Mach när sou weiter

Mach när sou weiter

Mer konn des verstieh als Aufforderung, dass mer des, wos mer grod mäicht, äfach sou weiter meicht. Ja, wenns änner schua sou säicht, nacher meicht mer des a sou wie dar des saicht.

Die Sunntichskirch hat pünktlich ogfange, ich woar mit em Voater in der Kirch ouwa die Empor. Vurna dro o die Empor war e Absperrung, wie e Gitter und do konnt mer noo nei die Kirch guck. Jetz is des für Kinner in meim Alter nit sou interessant, vor allem, wenn die Kirch racht lang dauert. Ich wäs a nix mer genau, war ich 4 oder 5 Joahr alt, es woar awer sou, wenn mei Voater die Bä brät gemocht hat, hob ich nou guet unta durch laf könn, und mei Voater woar nit sou groaß.  Die Zeit hot sich o dan Sunntich wieder gezoucha und daswache hob ich dan annere Bua beobacht, dar wu a poor Bä weiter noch links gstanna is. Dar is a bei sein Voater durch die Bä getanzt und hat ümmer „Döff Döff Döff die Eiseboahn“ gsunge. Des Lied hob ich schua gekennt und da wollt ich natürlich mitmach. Dan sei Voater wor in Andocht versunke und sou hot dar des goar nit sou gemirkt. Ich hob gedocht, wenn dar Bua des döf, dann döf ich des a, also hömer „Döff Döff Döff“ zwische die Menner ihr Bä durchgemacht. Dara groaße Menner hat des gfalle, weil die höm feist mitgemocht und ümmer „Schscht“ oder „Bschtt“ gemacht, genau wie sou e modäerna Logomotiv des a meicht. Mei Voater hat erscht a e poor mal „Schscht“ gemocht, nacher hot er mit seim Finger ganz willt nawe sich auf en Bouda gezeicht und ganz streng geguckt. Wahrscheinlich wollt er, dass ich mit mei Eiseboahn zu ihm hifoahr. Des hob ich a gemocht und mich gfräht, dass er scheinboar a mitspiel will. Jetz hot er ower gered und gflüstert: „Du bleist jetzt do bei mir du Sakaramenter!!“ und kurz danoch: „Mach när sou weiter!“. Ja als Kiend verstähest du vo moncher Sprichwürder dan hintergründiche Sinn nou nit sou gaanz, oder a gor nit. Ich hob des ganz wörtlich genumme, hob micht gfräht und bin, weil die unta grod mit dara Wandlung ogfange hom und die Ministrante mit dara Schelle geklingelt höm, mit mei Eiseboahn, durch die Bä vo dara Menner, wieder abgedampft. Ich und mei Eiseboahnfroind hatte guete Logomotive, ich woar dar Logomotivführer und sou sen mir hi und har auf die Empore rümgfoahn und weil sou viel Loit im Wag wurn, höm mer a nou richtich laut mit dara Dampfsirene ghupt, und weil grod die ganze Kirch in dara stille Andocht wor, hast de unner „Huuhhh Huuuuuuuh“ bis vuerne nein Altar ghört. Die Helft vo dara Menner hatte mer scho richtich abgelenkt. Dara hot des gfalle, ower sie konnte nix mer sou ondächtich sei. Ich wollt grod nou amol in die annere Ecke hinner die Orchel neifoahr, da mirk ich wie mich plötzlich a Haand packt, aus die Ecke rauszärrt und scho woar ich mit dem Voater auf en Hämwach. Ich hat gor net mitgriecht, dass die Kirch schue aus woar, awer mei Voater woar a bissle komisch, hat nix gered, vielleicht weil er nou in die Andocht woar. Wie mer dahäm wurn, hob ich grod gedaocht „Auele, des gäet nit guet“, und richtich, sou schnell hob ich nit geguckt, hat er mich sou richtich durchgeduchtelt, obwohl ich nit sou richtich gewüsst hob worüm. Dabei hot ar doch gsocht ich söll weitermach – mit mei Eiseboahn.

Des Ganze hob ich schnell wieder vergesse bis zum Mittochesse an en annere Sunntich. Ich hat irchend sou a Heftla vo Miggimaus, hat des bei mir uffn Schoß und hob des beim Essa durchgebläittert und als zu neigeguckt. „Mach när sou weiter!“. Hoppla, da woar wieder dar Satz wu ich scho schlechte Erfohrunge gemocht hatt. Ich hob mich ümgeguckt, ower ella höm gessa, also hob ich gedocht, vielleicht hob ich mich verhöart und hob unter em Tüüsch weiter gebläittert. Wenn du sou wie sou grod auf wos annersch unter em Tüsch konzentriert bist, na hoast du ouwa wenich Áufmerksamkeit und daswache hob ich die Backeschelle gschpürt und goar nit gsahn, wie se kumme is. Es hoat ganz schö gerumpelt, mei Taaler is rogfalle, die Suppe auf en Bouda und des Heftla is nein Suppahofa gfloucha. Des woar a Huennersuppe mit sou dicke Fättaache, die wu ouwe druf rümgschwumme sen. Da hob ich aach wieder e Lektion gelernt. Fättaache vo die Hüennersuppe vertrocha sich nit mit sou a Miggimausheftla, weil des is donoch total zerfalle und war zu nix mer zu gebrauche. Ich hatt doch jetzt zwämol des gemocht wos ich sollt, und trotzdem hob ich mir a poor eigfange.

Vo dann Toch an hob ich wohrscheinlich ogfange, nix mer auf mein Voater zu höarn, weil ich Angst hat, dass ich wieder änne griech und hob daswache ümmer des Geichatäl gemocht.

Irchendwann hob ich dann ghört, wie er zur Muetter gsocht hat: „Dar Routzlöffel höart ja überhaupt nix“.

Ja Voater, hätts de liewer des sou gsocht wie de männst, oder wie ich des verstieh hätt könn! Da bist de jetz grod amol selwer schuld.

fa210115