborgenheid vo die Wohnung und a vo Menschegrubbe. Und wie schüe is es, wenn mer zum öerschde moal wieder en Kachloufe oaschürd und digge Scheidli neiläich koann. Es is hald Hirwesd.

AFriedrichOT, 2.11.24

Es brauchd normalerweise goar känn besondere Grund, üm sich zu dröffe und zu feiern. Genau des gehöard zu unner Sozialisadion und mäichd uns aus. Ohne annere Loid und ohne mid dare zoam zu senn, gähed des Lawe nid sou gued und des is wie e Glebschdoff für unner Gesellschoafd. Es is äfoacher uff en Douerf, weil doa kennd mer sich und woahnd nid sou isolierd wie in der Schdadd. Es brauchd känn Anlass üm zu sooche, hob mir dröffe uns, sedze uns a weng zomm, jeder brengd wos zu Esse und zu Dringe mid und noacher würds scho vo allää lusdich. Wie wur des früher schüe, ich hobs nou e bissle im Koubf, wenn mer Schbilg gange is oder wenn mer äfoach oweds noach der Arwed sich naus gesedzd hoad uff die Dröbbe. Doa is schue jemand vorbeikumme mid dann wu mer wos geräid konnd.

Wenn mer en Grund hoad sich zu dröffe is es a gued. Des Sunneschdroassefesd in Wasserloase woar sou wos: e Fesdla mit Musig und Esse und Dringe und war will, koann wos nei die Gelldschoachdl schmeis und des wüerd genumme für die Renovierung vo die Grodde, die wu daus Richdung Sulzl schdähed. Die Lummls Brigidde und ihr Moa der Mördl, höm die Noachbr zoamgeruefe, höm Bierzeldgarnidure und e boar Zeldli aufgeschdellt. Die Loid höm Kuche gebaggd und midgebroachd und Rugg Zugg woarsch e riesiches Kuchebüffedd. Doa brauchds goar kä groaße Obschbroache und doa droa siehed mer scho wos e Gemeinschoafd alles leisd koann. Sou viele schüene Blaachkuche, runde und egiche, gfüllde Kuche mid Obsd dinn oder Grem und Sahne, bis nauf zu die Duerde und en Schdroislkuche. Und wie des dufded! Ächendlich willsd de dich nid vo dann süeße Dufd verführ loass, ower noacher koannsd de kaum widerschdieh und niemmds dir hald e schönns Schdügg Schwoarzwälder und e Schdügg Brombeerkuche mid Mürbdääg. Ower dann Kaasbloodz vo die Madda willsd de a nou probier, weil die Madda möchd die nou in sou en alde selwergebaude Holzbaggoufe, wu mer richdich groaße Blecher nei schieb koann. Des woar dar süesse Dääl. Ower o die anner Egge hoads a Würschdli gawe, die hoad dar Grimmels Hans gegrilld und die berühmde Wasserlöaser Schdeegs vom Lummls Wendl. Es gaid kä bessere, weil die senn mid Zwiefl- und Schambingionsoß, wie du se nirchend wu annerschd griechsd. Für des leibliche Wohl is also ausreichend gsorchd und Musig für die Seele hoads a gawe. Des bekannde Noachboarschoafdsmusigandeduo vom Mördl und mir hoad aufgschbield und doamid woar des Fesdle kombledd. Die Düüsch woarn schnell besedzd und es woarn viele Loid doa, höm gesse und gedrunge und midgsunge bei die Volgslieder und Schloacher. Mer hoad gemirgd, dass es dare Loid Schboass mäichd und dass se daswache a gern Geeld schbendierd höm, weil des söll ja für en guede Zwegg sei.

Wos will ich doamid sooch: Des woas mir elle brauche is doch sou e Gemeinschoafd, dass mer sich zamsedzd, Blän mäichd und wos auf die Bää schdelld. Wenn e boar Loid zoamhölfe und mid oaboagge, is es nid viel Arwed und es künnt wos doabei raus; in dann Fall e guede Schbende für die Renovierung vo die Grodde. Und mer muess sich bedank bei dare Loid die wus in die Haand namme und des organisiere, weil a die schdarwe aus, a bei uns uff en Duerf. Mer muess sich bewussd war, wie schüe des is, dass mer, egal wu mer woahnd, guede Noachbr hoad.  Mer koann amoal hi, mer koann amoal wos fräech und zoamm wos moach. Viele Mönsche kenne ihr Noachbr blos vom higugge, wenn überhaubd – und des find ich dodal schood. Die hadde vielleichd nou ni souwos wie Durfgemeinschoafd und des sichere Gfühl wu mer doabei hoad und dass mer sich nid sou allää uff dare Weld fühld. Ich gläb die Gemeinschoafd woar früher nou schdärger, a weil mer mehr auf sich oagewiese woar. Ower es gaids nou. In die Düerfer. Üwerool bei uns. Ich bin froah, dass ich uff em Land woahn und Noachbr hob.

Auf es näxde Fesdla

AFriedrichOT, 20.10.24

• Für Edna Sol

Schön war sie anzuschauen. Ella war schon einige Jahre alt, eine Jugendliche, aber im wilden Alter. Sie war athletisch gebaut und hatte ein helles, bläulich schimmerndes Kurzhaarfell mit einer weißen, wehenden langen Mähne. Bei oberflächlichem Hingucken hätte man sie für ein Pferdchen halten können, wenn nicht auf ihrer Stirn – wie bei ihren Eltern und Geschwistern – ein großes Horn senkrecht nach oben gewachsen wäre, wie es bei Einhörnern üblich ist. Aber Ella war anders, nahezu außergewöhnlich und besonders. Denn im Vergleich zu den anderen Einhörnern war ihr Horn nicht fest, sondern hohl. Und sie konnte die Luft nicht nur durch Nase und Mund, sondern auch durch das hohle Horn so fest ausblasen, dass es wie der Klang einer Trompete durch den Wald schalte.

Als sie noch kleiner war, hatten sich die anderen Waldbewohner noch erschrocken umgedreht, wenn sie anfing zu blasen, denn der Ton war noch jämmerlich und völlig ungeübt und verzerrt. In ihrem jetzigen Alter hatte sie jedoch gelernt, die Luft so geschickt durch das Horn zu blasen, dass sich der Klang anmutig und lieblich anhörte und die anderen Anwohner stehen blieben und ihrem Spielen lauschten. Ella war so talentiert, dass sie jedes Lied, das sie auch nur in der Ferne hörte, sofort mitblasen konnte. Das hatte sich sehr schnell im Zauberwald, in dem sie mit ihrer Familie lebte, herumgesprochen und alle Bewohner freuten sich riesig, wenn Ella blies und spielte – und so gaben sie ihr den Künstlernamen Trompetella.

Selbst dem Oberwaldwichtel, der die Funktion eines Bürgermeisters hatte, war von Trompetella begeistert. Er bestellte sie eines Tages in sein Amt und sprach: „Ich habe gehört, dass in einem fernen Land ein Blasmusikwettbewerb stattfinden soll. Hierzu sind alle Bläser der gesamten Welt eingeladen“. Das ferne Land war jedoch so weit entfernt, dass man nur mit einem Flugzeug dorthin gelangen konnte. Das war ein Problem, denn Ella passte mit ihrer Größe und ihrem großen Horn in kein Flugzeug hinein. So musste der Oberwaldwichtel mit seinen Zauberkräften helfen und er sagte: „Nun, ich werde deinen Körper ganz klein machen, damit du in das Flugzeug hineinpasst“. Und er streckte seine Hände über Ella und sprach: “Rumpel Pumpel Elfenwein, mach diesen Körper mäuseklein, doch rühr ihr großes Horn nicht an, damit sie dann noch spielen kann“.

Und wie von Zauberhand wurde Ella immer kleiner, bis man nur noch das Horn und am unteren Ende die winzig kleinen Hufe sah. So passte sie gut in den Flieger. Auf dem Blasfestival sprach sich sehr schnell herum, dass das Horn mit den winzig kleinen Hufen Trompetella war und so wunderschön blasen konnte, dass jeder andere Musiker mit ihr zusammenspielen wollte. Es zeigte sich, dass kein anderer das „Täterätätäää“ so klar und kräftig und gleichzeitig so geschmeidig und lieblich spielen konnte wie Ella. Es war so überwältigend, dass alle Anderen verstummten, wenn sie auch nur anfing zu üben. Und so war es kein Wunder, dass es am Ende der Woche hieß: „Der Gewinner des diesjährigen Wettbewerbes ist Trompetella, das Horn mit den kleinen Füßen aus dem Zauberwald“.

Als Ella wieder zurückkehrte, wurde ein riesiges Fest gefeiert und Ella blies den Gästen die vielen neuen Lieder vor, die sie in der weiten Ferne gelernt hatte. Der Zauberspruch hatte wieder nachgelassen und Ella war größer, schöner, anmutiger und berühmter denn je. Alle Einhörner der Gegend wollten sie heiraten, sie hatte sich jedoch schon längst mit ihrem Freund Ferdinand vermählt und gründete eine Familie. Sie bekamen viele Kinder und alle hatten ein hohles Horn geerbt, durch das sie blasen konnten. Als diese größer waren und viel geübt hatten, spielten sie zusammen und wurden als Einhornblashörner aus dem Zauberwald weltberühmt. Wenn du heute ein Blasorchester hörst, bei dem Hörner mitspielen, könnte es sein, dass dies verkleinerte Einhörner sind. Dann musst du nur nach unten schauen, ob du die kleinen Hufe an der Seite sehen kannst. Täterätätäää.

AFriedrichOT041024

Gesdern had ich widder des Erlebnis. Ich hob mich scho früh drauf gfrähd, middochs is mer scho es Wasser im Maul zoamgelaffe und om Noachmiddog hob ichs kaum ausgehalde. Büngdlich um 17 Uhr hoads Kesslflääsch gawe uf die Mousdalm in Modles. Wirglich a schüens Gelände für dann Ereignis, des muess ja a boass, genausou wie die Musig vo die Rhöner Hüddemusigande.  Mäsdens senns hald sou Fesdli – und mäsdens is es a on en Muendich Noachmiddoch um fünef. Es is sou e gewäinde Zeid und die Loid kumme aus alle Egge, vo dahämm oder diregd vo die Arwed und mer määnd, die hömm schue lang nix mer zu Esse griechd. Es is ower wache dann aussergewöhnliche Gschmoog. Des schmegge ächendlich haubdsächlich die Frange sou. Noarddoidsche oder annere Ausländer grieche scho Zuschdänd wenn se blos nein Kessl gugge. Ja sie hömm rachd, es siehd e weng uoabbedidlich aus, wenn des ganze Flääsch in die hässe Brüh rümschwöömd und wenn a nou grood ouwe druff dar Rüessel rausguggd. Wenn mir Frange doa nei gugge, wüsse mir genau, wie des schbäder schmeggd, wenn mersch uff en Daaler hömm. Wos für e Frääd, wenn du droa bisd und des ganze Werg uff en Daaler hoasd. Bevor du oafängsd, löassd du dein Bligg öerschd amoal schweif und leggsd dir scho die Libbe. Drei Schoiwe fädder Bauch mid e bissle Moochersch din, zwä Broagge Koubfflääsch, digge Schwoarde mid Flääsch, Rüessl  wu nou a boar Höörli droa sen, e bor Schoiwe vo die Niern und vom Harz, e Bluedwürschdle und e Lawerwüerschdle ouwe druf, obwohl die zuledzd gesse warn. Doanawe en Berch mid Sauergraud oder eigeläichde Zwiefl und Gnoblauch, e Hoifla Salz und Bföffer und frisches Broad. Des siehd nid blos noach Viel aus, es is a Viel. Und doabei is es sou e äfoaches Esse. Des Flääsch wüerd ja blos mit e boar Gewürze in dare Gräidlsubbe gekoachd und sussd nies. Und drozdem schdiehn noacher om Moandich widder die Schlange bei die Essnsausgawe zich Meder lang. Es senn sou viel Loid , dass de wunnersch mänsd, wos für e kösdlichs Menü es gaid. Es is für uns Frange äfoach wos besondersch. Mir verbinde des direggd mit unner Heimad und daswache senn mir a sou gued gewoasse. Mäasdens senn des Menner, die wu oaschdiehn und die gebrühde Soistügge esse und der määsde Menner siehd mer a oa, dass die des garn esse, weil mer brauchd scho e weng die Figur doazu und vor allem en Bauch, wu des alles neiboassd. Du koannsd also scho vo Weidem gsah, jawoll, des is e Kesslflääschesser.

Wenn de en ruhiche Bladz gfunne hoasd, noa koannsde mit dann Esse oagfang. Als öerschdes es Sauergraud: Jawoll, es is oarch gued, süesslich und sauer. Dann muessd de dich endscheid, jedz wus nou dambfd, niemmsd de öerschd die fädde Bauchschoiwe und Schwoarde vuerne wag, weil die nix mer sou gued schmegge, wenn se amoal kaald senn. Also neigebisse, nei des bissle zoarde Flääsch, mit dann digge Schwoarderaand. Es hoad lang genuch gekoachd und is wääch und vergähed uf die Zunge. Doazwüsche widder Graud und neis Broad gebisse. Wenn de jedz nou en Schlugg Bier noachkibbsd, koannsde de vor Verzüggung fasd die Aache verdräah. Ich koann mir fasd känn außergewöhnlichere Gschmoog auf meiner Zunge vürschdell. A nid im fünef Schderne Resdaurand. Doabei hoasd de örschd ogfange mid dann Genuss. Weider mit em Koubfflääsch, des senn die Musglgnubbl vo die Bagge vo die Sau. Die hoad ja viel gekähd, sou lang wie se gelaahd hoad, daswache is dar Baggemusgl ganz zoard und wääch. En Rüessl häib ich mir ümmer für die Midde von dann Esse auf. Rüessl is kä Flääsch, kä Gnurwl und a kä Fädd. Die Konsisdenz is äher doazwüsche und erinnerd mich ümmer o e schüenne wächgekoachde Rinderzunge in Madärasoß. Du koannsd dir fürschdell wie des Schdügg Rüessl vo änner Gschmaggsgnosbe auf der Zunge zur annere schbringd und jedesmoal e glänne Exblosion auslöasd. Wenn du määnsd des woarsch, no hoasde dich gedäuschd. Es kümmd jedz quasi zum Höhebungd, weil du hoasd nou e Blued- und a e Lawerwüerschdle. Die senn gued gewüerzd und du schmeggst quasi die Gewüerze änzln raus: en Hauch vo die Nelge, Musgad, Majoran und Bimend. Des wabberd dir scho als Geruch endgäiche, wenn du des oarme Wüerschdle lengs aufschneids und die grouwe bluediche Schwardebroagge durchenanner buerzln. Die Lawerwuerschd is feiner gemoahle und doa koannsde je noach Gäiched dann Ingwer, Koriander, Kümml oder des Bohnegraud rausgeschmeg. Wos für e Erlebnis, wenn dei Daaler lähr is und blos nou die Haud vo die Würschdli ü bleid. Jedz koannsd de amoal kurz die Aache zumoach und en ganz zufriedene und wohlduende Verdauungssoifzer rausloass. Woar des widder gued, äfoach richdich gued.

Gloar, es is üweroll e bissle annerschd. In Schweiferd häsd des Schloachdbladde, in de Rhön is es Kesslflääsch und wo ich gebuern bin häsd des nou Gräidlfääsch in dare Gräidlsubbe. Dar Begriff kümmd vo „Gredeln“, des hässd, dass die Wuerschd und des Flääsch beim Schloachde gekochd wüerd. Doabei is die Demberadur ümmer kuerz vur em Siedebungd, damid die Wüerschd nid bladze. Daswache woar a ümmer sou e groaßer Dermomeder in die Subbe dinn, üm des zu überwache.

Hei, ich könnd scho widder a Borzion ess.

AFriedrichOT, 08.08.24

Im woahrsde Sinn vo dann Wuerd konn mer des sooch. Nid elles woar gued wos in dare Vergangehäd gemoachd woarn is, weil mer säichd ja ümmer: früher woarsch besser. En Scheiß. Und worüm? Ich soochs oich.

Mer muess zurüg in die sechizicher, siebzicher Joahr, wu e Reform vo die Fluerschdügge woar, wu alles noi geordned und zoammgfassd wuern is. Und des hömm se Flurbereinichung genennd.  Ämoal quer durchs Land und elles woar fuerd, ower noi geordned. Für mich bersönlich woar des doamoals oarch schlümm, weil ich bin fasd nei e exisdenzielle Griese kumme. In meine Aache, woar die Agzion doamoals e reine Umweldkadasdrofe und hoad viel Nadur kabudd gemoachd. Mir is es ower ächendlich blos üm mei Hegge und mein Lieblingsbaam gange. Vo die Auswirgunge auf die Umweld hob ich doa nou nix gewüssd.

Wenn de früher die Höa nauf gfoarn bisd, doa woer ugfahr 300 m vom Ordschild Richdung Grassl rachds e Grubbe vo glänne Hegga gstanne, insgsamd drei Schdügg, huefeiseförmich und in die Midde woar e Wiesle mid 2 Birnbömm. Zwische die Bömm woar e Droahdsääl gschbannd, wu mer unner Agrobadig gemoachd und dann Felchaufschwung geübd hömm. Hinner dare Hegge, nawe sou en glänne Haufe vo Schbärrmüll, woar en Sächhamesehaufe. Nid vo die groaße schwoarze Waldsächhamese, sondern des woarn sou röadliche glännere Viecher, die a mueds noach Essich gschmeggd höm, wenn mer draufgegloabfd hoad. Dar Haufe woar ümmer bewoahnd, ower eines Dooches woarn se äfoch fuerd gezouche, woahrscheinlich, weil die sou sensibel woarn und gschbürd höm, dass sich doa in kurzer Zeid viel veänderd.

Die rachde Hegge is vom Schdroaßegrowe aus rachdwinglich, ugfahr fufze Meder noach hinne gange. Und des woar mei brivade, höchsdbersönliche Hegge. In dare Hegge hob ich en groaße Däl vo mei Kindheid und Freizeid verbroachd und mir sen midenanner üwer Joahre aufgewoasse. O die Seide sen Düerner, wille Roase und Hieffe als dichder Schudz gewoasse und blos vo hinne konnd mer durch en schmoale Durchschlubf nei ins Innere. Inne dinn doa woarn drei Kischbaame gschdanne. Auf dann middlere Baam is mer schlachd naufkumme, weil er hoad unde goar kä gscheide Äsd gehood. Wenn de ower om örschde Baam nauf bisd und hoasd dich ouwe wie e Äffle nügschwunge, dann bisde auf en middlere Baam geland und zwoar auf en diggere Oosd, dar wu sich fasd woagrechd noach ausse gschdreggd hoad. Auf dann Oosd konnd mer sich schüe sedz und sich wieder ouwe drü o en annere Oosd fäisdhald.

Ämoal isses hald bassierd. Nä, nid wos ihr dengd, ich bin nid rogfalle. Ower es woar grod noach em Middochesse, es hoad Kadhaiserglöass und Vanillsoß gawe und ich konnd wieder nid genuch griech. Jedenfalls, wie ich sou uf mein Oosd hogg, hoad uf ämoal dar Bauch ogfange zu grummeln und ich had einen Drugg o die hinnere Öffnung. Baam ro und schnell hämm woar kä Obzion mer, weil des hädd ich nix mer gschaffd, owohl ich oarch fling woar. Und mei Ünnerhouse wolld ich a nid ruinier, weil die had ich örschd drei Dooch o. Also hob ich mich auf dann Oosd gschdellt, die House rogezouche, schüe fäisdgehalde und mich higsedzd. Ihr wüssd selwer wie schüe des is, wenn uf ämoal dar Drugg noachlöassd. Wenn de noachgeguggd hoasd, woar zu mirge, dass sich die Bläider ümmer nou e bissle gschüddld höm, weil des hadde se in dare Oard nou nie. Für mich woar des auf jeden Fall e schüens Erlebnis mit Erleichderung und Befriedichung und es hoad mich gebräächd fürs Lawe. Wenn mer wäss, dass mir zum Schluss siewe Kinner doahämm woarn und blos än Glo hadde, woar des gloar, dass ich dann Gang zum Kirscheglobaam rechelmässich gemoachd hob. Woar ja nid weid vo unner Haus. Im Winder woarsch nid zu kaald, ower die Hegge woar ohne die Bläider zu durchsichdich, dass ich mich nid gedraud hob. Wieviel Gäng ich als Kind doahie gemoachd hob, wäs ich nid, ower ich hadd des Gfühl, dass mei Hegge wache dare Dauerdüngung viel besser und höacher gewoasse is als alle annere Hegge in die Gäiched. 

Und eenes Dooches woar se fuerd, nid när mei Hegge, sondern alle annere Hegge a, alle Bömm, alle Sächhamesehaufe, alle Schdäähaufe, wu die Loid vo die Ägger rogelaasd hadde und doamid a alle glänne und groaße Diere. Und kä Wunner, dass ich die Monade doanoach Verschdobfung had, weil mei Darmendleerungsroudiene underbroache woar. Seid doamoals hob ich mir ümmer e glänns Bömmla oder e Bflanze in en Küwl neis Glo gstellt und des hoad gholfe mei Verdauung aufrechd zu halde. Die Nadur hoad sich bis hoid nou nid widder richdich doavo erhould. Wie schö is des Bild im Koubf nou, wenn ich no die Lämmerlöcher gugg und elles is, wie doamoals, mit Hegge durchzouche.

AFriedrichOT, 29.9.24

Oh du süesser Schloaf. Grod jedz, wu ich midde in der Noachd doa liech und nid schloaf koann, fahlsd du mir enorm. Ich däd scho di Aache längsd zugemoachd hob, ower no wüelsd in meim Koubf rüm und als zu kumme noie Gedange, also schdieh ich auf und dibb se nein Kombiuder, damid se fuerd sen. Uff die äne Seide söllsde schloaf, weil dar Koubf Gedange blos richdich endwiggl koann, wenn de nid müed bisd, uff die annere Seide koannsde nid schloaf wenn de Gedange hoasd. Warüm schloaf ich überhaubd? Ä Driddl vom Lawe schloaf ich und mein Lawe is sou wie sou sou kuerz. Also liewer nid sou viel schloaf. Es gaid scheinboar in Indien so hoachgeisdiche Yogis, die höm  gelannd, nix mer zu schloafe. Mer säichd, die kumme doadurch in e höchere geisdiche Schdufe nei. Ich hobs a probierd amoal nix zu schloafe, doamid ich mehr Zeid im Lawe hob und nix verboass. Ich selwer hädds lang ausgehalde, mei Geisd woar ower oarch schwoach und scho noach mehr als en Dooch hoad er aufgawe, hoad oabgschalde und öerschd noach e boar Schdunn bin ich wieder aufgewachd. Es is gloar, mir Mönsche und die mäsde Lebewese müesse schloaf, des is wichdicher als es Esse und es Dringe. Beim Schloafe koann sich der Körwer erhoul, viele Schdoffwechselbrozesse wäern obdimierd, es Immunsysdem würd gschdärgd,  dar Geisd schbeicherd des vom Dooch ob und ordned sich noi und es is gued für es Woasse.  Ich bin ja a nid oarch groaß wuern, vielleichd weil ich als Kind zu wenich gschloafe hob, vielleichd weil der Voadder zu laud gschnoarchd hoad – ich wässes nid. Es häsd Schloaf is die besde Medizin. Mer wäss aus der Medizin, dass es bei Schloafmangel viele gsundheidliche Brobleme geid und vor allem die Bsyche leided. 

Weil dar Schloaf also sou wichdich is, würd er verglährd und a in der Lideradur zu woas besonderes gemoachd. Scho dar Davinschi hoad gsochd: “E gued verbroachder Dooch bescherd en glügliche Schloaf (Leonardo da Vinci)“. Dar Schloaf is süess und draumhoafd und ofd glärd ja die Noachd, wos dar Dooch nid wäs. Drüm söll mer a, vor wichdiche Endscheidunge, öerschd amoal drü schloaf, nocher find sich scho die richdiche Lösung. 

Wie löffd des ower oab mid dann „Schloafe“? Örschd wern mer müed, die Glieder wern schwer, mir grieche sou e Beddschwere und mir gähne. Des Gähne söll dan Koubf oabkuehl und die Bluedzirguladion schdeicher. Oweds is dar Koubf wöarmer, daswache gähne mir oweds mehr. Gähnen is ja a oanschdegnd und je besser mer die Loid die gähne kennd, um sou mehr gähne mir selwer mid. 

E leichdere Foarm, oder a e Vorschdufe vom Schloafe is des Därche oder Döse, doanoach kümmsde ümmer diefer nei und schlöafsd zum Schluss wie e Murmeldier, dass mer dich kaum aufgeweg koann. Wenn de schloaf willsd no säichsde: „Ich namm amoal e Müdze voul Schloaf“. Des künnd doaher, weil mer früher ja sou Kabbe in der Noachd aufgsedzd hoad, weils im Winder hald nid geheizd woar in die Schloafschduwe. Oder a: “Ich hau mich amoal aufs Oahr“, weil die mäsde Loid auf die Seide schloafe. Schloaf hoad en Rhydmus und is eingebedded in den Lauf vom Universum. Mer schlöafd hald noachds, weils doa ruhicher is. Gued, moanche schloafe a im Büro und mer koan sooch, war nid im Büro schloaf koann, hoad wirglich e Schloafschdörung. Grod auf em Land hoad mer früher gsochd:“ Mid die Hüehner nein Bedd und mit em Göiger wieder raus“. Damid die Loid besser aufgschdanne sen, hoad mer des schmaghoafd gemoachd: „Morchenschdund hat Gold im Mund“. Wenn mer des wäss, schdähed mer doch viel liewer auf. Mer wäss ja a, wenn mer die Noachd zum Dooch mäichd, hälsde des nid lang durch. Scho der Hippokrates hoad gebräidichd: „Schloaf und Wachheid sen als Krankheid zu bedroachde wenn se im Übermoaß aufdrade“. 

Unner Lawe hoidzudooch is nid ümmer im Einglang mid der Nadur, nix mer ausgewouche und drüm hömmer äfoch ofd Brobleme. Noadürlich muess es a Loid gab, die noachds schaffe, z. B. in der Fabrig oder im Krangehaus. Die Loid sollde mer gued bezohl, weil die namme viele Brobleme in Kauf und mir selwer könne in dare Zeid ruhich schloaf. 

Jeder Mönsch hoad a en annere Rhydmus beim Schloafe. Es gaid Langschläfer, die sich im Bedd als rümdrähe könne und wieder eischloafe und es gaid Frühaufschdeher, die rausmüesse aus die Kisde, sobald die Aache aufgiehn. Moanche sooche: „Dar frühe Vouchl is mir wurschd“. Ich hald des a äher mid dan Sadz: „Dar frühe Vouchl fängd den Wurm“. Und es is doch nix schüener wie früh, wenn de nou alää bisd, die Sunn gähed auf, du liesd die Zeidung und dringsd en Kaffee und dei Koubf is früüsch. Des Schloafe is, wie wenn de als Mönsch selwer in dich neigriechsd und um aufzuwache, muessd de ja vorher gschloafe hob. Wer die ganze Noachd schlöafd, haod am Dooch wenich Anspruch auf Ruhe. Vor allem wenn mer älder is gewöhnd mer sich o en gsunde Lebenslauf: „Früh neis Bedd und früh wieder raus“, weil: „Wer zu späd neis Bedd gähed und früh wieder raus muess, wäß, wuhar des Wuerd „Morchengrauen“ kümmd (Robert Lembke).

Blos blöd, dass a beim Schloafe die Zeid sou sagrisch schnell vergähed. Sou woar Gesdern ja des Hoide noch Morgen, also scho wieder en Dooch vorbei. Ich halds gann mid dan Gedichd vom Joachim Ringelnatz:

Morgenwonne

Ich bin so knallvergnügt erwacht. 

Ich klatsche meine Hüften. 

Das Wasser lockt. Die Seife lacht. 

Es dürstet mich nach Lüften. 

Aus meiner tiefsten Seele zieht 

Mit Nasenflügel beben 

Ein ungeheurer Appetit 

Nach Frühstück und nach Leben. 

AFriedrichOT, 27.9.24