Gückseelichs Nois Joahr

Gückseelichs Nois Joahr

Ich übersetz des amol für die, die unner Sproach nit sou mächtich sen, weil des is sou a schües Wuerd, des uf ämol elles ausdrückt. „Glückseeliges Neues Jahr.“ Da steckt elles din wos mer jemand anerschter wünsch konn, wenn sou a alts Joahr obgelaffe is. Mer säicht des ower erscht am Noijoahrschtooch, wenn mer zu die Nöchber oder zu die Verwandtschoft gähet. Bei mir is des in än Joahr amol ganz e goar ausgfalle. Insgsamt konn mer dazu soch, Silvester hob ich nou bis dreiviertel elef derlabt und nocher woar a Zeitsprung bis zum 2. Januar und ich woar im Bett gelache, wie ich aufgewacht bin. Woarscheinlich irchend e Schaltjoahr. Vor lauter Koupfwärdi hob ich ower a nit gleich normal denk könn, bin nei mei Dabbe und auf en Abbort. Duert hob ich gedocht, es is nit verkäehrt wenn ich mir elles nou amol durch en Koupf gieh los. Also hob ich es würche ogfange und wirklich ist nou sou a Schwall Brüh kumme und dar hoat ümmer nou sou en hochprozentiche Gschmack ghot, dass die Luft fast gebrönnt hoat. Do is mer des määste wieder eigfalle.

Es woar Silvester Owed und ich woar mit meim Brueder beim Nochber. Doa woarn mir öftersch, blos hoit hoats do Schnaps gawe, es sollt ja gfeiert war. Wenns när e klä Gläisle gewast wär! Es woar ower sou e groasses Trinkglos voul mit Wodga. Des hob ich mir bis hoit gemirkt, weil die Floasche ümmer nou genauso aussahn und jedesmo, wenn ich sou a Flosche sah, hob ich des Gfühl als heibst mich schue wieder. Guet, mir woarn jung und wollte elter sei, halt schue wie e groaßer Mo, also hob ich des ganze Glos uf än Ruck rausgetrunke. Ich woar richtich stolz, weil ich des gschafft hat. Es hoat gebrönnt, wie wenn du glühende Kouhle gessa hattst. Und wenn du a Broatwurscht nei die Pfanne leichst und es is zu hääß und die Wurschthaut platzt auf, sou muess es meim Doarm a gange sei. Ich hob richtich gemirkt, wie des inne din platzt und scho muesst ich a aufs Klo und hat en gscheite Dünnpfiff. Der Doarm hoat soufurt gemirkt, dass irchendwos nit stimmt. Bis nei Koupf woarsch ower nou nit kumme, drümm bin ich mit meim Brueder weitergzoucha, weil mir bei die Nochlschmieds im Ünerdurf weiterfeier wollte. Bei die Nochlschmieds im Onbau woar a kläne Pardy und do höm mir a nou wos gesse und woarscheinlich a nou wos getrunke. Dar Wach bis durthie woar extrem weit, weil wenn du uf e grode Strecke lauter Kurve läffst, verlängert sich dar Wach ganz schüa. Mir isses gläb ich guet gange, ower mei Brueder hot scho en ganz schöne Drall gehot und ich hob en grod nou sou bis dohie gebrocht. Es woar jetz halwer zwölef und ich hob mich gewunert, worüm des Foierwerk jetz schua losgähet. Überoll woarn sou kläne Sternpfuzzer und sou roate und grüene Explosione, wu ich gedocht hob, no, die Nochlschmieds höm sich ganz schüe ogstrengt, dass mir a schüene Pardy höm. Domols bin ich auf sou e Mädle obgfoahrn, e schues und mochersch Mädle, e bissle jünger wie ich. Die woar a do, ower ümmer wenn ich se ogeguckt hob, is se wie e Luftballon o die Decke gschwebt. Sie hoat mir zwoar gewunke, dass ich zu ihr hiekumm söll, ower bei dann gebouchene Wach hob ich mich nit getraut. Ich fräch mich bis hoit wos gewaast wär, wenn ich die poar Meter domols gschafft hätt. Äns muesst ich ower schaff. Ich muesst ubedingt omol naus weil dar Schnaps wieder aus die Bloase naus wollt. Mei Brueder woar scho am Miest gstande, also ich hobs gemähnt, denn wie ich noumal hieguck, woar dar scho im Mist dingelache. Ich hob ogfange en Rettungsplan zu üwerleiche, muesst ich ower nit lang, denn kurzentschlosse bin ich a mit neigfalle. Mei Koupf hoat gedampft, oder dar Mist, des konnt ich nit unterscheid und mei Füess woarn do, wu sich die Sudde in a groaße Pfütsche sammelt. Guet, geroche hob ich jetzt nix, dozu woarsch zu kaalt. Ower des Foierwerk im Koupf hoat sou zugenumme, dass ich gedocht hob, nix wie häm. Dar Hämwach wor äfoch, weil mir woarn im Raumschiff Orion und sen, ächentlich mit e schüens Gfühl, durch die Luft gschwebt. Nocher is des Raumschiff in die Dunkelhät vom Weltall verschwunde und hoat nou sou en glühende Schweif hinner sich hargezouche.

Dan Schweif hob ich ümmer nou nochgeguckt, wie ich zwä Tooch später aufgewacht bin. Und dar hoat gstunke, dar Schweif, oder woarns die Bröckeli vo – no es muest, noch en Aussahn, Gulasch gewaast sei – dar nix mer in mein Moche blei wollt und jetz im Bett schua ogetruckelt woar. Ich hob danach nou amol zwä Tooch gebraucht, bis ich elles sortiert hatt.

Ja, a sou ko mer des noie Joahr ogfang, a wenns kä Glückseelichs nois Joahr war. Ower hoit denk ich, des muesst mer a erscht amol überleb. Und des Guete woar, ich hob bis zum hoitiche Tooch känn sou en Rausch mehr gehot.

fa210221