Dröschmaschine, drei Löcher und Stroisslkucha

Dröschmaschine, drei Löcher und Stroisslkucha

Wenn ich sunst mei Kinner gfräecht hob: „Wüsst ihr wos e Dröschmaschine is?“ No höm die gsocht: „Freilich wüsse mir wos e Wöschmaschine is!“ Nä, des hob ich ower nit gemähnt. Dann hob ich erklärt, wie des früher woar mit dann Geträd, mit en Hower und die Garschta und dann Wäss. Es woar halt e bissle schwiericher als hoitzutoch mit dara modäerna Mähdröscher. 

Des Dröscha woar ümmer e aufrechende Sache. Für die Erwochsene worsch a mueds Arwed, sie höm sich arch geploacht und hom alle zomgeholfe. Für uns Kinner worsch e schüene und aufrechende Abwechslung. Meist is es lustich zugange, weil es woarn viele Loit do zum Hölfa, die Arwed is vo die Haand gange und mästens woar sou e Schoier voul Geträd bis Oweds fietich gedröscht. Die Weiwer woarn im Stroah, höm des erscht nausgelangt auf die Maschine und noch em Drösche höme se die Stroahbüschel wieder neigsetzt, damit für die Viecher noch em Ausmista genuch truckenes Stroah do woar. Mästens hoats Kuche gawe und dar is nou richtich im Oufe gebacke wuern. O die Ecke vo die Ödelsgasse zur Hauptstroaß hats nou sou en Backoufe gawe. En liebste hob ich Stroisslkuche gesse, dar Kaasplootz woar ower a guet. Und wos woar des für e Genuss, wenn sou e ganzes Blaach früüsch vom Oufa rauskumme is. Oder es ist direkt im Oufa gebackt wuern und is danoch auf des runda Briet kumme und es woar die Grönung wenn du gleich e Stück dovo griecht hoast.

Wenn die Dröschmaschine kumme is, die is ja vo Houf zu Houf gezoucha woarn, woar des wie a Umzuch. Dar Lanzbulldog hat se gezouche, und dar is ganz schö rümgehopft, bis die Maschine o die richtiche Stelle gstanne is. Nacher ist dar Flachriema o die Riemaschoiwa vo dan Lanz hiegemocht woarn und scho is des technische Werk mit a mueds Getös losgelaffe. Die Dröschmaschina war a änzichs Wunderwerg. Üweroll hat sich wos gedrähet, es hoat einen Lärm gemocht und wenn se richtich in Foahrt woar, hats ganz schüe gstoit, dass e richtiche Wolke im Houf gehengt woar. Die Hölfer woarn ümmer guet drauf und hatte bei dara schwäre Arwet sougor en muerds Spoaß. Ich gläb, dass zuerscht dar Bulldog do woar und danach woar die Entwicklung scho wieder weiter gange. Dann hoat mer sou en Elektromotor uf sou en kläna Wooche gehot und dar is o dan Stoarkstrom ogschlosse woarn. Irchendwo im Durf woar a Onschluss und vo do aus hoat mer dan Strom nei die Höuf verleicht. Dazu sen sou ganz dicke Kawel durch es Durf gezouche woarn und doadro ist dar Motor ogschlosse woarn. Mir Kinner muesste ümmer die Kawel vo än Houf zum annere Houf zieh und mir hatte e mueds Fräd dabei, vor allem weil mir dafür dan Stroisslkucha griecht höm. Vourne ou dan Stecker woarn drei Löcher und do woar dar Strom scheinboar din gewohnt. Des hob ich zu dara Zeit nou nit gewüsst, nit amol wos Strom überhaupt is und a nit, dass mer dan Strom in die Kawel nit stör döff. Awer ich woar ümmer experimentierfreudich. Es woar beim Ziehn vo die Kawel äfocher, wenn du die Finger nei die Öffnunge vo dan Stecker gsteckt hoast, do konnste viel besser ogepack, weil dar hat scho a Gewicht gehot. Hob ich halt gedocht! Des hoat dan Strom, denk ich, ziemlich gstört und ar hoat zurückgschloche. Ich hob änne gepätscht griecht, dass es mich richtig vom Bouda gehouwe hoat und nocher woar ich duert gelaache und hat nou sou en Blitz in die Aache.  Erscht konnt ich mich goar nix mer beweich, mei Fingerspitze woarn versengt und höm nou a bissle geraacht, mei Oarm hot wäha getuen und ich hob nit gewüsst, worüm ich jetz do liech. Es hot nix genützt, ich muesst des Kawel trotzdem nou bis zum anere Houf ziah. Ich hob dann meim Voater erzäihlt, dass ich sou en Schlooch griecht hob, weil ich mei Finger do nei die Löcher gsteckt hat. Ich hob mir des ower für alle Ewichkät gemirkt.

Mei Voater hot blos gsocht: „Wos langste denn a mit dei Griffl überoll hi, du Dollack“.

Ich hob e weng gebleckt, weil mir die Finger nou wäah getuen höm. Na hot er mich auf en Bobadegl nawe die Tröppa gsetzt und gsocht: „Do bleist de jetzt sitze, zum Dunnerkeil noch amol“.

Ar hoats ower nit sou gemähnt, weil er hoat zum Onkl gsocht: „Dar hät hi sei könn, dar Bua“! Scheinbor hoat ar a dan Strom scho mol kennegelant, vielleicht a scho wie ar nou klä woar. Nochher hoat ar mir nou e groaß Stück Stroislkuche gebrocht, sou en richtiche Keil, und ich hob gemirkt, ar woar froah, dass ich überhaupt nou Stroisslkucha ess kannt.

Es gait halt nix über Stroislkuche beim Drösche. Dar is für elles guet. Dafür steck ich a mol wieder mei Finger in die Löcher vo dann Stecker.

Naa, liewer nit, sunst brönna bei mir nou mehr Sicherunge durch.

fa210204