Dar Käbdn vo unner Hollerbüxegeschwader

Ich konn mich nid erinner, dass mir als Kinner sou viel Schbielzoich hadde, wie die Kinner hoid. Vor allem nix wos gekäfd woar. Doa muessd mer ofd äfoch selwer dädich war. Mir höm o Holzscheidli seidlich glänne Räider higenochld, des woar unner Audo. Oder mir höm ganze Eiseboahnzüch sou hargschdelld. Alde Leisde sen raudeförmich zoamgeglebd oder gebunde wurn, hinne is e Schwanz aus Wurschdbindfode und Bildzeidungsschnipsel hikumme, die Fläche is obgedeggd woarn mit Stoff oder a dünns Boabier – und scho is dar Droache gflouche. Wenn mer wos zum Grachmoache gebrauchd hoad, sen Hollerbüxe gebaud wuern. Des woar nid sou äfoach und es hoad nid jeder gekönnd. Mei Ongl Paul woar sou e Schbezialisd und hoad moanchmoal äne gebaud und ich had des Gfühl es is ne leichd vo die Hand gange. Hoid gaids goar nix mer viel Loid die des bau könne, weil känner mer wäss wie. Des Wisse gähed mid die Loid nein Groob und des alde Wissen is verschwunde. Doa versoachd sougoar des Inderned und wäss a nid viel über dan Bau vo Hollerbüxe. Ower ich hob nou e lebendichs Exemblar mid dan spezielle Wissen in Wasserloase gfunne. Dar Wolfs Helmud schdelld in seiner Wergschdadd nou sou Büxe har und hoad e ganze Sammlung doavo. Ar hoad mir äne vo seiner Büxe gschengd, wie ich ne zu dan Dhema inderviud hob.  Des hoad mich oarch gfrähd und sie funkgionierd ordnungsgemäss, souweid hob ich se scho brobierd. In der Dierweld isses doch sou, mer versüchd seldene Exemblare zu erhalde und noachzuzüchde, damid a die Noachweld die noch amoal ogegugg koan. Des is bei dann Helmud nix mer sou äfoach, weil dar is ja üwer des Fordbflanzungsalder drü nü. Sou muess es lang, dass er mir sei Wisse quasi weitergawe hoad und dheoredisch könnd ich des Geräd scho noachbau.

Mer niemmd also en Oosd vom Hollerbusch, vielleichd 30 cm lang und 4 cm digg. Dar soll möchlichsd grod sei und kä Seidedriebe hob. Dann koann mer mid sou en 19 Millimeder Langbohrer des Moarg inne rausboahr. Wörüm 19 Millimeder, weil die Munidion, die schbäder doa nei kümmd – und zwoar die Koarge vo die Weifloasche – dann gued neiboasse. Die Bohrung wüerd inne noachgschliffe, damid se möglichsd glood is. Doazu brauchds dann noch en Schdössl aus Hoslnüssschdegge mit e Oard Griff hinne droa, dar wu in die Öffnung gued neiboassd. In die vuerdere Öffnung kümmd e Koarge nei und a in die hinnere Öffnung. Jedz schdöassd mer dann hinnere Koarge mi dan Schdössl schnell nei und dann hääds dan vurdere Koarge durch die Kombrimierung vo die Lufd vuerne naus. Des mäichd en Gnall und wenn de dan Koarge on Koubf griechsd, mirgsde des. Es is quasi die Dechnig wie bei e Lufdgewehr. Die Koarge vo hoidzudooch aus Blasdig sen nid geeichned, weil die nix ruedsche. Blos die alde echde Koarge, die nou aus dare Rinde vo die Koargäche hargschdelld sen, die fungdioniern. Ziel koan mer doamid nid sou gued, ower mer koan en Weddbewerb moach und es Schoierdoor wüerd mer scho dröffe. Moanchmoal sen mer loos und höm brobierd die Laderne o die Schdroass zu dröffe oder a die Fensderschoiwe vo die Loid. Es hoad früher scho öarmere und bessere Loid gawe. Dar Unterschied woar, dass die bessere Loid a gröassere Schoiwe hadde und die woarn äfoacher zu dröffe. Mäsdens is nix kabudd gange, ower wenn die Loid oweds in der Schduwe gehoggd woarn und wollde ihr Ruh, doa koan ich mir hoid scho vürgschdell, dass des a moanchmoal gschdöerd hoad. Mir muessde dann ganz schnell fuerd renn, wenn dar Mo rauskumme is und gfluchd hoad. Die Koarge muessde mer dann hald obfer.

Wie richdiche Drabber in Ameriga, hatte mir sou glänne Boidelich dabei, wu unner Munidion din woar. Damid mer se beim Schbiele erkenne, hadde mer unner Ofangsbuchschdoawe draufgemoald. Ab und zu hom mer a richdiche Wehrübung gemoachd wie bei dare Bundeswehr. Ämoal woar oweds Kirch und mir hatte unner Gewehre midgenumme und bei die alde Schuel verschdeggld. Noach die Kirch sen mer auf Joachdübung gange und hadde die Fensder im Visier. Als häd dar Moa drauf gewoard is er uns soufurd noachgerennd. Ich durch die Gasse, über en Agger, durch en Busch und woar a schnell dahäm. Dar Moa is kumme, hoad bei uns geglingld, had en Koarge mid e „A“ in der Haand und hoad sich beschwerd. Die Muedder hoad gsochd, ich könnd des nid gewassd sei, weil ich ja in die Kirch woar und doanoach gleich häm kumme bin. Und es gaid viel Nömmer vo Kinner, die mit „A“ oagiehn. Ich hob fäisd en Koubf gschüüdld, als se mich gfrähechd hoad, ob ich wos doamid zu duen hob. Es woar ja nid richdich gelouche, weil ich hob ja nix gsochd und dass ich mei Waffe zur Kirch dabei had, hob ich a nid gsochd. A beim näxde Beichde hoad dar Bfoarrer mei Geheimnis nid erfoahrn. Ar häd ja frähech könn, hoad ar ower nid, weil in seiner heilichen Allwissendheid woarsch ihm eh gloar.

Sou hoad sich a doadurch des Wisse um die Hollerbüxe erhalde. Und daswache due ich dan Wolfs Helmut nou im noachhinein zum Käbdn vo unner Hollerbüxegeschwader ernenn.

AlbinFriedrichOT240201