Wenns emol wieder nix Gscheits zu esse gait

Wenns emol wieder nix Gscheits zu esse gait

Mei Frau hat des Gfühl gehot sie müesst emol wieder a poar Kilo abgenahm und hat daswache a Diät durchgezoucha, sou a Null-Diät. Da isst du goar nix, nit amol grües Gemües. Sie woar ziemlich tapfer und hoat des die ganze Woche durchgehalte und hoat gsocht, dass se ächentlich die ganze Zeit kän Hunger gehot hoat. Jetz isst se wiede,r ower sie bemüht sich gleich um a richtich ausgewochene Ernährung. Früh isst se goar nix, trinkt blos an Liter Wasser und zum Mittochsessa gaits alleweil ümmer sou en Hofa voul Gemües. Weil se määnt mir täts a guet tue oder es wär sougor oarch noatwendich, söllet ich a unbedingt mitmoch. Ich hob nix gäicha an Gemüeshofa, dar schmeckt mer sougor richtich guet, vor allem, wenn wie in dan Fall hoit, sou a Schoiwa Rinderbä mit neigekoacht is. Doch, es hat guet gschmeckt, ower ich hat direkt a bissla Angst, dass des Sättichkeitsgfühl nit sou lang ohällt wie ichs gewoahnt bin.

„Bestimmt hob ich um Dreiviertelzwä scho wieder Hunger“!

„Du wirscht doch d0 nit schue wieder Hunger höm, es woar doch alles din wos dei Körper braucht, sougor Fläsch!“

Wenn die wüsst wos mei Körper grod braucht! Ich hob nix gsocht, ower ich hat nou in mein Koupf dan letzta Toch, wus des gsunda Essa gawe hoat. Do hob ich in der Nocht geträmt, ich wär en Afriganer und durch die Dürre seit drei Joahr tät nix mer woachs und mir hätte nix zu Essa in der Hütte und im Mocha. Des woar so schlümm, dass ich in dara Nocht aufgstanna bin und hob mer vom Kühlschrank a Knackerle geholt und hob des gessa.

Ich hatt hoit dan ganza Vormittoch gearwet, war mued und hob mich noch dann schwäre Essa hiegeleicht zum Ausruhn; oder vielleicht soch ich besser noch dan Äsen, weil es woar ja blos grües Zoich. Und wos söll ich soch, ich kenn halt mich und mein Körper seit ich auf die Welt kumme bin, pünktlich um dreiviertelzwä hot mei Mocha es rumpeln ogfangt, weil sich die Dierm zamgezoucha höm. Ich bin jetz dreissich Joahr verheiert, und mer söllt män, dass die Fra a dan Mocha vo ihrn Mo kennt. Mein Bauch kennt se dafür genau und wäss ümmer, wenn dar wieder zugenumme hoat. Also söllt se a wüss, dass dar Mocha hinner em Bauch is. Weil des Organ sou gegrummelt hoat, bin ich so mal im Koupf unner ganze Vorräte im Haus durchgange, damit ich wäs wu ich hie muess, im Fall dass ich kä Kroft mer hob. Des hot mich wieder a bissle beruhicht und ich hob bis zum Kaffee durchghalte. Ich hob gewüsst, dass mir, laut meiner Liste im Koupf, nou truckene Chrisstolle im Schrank höm, und weil dar wag muess und mei Frau nix wagschmeiss kann, hob ich mit ihrm Einverständnis davo sou en Keil gessa. Jetzt ham mer direkt wieder besprocha, wos es zum Awedsessa gab söll. Bevor ich soch konnt, dass ich ja mol zum eikäfe gieh könnt, hat se scho den Menüplon für aweds fertich gehot. Es woar kä groaße Überraschung, es sollt dan Rest vom Gemüeshofa vo hoit Mittoch gab und wenns nit lang tät, hätte mer nou Lauchsuppe vom Toch zuvor. Mei Kroft hatt scho nochgelosse und daswache hob ich mich erscht amol wieder higeleicht und nochgedocht. Nä, ich muesst äfoch zum eikäfe gie; des hoat mei Stimmung soufurt wieder gebessert.

„Käf nit sou viel, mir höm nou Broat eigfruen und Aufschnitt, dar müesst amol gessa war“.

A wenn ich Hunger hob, ower alter Aufschnitt is nit sou mains, vor allem sah ich dann ümmer soufurt sou braune Ränder dro und dann isses vorbei mit meim Apetitt. Es woar inzwüscha sechs Uhr und ich bin zum Gschäft gelaffe. Mein niedriche Zuckerspiechel hob ich gemirkt, weil mei Bä woarn ziemlich schlabbrich und ich bin öftersch gstolpert als normal. Im Koupf wur mei Einkaufsliste fertich: ich wollt Steegs, Weisswürscht und Spärribbs mitnahm, no könnt ich derhäm ausgewähl, wos ich ess will. Sou Grumbernecke hatte mir nou eigfroan und en Zulot wär schnell gemocht. Ich hob dann die Spärribbs mitgenumme, dazu Schokoreisbrei in sou en Becher und e Erbeermilich. Wenn ich Erbeermilich käf, gäats mir nit sou gut und daswaache hob ich uffn Hämwach erscht amol sou a Infusion mit Erdbeermilich gemocht. Ich hob mich nei die Bushaltestelle gsetzt und gewoart bis die Kraft für dan restlich Hämwach wieder do woar. Ich hatt mir gedocht, dass ich die Spärribbs nein Ofa tue, ower wie ich die Haustür aufmach, hob ich scho geroche, dass dar Hofa mit Gemües scho wieder wormgemocht wurn is. Es woar zum Glück nou sou a Rindsbäschoiwe do. Mer konn des Mittochs und Oweds ess, muess mer ower net.

„Ich schaff und schaff und dann griechste blos Gemues zum Essa“!!

Des hob ich amol sou nein Raum gstellt, ower mei Fra hots äfach überhöart. Noch em Essa hob ich Spuert gemocht, also des Handballspiel geiche Spanien geguckt. Also wenn de Hunger hoast, anou des Spiel verlierscht dann isses blos vo Vorteil, wenn de jetz dann mitgebrochte Reisbrei mit Schoggo nou ess konnst. Wie guet, dass ich dan nou gekäfft hob.

Dan Tooch hob ich rümgebrocht, mästens gehungert, und hob dann trotzdem jede Menge Kalorien in mir din gehot. Do hät ich a gleich Kuetlett mit Bommes ess könn. Des wär dieselwe Menge o Enerchie gewaast.

fa210130