Vorsädze und Voraussoache für Zwanzichvierezwanzich

Ooch, die guede Vorsädz o Noijoahr. Wie ofd hoad mer die scho gemoachd und wie ofd hoad mer gemirgd – scho noach a boar Dooch, oder scho noach a boar Schdunn – die loasse sich nid eihald, a wenn de dich nou sou oaschdrengsd. Grod om Oafang vom Joahr wern die gemoacht. Es gähed in der Reechl üm Gsundheid, Karriere, üm die bersönliche Endwiglung und a viel üm die Beziehung in dere mer is. Mer sedzd sich e Ziel wos mer erreich will und mäsdens hoad des doamid zu duen, dass mer wos moach will, üm sei ächene Lebensqualidäd zu verbessern, wie zum Beischbiel des Oabnahme. Mer säichd, ich will fünef Kilo oabgenamm bis die Oasder. Mer is nou oarch modivierd, vielleichd a, weil sou e nois Joahr än e bisle Kroafd gaid und mer fengd dann o und issd wenicher. Oh je, wie ofd schaffd mer des wieder nid bei die viele Gebuerdsdooche, wu mer schoa eigeloade is. Sou e Vorsadz is oaschdrengend und dar Mönsch is ja sou geboold, dass er unoangenehme Sache mehr sou im Hindergrund held. Noach dare öerschde Geburdsdoochsfeier säichd mer dann scho: „Mensch ich wolld ja, ower bei dare nächsde Feier brobier ichs auf jeden Fall“. Mer koann ja schließlich nix doazu, wenns doa a wieder Schbiessbroade und Klöass gaid. Vielleichd höms die, die oarch kadholisch sen, e bissle leichder, weil die dann zum Beichde müasse, wenns nid glabbd, obwohl es Schbiesbroadeesse mir nid als groasse Sünd bekannd is.

Ich selwer hob ächendlich kä sou Vorsädze, äher sou glänere Ziele oder Wünsche, haubdsächlich a wache es viele Esse. Ich schaff doa gued mid meiner Woach im Bood zom und ich wünsch mir, dass dar Zächer irchendwann bei e beschdimmde Zoahl schdiehn bleid. Wünsche giehn ja nid sou ofd in Erfüllung, daswache is es a nid schlimm, wenn des nid sou glabbd, weil dann is auf jedn Fall die Dechnig voa die Woach schuld.

Wenn mer ower als mirgd, dass die schdrenge Vorsädze nid eigehalde wern, koann mer a unglüglich wer. Es gaid ja die Undersuchunge doa drü, wos die Mönsche bei uns im Land für Vorsädze höm. Die Vorsädze wegsln a vo Joahr zu Joahr und für 2024 schdähed o öerschder Schdelle – und zwoar zum alleröeschde moal – der Wunsch, dass mer mehr Zeid für die Familie und für Freunde eirämm will. Scheinboar is es sou, dass mer in dare Zeide, wuus sou viele Grisen naweenanner aufdrade, näher zoam rüggd, zoamhald will und sich sicherer fühl will. Dar Vorsadz is vor allem bei dare under 30jähriche ausgebrächd, weil vor allem die sich noadürlich oarch unsicher sen, wos die Zukunfd brengd. In dan Bungd sen mir eldere Generadion gedschillder, weil uns des nix mer sou bedrüffd.

Dar Wunsch, dass mer Schdress vermeid oder obbau will, is jedz vo Bladz äns auf Bladz zwä geruedschd, weil unner Juchnd viel Werd auf die Wörg-Laiv-Bälänc läichd und nix mer, wie mir, voull schaff will und dann örschd guggd, wos nou für die Freizeid ü blaid. Des Dhema Gsundheid insgesamd, also mehr Bewechung, gsündere Ernährung, Verzichd auf Genussmiddl is a blos bei jedem Zwäde vorhande. Leider hoad dar Vorsadz, sich umweld- oder glimafreundlich zu verhalde, om mäsde noachgeloasse. Blos nou die Hälfd vo die Mönsche ingsamd find des wichdich – und grod die Juchndliche höm bei dan wichdiche Vorsadz oarch noachgeloasse.

Immerhin wüerd gschädzd, dass mehr als die Helfd vo die Loid ihr Vorsädze – zumindesd die öerschde drei Monad – durchheld. Die Frauen sen beim Durchhalde wieder schdörger und höm a mehr Vorsädze als die Menner. Woahrscheinlich, weil se mehr Vorsädze nödich höm, grod wenns üm die Beziehung gähed, wu ja die Vorsädze: „Ich will mein Mann besser behandl und bfleech, besser zuhöar, mehr Wünsche erfüll und ob und zu moal e Flöaschle Bier aus der Garasch mit hoach nam“, oarch löblich sen. Mir Menner höm grood die Bungde scho lang verinnerlichd und denge daswache, dass mer unner Frauen ümmer kombledd auf die Hend drooche und jeden Wunsch vo die Libben oablaase.

Ich muess sooch, ich namm mir goar nid sou viel für, sondern ich oachd auf die Zeiche, die mir die Nojoahrsnoachd schiggd. Weil doa koann ich mich drauf verloass und wäss genau, wie des Joahr würd. Ämoal hadd ich die ganz Noachd Groizwerdich – und des hoad sich üwer des ganze Joahr higezouche, dass ich sougoar öfdersch zum Dogder muessd. Dann konnd ich amoal goar nid schloaf in dare Noijoahrsnoachd, hadd dann Koubf voul Gedange und hob die ganze Noachd simulierd – des ganze Joahr hoad sich gezeichd, dass ich unruhich schloaf und viel zu viel noachdeng muessd. Dann hob ich amoal gued gschloafe, bin öerschd gäiche Middoch o Neujoahr aufgewachd. Des ganze Joahr woar ich ausgeruht und ziemlich leisdungsfähich. Gesdern, o Silvesder, hadd ich mid meiner Fraa ausgemoachd, mir könnde wieder amoal unnerer eheliche Bflichde noachgieh. Und wirglich, wie mer hoid früh um vierdl noach Zwää hämkumme sen, is se goar nix mer die Boudeschdieche naufkumme. Blos bis zur dridde Schdufe. Ich hob er re die Gläder ….. Also jedz söll ich wache dare Brivadsbhäre nix mer mer weider schreib, ower mid Fandasie könnd ihr euch des Weidere fürgschdell. Jedz bin ich gschbannd, wie des Joahr in dan Bungd weidergähed. Hoid früh hoad se scho wieder sou verdächdich mit die Aache geglimberd und gsochd, sie möüchd des Joahr ruhich ogieh und däd sich schoa amoal auf die Caudsch läich. Und ob ich e weng doazukumm däd. Du, ich mään es fungdionierd!

Is hald gued, wenn mer sich uf sei ächene Voraussoche verloass koann, dann brauchsde goar kä Vorsädze.

AlbinFriedrichOT240101