HOIT WÜRD DIE SAU GSCHLOCHT, TEIL 2

Hoit würd die Sau gschlocht

Teil II: Dar Soischwenzleskönich

Inwische woar dar Fleischbeschauer do und hoat sei Probe aus die Sau rausgschniede, hoat se uf die klänne Glosschoiwa geleicht und unter dan Migroskop ogeguggt. Des woar wache die Trichiene, des sen sou kläne blöde Viecher, die für die Mönscha nit gsund sen. Scheinboar a gfährlich für dan Fleischbeschauer, weil dar hoat vor die Arwed schue viel Schnaps trink müess wache dara Desinfektion und vielleicht hoat er a Licht gebraucht, weil sei Nosa manchmol schüa geloicht hoat. Und des hoat a nou Geld gekoust. Ich hob mich ümmer gfräecht wie dar die Viecher nou gsah konn.

Daus is es Schlochte scho weitergange. Des Bauchfätt is rausgschniede woarn und in en Hofa uf en Oufe kumme zum Ausloasse. Des haat später dan Schweinschmalz gawe und dar is nei e Höfele zum Aufhäin kumme. Des wos ü woar vo dan Fätt, woarn die Griefelich und ich gläb die sen ausgebackt woarn und nein Griefeschmalz oder nei die Geröasta kumme. Da löft mir scho des Wasser im Maul zom, wenn ich dovo schreib. Dar Voadder hoat jetz die Sau zerläicht. Des Flääsch wos eigfruen woarn is, zum Beispiel die Schnitzel, die Rippstücke und dar Schinke, des is zur Seite kumme und des wos mer für die Wuerscht gebraucht hoat, des is noach und noach nein Kessel kumme und gekoacht woarn, dar Koupf, die Schwoarte, die Füeß und des mäste vom Bauch. Ja, mer muesst scho ümmer fäist Holz nei läich, dass dar Kessel ümmer genuch Daampf hat. Des woar a mei Aufgabe. Soulang des gekoacht hoat, is des Flääsch weiter verarwerd woarn. Dar Schincke is zuracht gemoacht woarn, dar Broata is zugschnitte woarn, die Kuetlett sen zertäält wuern und des is elles nei e Wanne kumme und später eigfruen woarn.

Des Kesselfläsch is des, wos es Schlochte ausmeicht, wenn des aus em Kessel rauskühnt und uf en Tüüsch liecht und dampft. Du konnst dir vo allem wos rogschneit, vom Koupfflääsch, vom Bauchflääsch, vo die Nierlich, vom Haz und vor allem dar Soirüessl woar für mich e Delikatesse. Dar schmeckt ungfahr wie Schwoarte und Fläsch zom und is vo die Konsistenz sou wie e Zunge. Und des frische Broat dazu! No biste nü nein Kaaler gschickt woarn und host en Hofa voul Moust houl müess und davo höm sougor die Kinner amol trink döff. Jetz ist die Schneiderei vo dan gekoachte Flääsch losgange. Des ganze fätte Zoich, elles is vo die Knoache rogekieft woarn und des is dann aufgetäält woarn. Des für die Bluetwurscht, des für die Flääschwurscht, für die Lawerwurscht und die Broatwurscht und monchmaol hoats a nou a Streichwurscht gawe. Inzwische sen die Dierm geputzt gewaast. Daus on Stücht hoat se de Voadder inenaner neigstülpt, also des Oißere noch Inne und des Innere noch Auße, weil do is später dar Wurschttääg neigfüllt woarn. In dan Zwölffingerdoarm die Lawerwurscht und Broatwurscht, in en Dickdarm die Bluet- und Flääschwurscht und in dan Schwoartemocha und in die Bloase, entweder Bluetwurscht oder Flääschwurscht mit extra dicke Fättbrocke. Mei Voadder hot die Wuscht äfoch sou gewürzt, ohne e Rezept. Die Schüsselich mit die Gewürze woarn do gstanne und dann hoat er amol do und amol duert neigelangt und elles in dare Kufte vermüsschelt und färtich woar die Wuerscht. Zum Wüerze hoat mei Voadder ümmer sei Gebiss raus, damit des nit sei Gschmacksnerve verdeckt und nit nei dan Tääg fellt. Es hoat ower ümmer guet gschmeckt und vor allem sei Broatwürscht woarn a Gedicht. Daswache hömmer die bei uns ach am häliche Awed gesse, weil se äfoch sou guet woarn. Mir Kinner sollte dan Wurschttäg ümmer probier, ower mit dara Bluetwurscht woar des nit sou äfoch. Ar hoat dann zwä Finger genumme, nein Tääg gelangt und die Finger durch sei Lippe gezouche, dass des Bluet links und rachts rogelaffe is. Ar wollt uns blos ärcher, mir woarn des ower gewöhnt. Die Wuerscht is dann nochenanner nein Kessel kumme und wenn se färtich woar, is se ouwe in die Suppe gschwömmt und du hoast gewüsst, die is durch und konn raus aus die Brüh. Monchmol is a e Wurscht aufgeplatzt und dar ganze Tääg woar in dare Brüh din, des hoat auf jeden Fall a kräftiche Suppe gawe. Des wos gerächert war söllt, is jetz o Stecke aufgehöngt wuern und es hot schüe ausgsahn, wenn die Würscht, äne nawet die annere uf dan Stecka gehengt woarn. Und monchmol hoast de dich gewunnert, weil bis hoit früh die Wurscht nou e ganze Sau woar und rümgegrunzt hoat.

Ja, des Sauwermoacha woar a nou a Stück Arwed. Dar Bouda woar voul Fätt und dar Tüsch a. Des is blos mit häss Wasser wieder wag gange. Insgsamt kommer gsooch, dauert sou e Schlochterei für a poor Loit en ganze Tooch, und danach biste a mued, weil de gschafft hoast und weil de mol wieder viel zu viel gesse hoast. Ower es hoat sich bis hoit rentiert und wenns irchendwu Kesselfläsch gait, möicht ich mich a o en Tüüsch hiestell und äfoch sou a Stück Rüessl neischieb.

Ich hobs nit gemierkt, dass ich desmol dar Soischwenzleskönich woar. Des würd darjeniche, dem des obschnittene Soischwenzle hinna am Gürtel gehegnt wird ohne dass ersch mierkt. Da bin ich halt dan halwe Tooch mit dan Soischwenzla rümgelaffe. Ich hobs erscht am Mittoch gemirkt, weil mir dauern die Katze nochgelaffe sen und des woar ganz ungewöhnlich. Woahrscheinlich hoat des Schwenzle scho a bissle es müche ogfange. Awer liewer dar Säukönich für än Tooch und du konnst dafür Hiern, Flääsch und Wurscht gess. Mer muess ja a vo woas groas war.

Die letzte Arwed o dann Toch war, dass mer die Wurschtsuppe ausgetroche hoat o die Bekannte und die Nochbern. Mäst is nou e Würschtle mit nei kumme und des woar guet, weil wenn die gschlacht höm, is des Würschtle wieder zurück kumme.

Des Schlochte woar also äne vo die ganz wichtiche Erlebnisse vo mei Juchend. Und wu konnste du e Schochtfest hoit noumol gsah? Goar nit!! Drüm höm a viele Loit überhaupt kä Verhältnis mehr zu Tiere und zum Flääsch. Guet, zur Katz vielleicht, awer die wärn momentan ja a nit gschlocht.

Ower seim Nahrungsmittel früh am Muerche nou nei die Aache guck, des is wos Besondersch!

Fao210322