Die gläne Schuel vo Wasserloase

Früh sen mer schue auf die Dröbbe gschdane und höm auf die Lehrerin gewoard, bis se kumme is und mid sou en groaße Schlüssl aufgschloasse hoad. Die „gläne Schuel“ gaids hoid nix mer, ower sie woar ugfahr doa gschdanne wu hoid dar Bfoarrsool is, blos gläner in die Ausmoaße. Dar Eingang und die Schdäädröbbe woarn vo hinne, vo die Kircheseide aus und wenn de grod durch die alde Hausdüer neigelaffe bisd, is es diregd nein Sool gange, wu die öerschde vier Glasse underichd woarn sen. Jede Glasse hoad quasi ihr Egge gehod und ich gläb dar Oufe zum Heize im Winder woar o die Seide gschdanne. Rachsd vom Eingang woar nou sou e gläns Kabuff, a mit em Eingang zum Sool und doa woarn die ganz glänne Kinner din, zumindesd zeidweise, wenn se grod im groaße Sool gschdörd höm. Vorhar söll des amoal die Lehrerschwohnung gewassd sei und späder woar doa a e alds schwoarz verschdümmds Glavier dinn gschdanne. Ja, mer koan sich des nix mer vorschdell, sou viele Kinner in än Raum und blos ä Lehrerin. Hoidzudooch höm die Kinner fasd Einzlbedreuung über vierezwanzich Stunn und die Schuelzimmer sen ausgschdadded mid jeder Menge Dechnig und Zoich für die Bildung. Ower immerhin hadde mir scho e Heizung mit Hoolz und o die äne Seide im Sool woar e groaße Schieferdoofl zum Schreibe. Im Summer, oder wenn des Holz läer woar, muessde die Kinner hölf, des Hoolz wieder nauf en öüwere Boude zu droche. Doamoals woar Kinnerarwed nou erlaubd und durch des naufdrooche vo dan Hoolz, hadde mir gleich unnern Schbordunderrichd, sussd hädde mir ja nauf en alde Schboardbladz gemüessd. Sou a Kevin-Dschasdin Kind vo hoid hädd des nie midgemoachd und vielleichd a nid gschaffd. Om öüwere Boude woarn die Scheidli auf en Haufe gelaache und im Winder woar ümmer äner vo die Gröaßere für dan Oufe und des Holzhoule und Noachläiche zuschdändich. Des hoad geglabbd, weil ich koan mich nid erinner, dass mir gfroarn höm.

Ämol woar dar Schulroad doa und die höm mid e Delegadion uns Kinner ogeguggd und wollde wüss ob mir a wos gelannd höm. Die Lehrerin hoad mich gfrächd ob ich Diere kenn und ich hob gsochd: „Häschen, Bferdchen, Eselchen“. Dann hoad dar Schulroad gsochd: „Mein Junge, lass doch das -chen weg“. Doa hob ich weider aufgezäihld: Eichhörn, Kanin. Es woar nid lusdich, weil dar Schuelroad muessd nid lach und hoad blos die Lehrerin ogeguggd. Änner vo unner Glass hoad dann zur Lehrerin gsochd: „Frau Lehrerin, ich muess naus und amoal bies und amoal gag“. Des hoad dar Road wieder schüe gfunne, weil sich dar Bue sou schüe und vorschrifdsmässich obgemeld hoad. Die Gloos lings vom Eingang höm ümmer noach Urin geroache, des woar für uns normal und ich hob vergesse wie die früher ausgsahn höm, es woar auf jedn Fall oarch dungl dinn. Die Gloofensder zum Säe hi woarn ümmer aufgschdanne und moanchmal sen mer a om Noachmidooch neigschdieche. Nid zum Lanne, sondern zum Schdöwern douwe en öüwere Boude, zwüsche die alde Kisde und die alde Landkoarde. Schwimmunderrichd hadde mir nie, weil im Säe zu schwömme woar nid erlaubd. Ich hob die Zeid doamoals ächendlich in gueder Erinnerung. Mir Kinner woarn zom dan ganze Vormiddooch, höm viel Blödsinn gemoachd, dafür ower woarscheinlich nid sou viel gelaarnd.

Zu dan Ensemble vo die gläne Schuel hoad a die Kirch gehöard. Der Eingang woar ugfahr doa wu ar hoid a is, blos noach Nordn versedzd. Beim Eingang vo die Schuel gäecheüwer is es nei die Sagrisdei gange und weider noach rachds woar, wie hoid a, dar Eingang zum Bfoarrschhaus, wu om Sunndich noach die Kirch die Bücherei geöffned woar und mer sich e Buech für e boar Bfennich ausleih konnd. Ich koann mich nou gued o die Karl Mey Bücher erinner, ich hob alle gelaasd, die doa wuern. Gäicheüwer vo die Schuel, üwer die Schdroass düwe, woar des Radhaus und ouwe dinn dar Schulraum für die gröaßere Kinner. Des is doa wu hoid dar Musigverein mid sei Kabelle din brobd. Beim Eingang zum Roadhaus is es e boar Schdufe naufgange und doa ouwe hoad dar Bürchermäsder, ümmer om Sunndich noach die Kirch, sei Bekanndmoachunge gsochd. Die Menner sen ausse rüm gschdanne, bevor se dann zum Löser zum Frühschobbe und zum Käichln sen. Freilich hömse alles Noie soufurd disgudierd, wie des hoid a gemoachd würd. Die Frauen dogäiche sen nie doagebliewe, außer vielleichd diejeniche, wu dahäm die House ohadde und ihrm Moo nid gedraud höm beim Zuhöarn. Die muessde gleich noach die Kirch höm, weil dar Broade scho wäch woar und jedz die Glöas droa wuern.

Rachds vo dan Roadhaus woar nou soe e alds Häusle gschdanne, ziemlich eigewoasse mit Holunder oder wilder Wei. Des woar des Rüdzhaus. Vorhar woarn Flüchdlinge din und schbäder woarsch verfalle und die Schoiwe kabud, sou dass mir Kinner neigegladder konnde. Elles zom woarsch scho e Ormedei, wie die Zeid hald doamoals woar.

Ower genau wie hoid woar des drozdem organisierd und hoad geglabbd. Es woar a Zeid wu mer sich hoad durchbeiss müess. Es hoad lang nid elles gawe und mer muessd sich eischräng. Mer is schdoarg wuern und moanchmoal hob ich des Gfühl, dass es unner Juchend a vielleichd gued due däd, zu wüsse, dass nid alles doa is und dass nid alles selbsdverschdändlich is und mer sich moanchmoal wirglich einschräng muess.

Ich möuchd die alde Zeid noch amoal erleb, ower blos um genauer zu wüsse, wie des alles obgelaffe is, weil die Erinnerunge ümmer weider verblasse. Ower wie mei Couseng gsochd hoad, drodz unner kläne äfoache Schuel und des woas mer scheinboar alles versämmd hoad, weil zu viele Kinner auf än Haufe woarn: „Ich gläb die Kinner vo hoid sen a nid gscheider als wie mir doamoals wuern“. Doa wüerd er woarscheinlich rachd höm.

FriedrichAlbinOT, 231016