Eisblume sen ausgschturwe

Eisblume sen ausgsschturwe

Ella reide vo dare Umwelt, vo dare Pflanze und Tiere die scho ausgsschturwe sen und wie orch mir Mönscha mit unner naturfeindlichs Verhalte do dro Schuld sen. Ich möicht hoit amol o e Blume erinner, die mei Generation nou hoifich gfunne hoat, hoitzutoch is se awer verschwunna.

Unner Kinner hob ich gfräecht, ower die kenne die gor nix mer und ich hob se a scho seit Joahre nix mehr gsahn. Es is daswache sehr wohrscheinlich, dass die in die letze Joahre äfoch ausgschturbe sen. Sunst hattst du die im Winter überoll gfunne, mästns sougor im Haus, ower des is jetz rüm. Du konnst rümguck wie de willst, es is känne mehr zu sahn. Dabei sen des mit die schüenste Bluma, dies üwerhaupt uf dare Welt geit. Sie sen mäst hell durchsichtich und vo dann gebouchene Stamm gien o die Seite sou ganz feine Ästlich raus, dass es aussieht wie a ganz fein geglöpplter Tüschdeckeläufer und sou filigran, wie e schöpferisches Kunstwerk. Schod, dass die Kinner hoitzutoch des blos nou uf Bilder sah könne. Ower sie gucke in dan Internet gor nit noch, weil se ja nit wüsse, dass es die omol gaw hot. Des elles hengt notürlich mit dare Umwelt zom und damit, dass mir blos no in so fäiste modäena Hoiser wohne, die wu du fast nix mer gelüft konnst. Die Fenstergläiser sen doppelwandich oder sougor dreifoch, da hot sou a empfinliche Eisblume kä Gelachehät mia sich feistzusetze und zu woasse. Die Suete vo Bluma braucht bestümte Vorraussetzunge, damit se sich wohlfühlt und des wor halt früher bei uns der Fall und wahrscheinlich in ella annere Hoiser a. Eisblume sen spezialisiert auf Fensterschoiwe die wu blo ä Glos höm, und guet isses, wenn die Schoiwa oder dos ganze Fenster gor nit sou dicht is. Daswache höm die früher a när aweng Kitt üm die Schoiwe rümgemocht und vielleicht noch e poor Jaoahr is dar wieder rausgfalle; die Schoiwe hoat geklappert wenn dar Wind gange is, aber für die Eisbluma woar alles gericht. Du hoast se aweds erscht gor nit gsann, weil se sou langsam gewoase sen. Wenn du ower früh aufgewacht bist, war se scho es ganze Fenster naufgewoase, vo ä Eck neis annere. Weils ja üm die Weihnochtszeit woar, hoast de sou wie sou gedocht, des sen weiße Tanneweidl. Es hoat a dauß ziemlich eisich sei mues, sunst wär des a nit gange, und vo inne woarsch guet, wenn die Luftfoichtichkät hoach genuch woar.

Mir woarn drei Kinner in dare Schlofstuewe und höm vo Natur aus die ganze Nocht feist gschnauft. Und bei jedem Atemzuch hoast du die Schnaufwolke gsann, obwohl du die Zudecka bis o die Nose gezouche hattst.

Die Wolke is nocher nü os Fenster gezouche und hot sich direkt doa niedergschloche. A wenn du unbedingt sah wollst, wos jetz passiert, du bist ümmer vorhar eigschlofe. Des wor a guet sou, weil uns hots in dara kalte Kommer ümmer gfroan. Mir hatte zu Dritt ä Wirmfloasche und die is, wenn mir nei die kalte Bette sen, reiüm gange. Änne hot ogfangt, dann dar Annere und dar Dritt hoatse nocher die ganze Nocht behalt döf. Es woar guet, wenn du in deim Stroahsock sou e Kuhle neigemacht hattst, doa hats de links und rachts a nou a bissle Schutz. Wenn de dich ower zu tief neigegrowa hatst, dann woarscht de früh direkt uff die Brietter gelache. O die ganz kalte Toch, a wenns daus Schnie gawe hot, doa hot dar Wind dan feine Schnie nei ufs Fensterbriet gedrückt und die Stroahmatzraze woar oft früh o die Ecke feistgfruen. Da bist du ower schnell raus und nei die woarme Küche, wu die Muetter beizeit scho des Foier ogemocht hat und die woarme Milich fertich woar.

Es is a nit sou, dass die Eisbluma ümmer gleich ausgsann höm. Die hatte ganz verschiedene Furme, woarn dick oder dünn und mehr und wenicher stoark. Ower egal wie, sie woarn arch schüa, für mich, wie gsocht, mit die schüenste Bluma üwerhaupt. Mir selwer höm se, sou wie annere Pflanze a, durch unner Verhalte schier ausgerott und dabei wärsch ganz äfoch die wieder harzuzüchta. Mir müesste blos aus unner Burche raus, in e äfoche Hütte wohn, mit äfoche Schoiwe, mit Holzscheitlich heiz und vor allem oweds des Foier ausgie loas. Wenns nochher kalt genuch is, dann hätte die sich a wieder ruck zuck ogsiedelt und mir hätte früh, wenn die Sunn aufgäaht, die schüenste Eisblumewiese. Guet ich brauchs nixmer, ich hob genuch Eisbluma gsann, aber mer sollt die Kinner wieder nausschick in die Natur, in soate Hütte, weil da komer nit äfoch aweds des Räidla vo dara Fueßboudaheizung hoachgedräa.

Des ist exakt dar Toad vo di Eisbluma. Ich täts a jedm wünsch, des a hoit nou amol sah zu könne.

Es geit vo dara Elke Bräunling des schuene Kinnergedicht:

A Blume blueht am Fenster

Sie is silberhell und weiß

Und sie funklt wie a Sternle

Glitzerhell im Sonnegleiß

Und ich starre auf des Wunder

Des sou selten hoit nou gschieht

Weil bei uns aus Eis im Winter

Ganz selten a Blume blüeht

fa201217