Wenn die Döne under die Haud giehn

O Weihnoachde gaids bei jedem e anersch Ridual. Bei uns in Öüwerdoll is es sou, dass mer om Noachmidog om Häliche Owed nei die Kierch gähed und sich des Weihnoachdskonzerd vo die Musigkabelle Oberdhulba ohöerd. Des hoad Dradidion und löassd dan Weihnoachdsdooch ganz schüe und ondächdich ofang, a wenns Noachmidooch is. Ich will doa nid drauf verzichd, weil mer o sou en Dooch eh innerlich ogegrazd und wehmüdich is, dass die Döne und Glänge vo die Kabelle dir sou en Mandl vo Rührseelichkäd ümleiche, dass de draurich und froah zugleich bisd. Zuöarschd schbield dar Noachwuchs und dann laffe die Musiger nei, lings und rachds und durch en Middlgang, doa mänsde des höard goar nix mer auf, sou viele Loid sen des. Und schoa doa gribblds e bissle en Buggl nauf. Du wässd, jedz kümmd wieder öbes, wos dich midniemmd und dich für e Schdunn endführd in e fasd üwersinnliche Glangweld, wos scho fasd himmlisch is. Vuerne droa schdähed dar Dirigend uf e Bodesd und fagerierd wie sou e leibhoafdich gewurner Dagdschdog, indem er mid einer Grazie und Raffinesse und ganz exagd dan Dagd vürgeid. Doa muess mer als higugg. Mer mirgd, des is e Einheid in dan ganze Bloasensemble. E hoad die Blöaser im Griff und sie könne sich auf ne verloass. Die Musigauswoahl in dan Joahr hoad wieder sehr bosidiv überroaschd. Nawe bekannde Lieder woarn a wieder sou noie Schdügge dabei, wu de wässd, die sen nid äfoach, hom en hoache Schwierichkeidsgroad und wu de doanoach schbüersd: „Dunnerkeil, woar des gued gschbield“. Die „Reise des Weihnachtsmannes“ woar sou e Schdügg. Des woar e Hailaid, woar in dare Indonadion saumässich gued ausgeraizd und des koann a blos e Kabelle, die wu gued eigschbield is. Doa hoads langsame Harmoniee, die wie e leichder Nawel vo Weihrauch durch die Kirch wabbern, es hoad laude und rhydmische Inderwalle, wu de mänsd die Hufe vo die Rendiere gloabbern und mid äm unerwoardede Schdagado höards schloachoardich auf. Wenn des gued gschbield is, überschlöad sich der Hall vom Echo im Kircheraum, weils sich sougoar des Echo frähd, über des exagde Spieles. Schbädesdens doa hob ich die Aache zugemoachd, weil de in dan Momend quasi des halliche Echo innerlich siehesd und a fühlsd. Die leise Dön vo die Duba kumme sou ziddrich om Boude endlang ogegroache, durch en Haubdgang und giehn dann in jede Baank nei und die schbüerschde richdich als Errechung o die Füess. Die hoache Dön gien direggd sengrechd nauf, o die Kirchedegg endlang und falle dann, wie sou e elegdrische Weihnoachdseffegdbeleuchdung, wie Schniagschdöber vo ouwe ro und die mirgsd de als öerschdes om Koubf, weil sich die Hoaar leichd im Schallbegl groisln. Om indensivsde sen die Harmoniee und Glänge vo die Bläser, die diregd auf dich zu und quer kumme. Die sen wie e Dsunamiwelle und dröffe dich, wie bei e Gnalldrauma, quer om Köarber. Zum Glügg sidze die Loid auf der Baank, sussd däds die richdich ümreiss. Bei dan Baradelied vom Musigverein: „Tochter Zion“, kümmd des ganze Stügg quer, wie e Schniawalze – und beim Schlussakkord höard dar Don nid auf, sondern rolld nou durch die Kirch wie e schwärer Donner im Summer. Es höarn ja sou viele Loid zu, jeder höard e bissle vo die Döne wag und du mänsd dar Glang muessd daswache als wenicher war. Ower ar held sei Schbannung bis er noach und noach hinne om Ausgang verhalld. Er löassd die Zuhöarer zurück, leichd verzüggd und erschdaund und mid viel Rührung, weil mer des hoad erlaa döff. Wenn de die Aache zuhoasd, dann siehsd de se doabei vor dir, die Mauern vo Jericho, wu doavor die Fanfarebläser hogge und bloase und sou die Mauern zum Eischdürze brenge. Ja sou gewaldich höard sich des Lied vo dare Öüwerdöllwer Musigkabelle o. Ich wäas a nid wörüm mer des Gfühl hoad, dass se jedes Joahr e bissle besser wern, ower woahrscheinlich is es sou. Es is ja nid blos, dass die ner Gebloas könne. Sie hom a e guede Gsangsgrubbe. Die Dooch hob ich öerschd des Weihnoachdskonzerd vo 1999 vo die 3 Denöre gehöard. Die sen, jeder für sich, oarch gued. Wenn alle drei zoam singe, sen se mit ihrm Vibrado e Offenbarung. Und unner Gsangsgrubbe, die sen sougoar zu vierd. Also nou e Vierdl besser!

Jedenfalls is des Konzerd für Viele dar Momend in dare Weihnoachdszeid, wu mer dengd, jedz gähed dar Häliche Owed los. Mit sou em gewaldiche musikalische Donnergrueß löasd sich alles, wos doanoach kümmd, auf, in a fesdliche, schbannungsfreie Schdimmung. Jedz dringsde noch en Glühwein, und dann gähesd de häm und richsd dich für des Esse, wos es hoid zum Fesddooch gaid. Und wos söll ich sooch, sou musikalisch vorbereided, muess jedes Esse a zusädzlicher Genuss war. Und es woarsch a. Genuss und Harmonie.

Jedz hob ich wieder a ganzes Joahr, wu ich mich aufs näxde Konzerd frääh koann.

Albinfriedrichot231225