Mei Schloaf, es Niggerle und ich sen sou e Drio

Ich und mei Schloaf sen wirglich uralde Kumbl und sen quasi midenanner aufgewoasse. Mir woarn scho ümmer e kombagde Einheid und wenn ich ne gebrauchd hob, waor er doa und hoad sich zu mir nein Bed geläichd.  Guad hoad ar mir geduen, hoad mich früh aufgeweggd und is dann selwer verschwunde, damid ar sich irchendwoo ausgeruh koan. Mäasdens hoad ar mich in der Noachd dräm loass vo weid endfernde Weldn und schöane Mädli, hoad mid mir uff die wäche Madraze gekuschld und hoad mei Admung langsam gemoachd, bis mei Aachedeggl zugfalle sen. Sou über die Joahre sen mir ower, wie in jeder guede Beziehung a, sou e bissle quer midenanner kumme. Jedz, noach all die Joahre, mähnd mei Schloaf, er müessd grod oaweds, wenn ich mich hiläich nein Bedd, auf Wanderschoafd gieh. Ich hör ne nou wie er säichd, zäil schua amoal die Schäfli, ich kumm gleich – ar bleid ower länger fuerd wie ich will. Ich wälz mich vo änner Seide auf die annere, es hölfd nies, ich bleib allä. Er is woarscheinlich meileweid fuerd, obwohl er genau wäss, dass ich ohne sei Anwesenheid nid schloaf koann. Wenn ich im Bed lieche blei, schdoacheld ar mei Gedange o und niemmd mich geisdich mid auf sei Wanderschoafd. Öerschd zeichd ar mir noch amoial alle Schdazione vo dann hoidiche Dooch. Egal wu ich woar, er gähed mid mir noch amoal doahie und führd, des gläbsde nid, noch amoal dieselwe Gschbräche, die ich ja scho kenn, a wenn die nid sou oangenehm woarn. Ich soch höar auf, loass mir mei Ruh im Koubf. Doa wanderd ar direggd auf dann nächsde Moarchen, zeichd mir mein Doochesbloan, löassd mich in Gedange erleb wie ich aufstieh, mich wösch und zurachd moach. Ar mäichd dann a scho noie Blän für dann Dooch, überläichd mid mir wos ich oazieh söll, süchd mei Grawade raus, schreibd auf en Zäidl wen ich alles oaruef muess und wos ich eikäff söll. A wenn ich ne oaschrei, loass mer mei Ruh, er höard öerschd auf, wenn mei Zäidl zum Eikäffe ferdich gschriewe is, im Koupf dinn. Vor lauder Ärcher doa drü, denk ich, dir zeich ichs und stieh wieder auf vom Bed. Und damid ich sei Gedange aus meim Koubf rausgriech, sedz ich mich zur Schdroaf in mein Sessl in der Schduwe und moach en Fernseh o, a wenns scho früh halwer zwä is. Doa söll ar när amoal im lääre Bed noach mir süch wenn ar zurüg kümmd. Dar Schloaf niemmd kä Rügsichd drauf, dass ich früh ausgeschloaffe hob muess und im Koubf fid sei söll. Ar mäichd sei ächenes Ding und löassd sich nix sooch. O moanche Dooche dauerds lang bis ar wieder zurück kümmd. Und dann dauchd ar auf, wenn de ne goar nid gebrauch koannsd, zum Beischbiel bei e Beschbrechung.  Doa kümmd ar dann uf ämoal mid seim gläne Brueder, dem Niggerle. Dar is heimdügischer, weil dar hübfd dich urblödzlich vo die Seide o, egal mid wan du grod reds und dich konzendrier söllsd. Noa moache die zwä als dein Mund auf zum Gähne und ziehn o dei Aachedeggl, dass de se kaum aufloass koannsd. Schbädesdens jedz fräache die Loid, ob ich se verschdanne häd, weil ja mei Aache zu sen. Ihr gröassder Drigg is, dass se sich auf die Musgl drauf läiche und die mid sou e Schlaffheid überziehn, dass de dich soufurd hiläich willsd. Ja jedz is grod amoal Noachmiddoch, und wenn de noachgaihsd, no ruhn die sich alle zwä jedz mid dir aus und dar Schloaf erhöuld sich sou gued, dass ar hoid oaweds wieder auf die Birsch gähed. Oich gab ich Bürschli, hob ich gedoachd. Ich hob mei Gschbräch oaschdrengend zu Ende gebroachd, bin Richdung Sessl gelaffe – des Niggerle hoad sich scho die Hend geriewe und abblaudierd –  ower dann bin ich obgebouche und direggd nei die Küche. Die Kaffeemaschine is oagschbrunge, ich hob auf „exdra schdoarg“ gedrüggd und doa is des Niggerle scho ängsdlich zoammgezzugd. Bis dar Kaffee durch woar, nou schnell 10 Gnieboiche, doa wäs ich a, dass dar des nid mouch. Und dann loass ich dann Kaffee Schlugg für Schlugg in mei Kehle neilaff. Und mid jedem Schlugg mirg ich, wie mei Schloaf und des Niggerle sich wieder aus mir rauswinde und sich irchendwu hi vergrümmln. Ich boass nid auf, wu se jedesmoal hiegiehn, ower woahrschlich schdegge se im Wohzimmer in der Nähe vo die Caudsch, weil de doa soufurd müed würschd, wenn de in die Nähe kümmsd. Weil dar Schloaf mich geärcherd hoad, ruef ich ne nou noach: „Hoid oaweds um halwer zwölef bisde doa, vorhar brauchsde dich nid sah zu loasse“! Sou, dare hob ichs für hoid gezaichd.

Bin gschbannd, ob mei Schloaf sich hoid oaweds büngdlich schschdelld, sussd moach ich mir a ganze Kanne voul Kaffee und schdell se aufs Noachdschrengla. Und dann koann ar moach wos er will, ich moach en Schdreig mid Schloafendzuuch und in mir kümmd dar nix mer sou schnell nei.

AlbinFriedrichOT240206