A Toch mit viel „Nix“ is a Nixtoch

A Toch mit viel „Nix“ is a Nixtoch

Wahrscheinlich liecht des o dara Johreszeit, wahrscheinlich am November, weil die Toch äfach trüe sen und du des Problem sunst gar nit mirkst. Dar Somstoch geaht nou, abwer wenn am Sunntoch nix los ist, da müsst mer dan „Sonntag“ vom Gfühl har umtäff in „Nixtag“ oder wie mir soche „Nixtoch“. Es is äfach nix los, dar Kalener is lähr, kä änzicher Termin und die Loit, di wu mir eigelode hatte, höm a scho wieder abgsacht, weil sie hätte doch a weng Fieber und do geat halt in dara Zeit nix. Feichlinge sens, sölla halt soch dass se sich wacha dan Virus nix wie nei die Housa mocha. Ower dass die net kumme is a guet, weil mir hätte a nix o Kuche da, weil mir uns a auf nix vorbereitet höm. In der Früh hast du gar kän Grund aufzustean, weil, obwohl das Rollo fast ouwa is, kümmt nix a Licht rei und sou hast du in deim Koupf nix annersch wie trüewe Gedanke, und ich sochs gleich, da würd sich a dann ganze Toch wohrscheinlich nix bessern.

Weil nix o Licht im Ziemmer is wie ich aufs Klo muess, kriech ich die Kurva üms Bett rüm nit sou richtig und blei mit mei kläns rachts Ziehla o die Kante vo dann Bett henge. Es tut nix wäha, wenn ich soch tät, is geloucha; nä, es is a wahnsinnicher Schmerz, wie wenn mir äner mit em Hommer drauf geklopft hätt. Trotzdem konn ich, wie mei Fra frächt, wos denn passiert is, ganz tapfer soch: „Nix, schlof weiter!“. Irchendwie hob ich´s bis zum Klo gschafft und wie ich färtich wor, hab ich gemirkt: vo dan Klopapier is a nix mer do. Hob ich neichta nix mer dro gedocht nochzufülla. Dar Lokus is auf dar anere Etasche und, weil die Technik ja do is, will ich mei Fraa aruef, dass se mir a bissla Klopapier brengt. Ich drück uf des Kästle aber nix passiert. Worüm is des grod jetz lähr wenn ichs amol brauch! Na muesst ich halt a bissla rümblärr bis se mich ghört hat, sie hat awer gemähnt, es wär nix mer im Haus und ob ich a e poor Bläitter vom Fernsehheftla nam tät. Mir is in dann Moment nix anerschter übrichgebliebe und ich hob mich mit Sat1 und RTL obgeputzt.

Dann hob ich mich ogezouche und hob mich nei die Küche gschleppt, weil sou a früscher Kaffee früh mich o soatte Toch rettet. Ihr könnt euch ower jetz scho gedenk, dass o en solche Toch des an nit sou passiert wie´s söll. Also ich drück auf dan Startknoupf und scho leicht die Maschine los. Zum Glück kä Meldung, dass die Bohne fahle oder es Wasser lähr is. Nä, es funktioniert einwandfrei und scheinbar will dar Toch doch nou zu en ganz gemüetliche Sunntoch war. Ich hob mich scho gfräht, namm mei alte Kaffeetasse am Henkel und bautz; reißt des mir nix dir nix dann Henkl ro. Der hat äfoch nix mer ghalte und dar ganze Kaffee platscht auf en Bode und mei Tasse geat in die ewiche Jochtgründe ei. In dara ganze Küche is nix mer trucke. Ich hob nacher wieder sauber gemocht, wor fertich und beim letzta Schrittla trat ich nou amol in sou a Stück Schirwe, dosmol awer nix mer mit em rachte, sondern mit em linke Fueß. Es hat zum Glück nix gebluet und des is a sou an Toch schue a groaßes Glück.

Ich hatt scho gar kän Hunger mehr, also hom mer, obwohl Sunntoch war, zum Mittachessen gar nix geplant. Und weil ich ümmer nou nit richtich wach wor und mir a nix annersch eigfalle is, hob ich mich wieder auf die Couch geleicht und wollt a weng Sport moch. Formel 1 is grod ogange und kaum wor dar Start hat a scho wieder sou e Renner gebrönnt, es wor ja der erschte Advent, awer mei Laune hat´s um nix gebessert. Also hob ich die Kiste wieder ausgemocht und wor sou dogelache und hab gedocht, jetz moch ich äfach amol gor nix. Aber scho is mei Fraa kumme und hat gsocht:

„Du, mir höm hoit nix vür und mir höm a scho lang nix mer gemocht, also wenn ich wöllt könnte mir uns zom a bissla auf die Couch geleich und o nix mehr anersch denk als o uns“. Mir ist nix degeiche eigfalle, awer dann hob ich gsocht:

„Wenn´s Dir nix ausmoch tät, no tät ich erscht dusch. Weil´s ja nix bessersch geit als wenn mer frisch geduscht ist.“

Also is mir nix anersch übrich gebliewe und ich hob mich nei´s Bod gemocht. Da hat uf ämol mei Handy geklingelt. Mei Freund wor in dara Leitung und hat gsocht:

Ja also es wär hoit sou a trüber Toch und nix los, ob mir uns nit röff könne bei ihm dahäm zum Kaffee trinke; ich söllt ower seiner Fraa nix davo erzäihl, weil sie will hoit amol gor nix moch und sich ausruh. Mir sölle äfach spontan vorbeikumm.

Ich hob gsocht: „Hör zu du Kaschper, dan ganze Toch is scho nix los und ich wort drauf, dass änner orueft. Du denkst dir zwor nix dabei, awer jetzt grod wu du oruefst ist bei uns des mit dem „Nix los“ vorbei, verstähste? Und wenn du mänst, du verstähst jetz nix, dann kannst de mich a gleich amol am Oasch…….“

Aber nä, liewer net, ich mues aufläich und mich beeil, sunst passiert bei uns a wieder nix.

fa201208