CIA und FBI

Dar SiAiEi (CIA) verstähet kä Frängisch

Jetz hat dar Präsident in Ameriga Gott sei Dank nix mer zu soche und daswache konn ich jetz a amol wos gschreib. Die ganze Zeit hat ich scho Lust dazu, ower wenn mer nit wäß wies endgültich ausgäet, is mer nou vorsichtich und wöet erscht amol ob. Schließlich kümmt mer vielleicht a mol wieder in die Juneidid Staits und wenn die SiAiEi des gelaase hätt, hätts vielleicht Nochteile ghot. Sou is des Frängisch wie a Geheimsproach, da muesse die erscht amol än ho bei dan Amt, wu des üwersetz konn, damit dar Dramp des verstähet.

Also, wos söll ich soch, dar Dramp hot ja scho worscheinlich än o die Waffel und sei Schola im Schrank sen arch verruetscht. Und sowos is Präsident woarn. Hat dar üwerhaupt amol awos gschafft in sei Lawa oder bloos Fernseh geguckt und Nochrichte nei sei Köestla getippt? Und wie dar red! Do mäicht unner Enkelin schua fast schüene Setz wie dar. Setz, wie wenn er nou in die Volksschuel wär und üwer die örschte poor Klassa nit nauskumme is. Ich verstieh ja gornit, worüms a bei uns nou Loit gait, die wu dann guet finne und socha: dar hoat ja känn Griech ogfange. Dos stimmt, ar hot ower a sunst gor nies erreicht, vielleicht a poor Meter vo sei Mauer weitergebaut. Des nützt ower a gor nix, weil de do ümmer noi links und rachts vorbeigie konnst. Und wos dar geloucha hoat, jedn Toch mindestens a poor Lücha; als Katholischer muesst dar auf jedn Fall amol direkt neis Fechfeuer, oder jetz muesst na amol dar Blitz von Himml ro sei Hoar verseng.  Nä, ich könnt mich richtich aufgeräich üwer sou an Mönscha, ower die Amis sen selwer Schuld, die höm ne ja schließlich a gewählt und des freiwillich. Des passiert halt, wenn mer sou e alts Wahlverfohre hoat und nit bereit is, des amol zu ändern. Do passierts ja, dass änner gewinnt, dar wu insgsamt viel wenicher Stümme griecht hot, des muess mer erscht amol verstiehe. Bei unner nächste Wahl in Doitschland kamer soch, egal war gewinnt, dar is ümmer nou taused mal besser wie dar Ami. Dar Dramp ist nit blos a Lücheboitl wie ar im Buech stähet, sondern ar is a e Verleuchner vo Tatsache, die wu äfoch kloar sen. Für dann geits ümmer nou kä Corona und kä Pandemie, obwohl grod im Amiland sou viele dodro gschturwe sen. Es hot ne zwoar a derwüscht, ower es hätt ne nou viel schlachter tröff könn oder muess. Guet, er hätt nit gleich starb müess, ower wenichstens hätte sei Finger schwoaz war müess und sei gala Hoar hätte raus fall müess. Ower wohrscheinlich is des eh e Parücke. Dar tuet ümmer sou, wos ar füer e schwierichs Lawe hoat, weils total anschtrengend is, nawa dann Golfspiele a nou die Politik in sou an Toch neizubrenge und ar määnt jeder müesst ne dafür bewunner und wenn mersch nit mäicht, und nit denkt dar is dar Beste uf dare Welt, nocher fellt mer soufurt in Ungnade und kriecht a ESEMES, dass mer nix mer auf sei Pöstla is. Ar verstähet a nit, worüm ar noch dara Wahl kä Präsident mia is, ar hat sou viele Stimme griecht wie kä annerer vorhar, seicht er. Dar Baiden hat viel mehr Stümme, ower des sieht dar nit. Liewer säicht er ümmer nou, dass ar die Wohl gewunne hoat. Geits sunnst wu nou sou viel Ignoranz auf dara Welt? Ich als Ami tät mich ganz oft schaam, viele moches a und höm racht domit. Ich schaam mich a e bissla, weil dar schließlich a Vorfoahre vo Doitschland hoat. Zum Glück wäs dar gor nit wu Doitschland liecht, weil Haimat und Sachkunde is bei dann ausgfalle, weil ar schue sou gscheit uf die Welt kumme is. Ich gläb ower äfach, als Kind wor dann sei Schaukel zu noah o die Wand gstanna. Oh, wos könnt mer üwer dann geläster, des tät a dicks Buech ga, ower ich bin mir sicher, des mache annere schoa.

Ich fräh mich auf jedn Fall über die noi gewählta Loit in Ameriga, des spüet sich o, als wenns bald an noie Wiind gait und die ganze Welt a wos davo hoat.

Ich fräh mich a, dass weder bei dara SiAi Ei noch beim EfBiAi Agstellta sen, die wu unner Geheimschproch „Frängisch“ verstieh könne. Sou kannst dich ausgeloss wie de willst.

„Meig Ameriga gräit ägän“ is vorbei. Ich bin gschpannt, wies weitergäet mit dann Dödl, vielleicht muess er ja a nou nein Gfängnis nächstes Joahr, wenn ar sich vorhar nit nou selwer begnadicht.

fa201230