Germanisches Saukoubfesse in Frangebrünn

Es hoad wos mysdisches, wenn mer doa hi kümmd. Midde im dungle Waald vo Frangebrünn, e bissle obgelache, dass nid jeder hikümmd, doa liechd des Gelände, mid dare Hüdde, mid die zwä Säalich und auf dera Landbrügge zwische die Säa, doa schdähed dar groaße Wurschdkessl und dambfd. Sou e Kessl wie mer ne vo früher nou kennd, wenn mer nou selwer gschloachd hoad. Es gähed auf dan Höhebungd im Joahr zu, dann, wenn die Nächde om längsden sen, wenns früh lang dungl is und wenns oweds früh dungl würd. Die Dooch sen oarch kuerz und es hengd nou sou e Oard Dämmerung über dan Wald, wenn de om Vormiddoch hi kümmsd. Die Lufd is kaald und dar Rauhreif, oder a wenns gschneierd hoad, moache nou zusädzlich e geheimnisvolle Schdimmung. Dar Kessl schdähed under Dampf und wüerd als mid digge Scheidli noachgschüerd. Vor lauter Errechung schdöessd dar jede Menge Wolge aus, die sengrechd noch ouwe schdeiche und moanchmoal durch die Keeld wieder als feins Schniegschdöber ouwe ro kumme. Wie bei die Germane früher, schdien e Haufe Menner, digg eigeboagd in ihre Windermendl, üm es Foier und dann Kessl rüm, underhalde sich lebhoafd, weil mer sich im Winder ja nid sou ofd siehd, höm gläne Bierflöschlich in der Hand, woahrscheinlich um dere Waldgödder e Obfer zu brenge. Es is e Mennerveranschdaldung und es is bloos ä Fraa zugeloasse, weil dare dar Säa gehöard und weil se hald moanchmol a e Sau zu dan Fesd zuschdeurd, die se selwer als Jächerin gschoasse hoad. Es is e schüener Brauch, jedz in dare kalde Joahreszeid und weil des ja ümmer wieder gemoachd würd, is es e Ausdrug vo Kuldur und Dradidion. Und sou e Dradidion is ja wichdich, dass sou e wilder Mennerhaufe en Zusammehald hoad. Mer konns ower a ganz noarmal sooch: noach die lange Winderdooche sen die Feddreserve bei die Menner aufgebrauchd und es is gued, wenn mer doa nou e weng Energiebolsder noachläich koan. Sou verbind sich die Dradidion mid dan Nüdzliche und ich mirg selwer, wenn ich dobei woar und gued gesse hob, ich muess doanoach drei Dooch nix mer ess, weil des sou einmoalich und energedisch gehaldvoll woar. Dar Kessl dampfd weider und würd ob und zu mi em riesische Löffl ümgerührd. In dare Brüh lieche einiche Soiköbf, Bauchfläsch, Wuerzlgemües und Innereie und brodln eindrächdich vor sich hi. Ob und zu schdichd dar Verandwordliche mid e lange Gowl nei die Broagge und wenn die Gowl dann noach e boar Schdunn gued neis Flääsch ruedschd, is alles ferdich und es koann zum Germanemoahl kumm. Dodrauf hoad die hungriche Meude gewoard. Rachds sen Bierzeldgarnidure aufgebaud, blos die Düüsch dovoa und die Menner schdiehn ausse rüm, schwär bewaffned mid Messer und Gowel und Hoolzbriedli. Als Beigawe zu dann Esse gaids früsches Broad, eigeläichde Zwiefl, Salz und Bföffer. Du wässd woas dich gleich für e Genuss erwoar, dar Moche gnurrd endschbrechend und dar Speichl im Mund is kaum zu bändiche. Jedz iss es soweid. Dar öerschde halwe Saukoubf würd auf en Düüsch geläichd, sou hääss, dass de ne nid mid die Finger obag koannsd. Mer schdürzd sich auf des Baggefläsch des seidlich om Koubf, als die urschbrüngliche Kähmusguladur, om Kiefer drohengd. Es löassd sich gued rauslöas und liechd dann als Fläschglumbe auf dei Briedle. Es hoad e wunderboare Maserung und Foarb. Des siehed sou gued aus und schmeggd äfoach himmlisch, sou dass de beim Kän und Schlugge die Aache zumäichsd. Mer döff sich nid doisch, a des Koubfflääsch is oarch fädd und daswache sölld mer a ümmer amoal e gläns Schnäbsle doazu dring. Des is gued für die Verdauung, weil dar ächendliche Cholesderinschogg kümmd ja jedz öerschd, wenn noach und noach a des Bauchflääsch auf en Düüsch kümmd mid ganz digge Feddränder und wenich weißes Flääsch. Mer koann selwer nix doazu, ower dar Körber verlangd des ja in dare Joahreszeid, üm wieder e boar Reserven für dan hoarde Resdwinder aufzubaun. Ich selwer ess am liebsde des Koubfflääsch und dann als Gröngung vo dan Ganze vuerne dan Rüessl. Rüessl issd nid jeder, weil dar än ümmer vorwurfsvoll oguggd wie zwä Aache und mäsdens sen vuerne a nou e boar Hörli droa und mer döff sich nid droa schdöör, wenn mer doa neibeisst und sich vürschdelld, wu dar Rüessl überoll gerüessd hoad in sei Soilawe. Dar Rüessl hoad en ganz ächene feine und milde Gschmoog, fasd wie Vanille und die Konsisdenz erinnerd o e gued durchgekoachde Zunge in Madeirasoß. Des ganze exblodierd dann auf dei Zunge und ä Broagge noach en annere verschwind in deim Moache. Des Gemurmel in dare Grubbe is verschwunde und mer mirgd, dass jeder bemühd is, sein Vorrad wieder aufzufülle. Hygienische Vorschrifde gaids doa känne, ower mir gfelld des grod, wenn des Fläsch äfoch, mit soue en feine Schmadzer auf en Düüsch drauf kümmd und äiwe nid vo feine Bladde und Deller gesse würd wie dahäm. Des mäichd des nou amoal e bissle urschbrünglicher und schüener und germanischer.

Also ich mouch des Dröffe ämoal im Joahr oarch garn. Es sen haubdsächlich Menner doa, mer hoad viel zu erzäihle und es is wos Einzichoardiches, wos es nid überoll gaid. Und ich bin froah, dass ich zu dare Elide gehöar, die wu bei dan Saukoubfesse doabei sei döff.

AlbinFriedrichot,231220